Բարի գործերը փառաբանում են Աստծուն
ՃՇՄԱՐԻՏ քրիստոնյաները Աստծուն փառք են բերում իրենց բարի գործերով և օրինակելի վարքով (Ա Պետրոս 2։12)։ Սա կարելի է տեսնել վերջին տարիներին Իտալիայում տեղի ունեցած դեպքերից։
Երբ 1997 թ.–ին կործանարար երկրաշարժը հարված հասցրեց Մարկե և Ումբրիա մարզերին՝ վնասելով մոտ 90 հազար տներ, Եհովայի վկաները անմիջապես գործի անցան՝ օգնելու իրենց հավատակիցներին և մյուս աղետյալներին։ Նրանք մատակարարեցին անհրաժեշտ մի շարք առարկաներ, ինչպես՝ կցասայլեր, քնապարկեր, վառարաններ, գեներատորներ և այլն։ Եվ իրենց ցուցաբերած այդ օգնությունը աննկատ չմնաց։
Իտալական լրագրերից մեկը հաղորդեց. «Երկրաշարժից վնասված մասերում օգնություն տրամադրելու համար առաջին ժամանողները Տերամոյի գավառի՝ Ռոսետոյի Եհովայի վկաներն էին։ Աղոթելու համար ժամանակ առ ժամանակ հավաքվելուց բացի, Եհովային հավատարիմ այս անհատները գործնական օգնություն էլ են մատուցում՝ առանց հաշվի առնելու, թե տուժողները որ կրոնին են պատկանում («Il Centro»)»։
Նոչերա Ումբրայի քաղաքագլուխը՝ ամենաշատ տուժածներից մեկը, հետևյալ նամակը գրեց Վկաներին. «Անձնապես սրտանց շնորհակալություն եմ հայտնում՝ Նոչերայի բնակիչներին մատուցած ձեր օգնության համար։ Ես վստահ եմ, որ այսպես ասելով արտահայտում եմ բոլոր քաղաքացիների զգացումը»։ Բացի դրանից, Ներքին գործերի նախարարությունը պատվոգրով և շքանշանով պարգևատրեց Եհովայի վկաների քրիստոնեական ժողովին՝ «ի վկայություն Ումբրիա ու Մարկե մարզերում ծագած աղետի ժամանակ նրանց կատարած գործերի և թափած ջանքերի»։
2000 թ. հոկտեմբերին կորստաբեր ջրհեղեղը ողողեց հյուսիսային Իտալիայի Պիեմոնտ մարզը։ Նորից Վկաները շտապ գործի լծվեցին՝ օգնություն ընձեռելու։ Այս բարի գործերն էլ աննկատ չմնացին։ Պիեմոնտ մարզի կողմից նրանք պարգևատրվեցին հուշատախտակով՝ «ջրհեղեղից տուժած բնակիչների օգտին՝ Վկաների կատարած թանկարժեք կամավոր աշխատանքի համար»։
Հիսուս Քրիստոսը սովորեցրել է իր հետևորդներին. «Թող այդպէս փայլի ձեր լոյսը մարդկանց առաջ, որպէսզի տեսնեն ձեր բարի գործերն ու փառաւորեն ձեր Հօրը, որ երկնքում է» (Մատթէոս 5։16)։ «Բարի գործեր» կատարելով և իրենց մերձավորներին հոգևորապես, ինչպես նաև այլ կերպ օգնելով՝ Եհովայի վկաները ուրախությամբ փառաբանում են Աստծո՛ւն և ոչ թե իրենց։