Երջանիկ ու երկար կյանքի դեղատոմսը
ԿԱ ՄԻ այսպիսի ասացվածք. «Բոլորն ուզում են ապրել, բայց ոչ ոք չի ուզում ծերանալ»։ Երբ մոտենում է թոշակի անցնելու ժամանակը, մարդիկ սովորաբար մտածում են, որ ազատ կլինեն և քիչ պատասխանատվություններ կունենան։ Մյուս կողմից՝ նրանք վախենում են, որ կդառնան նպատակ չունեցող, անօգտակար անձնավորություն, կլինեն միայնակ, դժբախտ և վատառողջ։
Իսկ ո՞րն է երջանիկ կյանքի գաղտնիքը։ Լավ ընկերներն ու սիրառատ ընտանիքը կարող են երջանկացնել յուրաքանչյուր մարդու՝ լինի նա երիտասարդ թե ծեր։ Սակայն կարևորն այն չէ, թե ինչեր են անում ուրիշները մեծահասակ մարդու կյանքը բովանդակալից դարձնելու ուղղությամբ։ Շատ ավելի կարևոր է, թե նա ինքը ինչ կարող է անել ուրիշների համար։
423 մեծահասակ զույգերի հետ անցկացված երկարատև հետազոտությունից պարզ դարձավ, որ «ուրիշներին օգնելը կարող է երկարացնել մեր կյանքը»։ Ուսումնասիրությունն անցկացնող Ստեֆանի Բրաունը բացատրում է. «Արդյունքները ցույց են տալիս, որ հաղորդակցությունը օգտակար է ոչ թե այն ժամանակ, երբ որևէ բան ենք ստանում դիմացինից, այլ երբ տալիս ենք»։ Դա կարող է ներառել ուրիշին տան մեջ օգնելը, երեխաներին հոգ տանելը, ուրիշի փոխարեն որևէ տեղ գնալը, նրան մեքենայով որևիցե տեղ տանելը կամ դիմացինին լսելու պատրաստակամությունը»։
Մոտավորապես 2 000 տարի առաջ Հիսուս Քրիստոսն ասել էր. «Աւելի երանելի է տալը քան թէ առնելը» (Գործք 20։35)։ Ուստի երկարատև ու երջանիկ կյանքի դեղատոմսը բանկում մեծ հաշիվ ունենալը չէ և ոչ էլ ծերացման պրոցեսը խոչընդոտող թերապիայի դիմելն ու դիետա պահելն է։ Փոխարենը՝ հարկավոր է շարունակել ակտիվ կյանք վարել ու մեր ժամանակը, եռանդը և ուժերը օգտագործել ուրիշների կյանքը հարստացնելու համար։
Այնուամենայնիվ, միայն տալով չենք ազատվի ծերությունից, հիվանդությունից և մահից։ Այս չարիքները վերացնելու միակ միջոցը Աստծո Թագավորությունն է, որի իշխանության օրոք հիվանդությունները կվերանան, և նույնիսկ «մահն այլեւս չի լինիլ» (Յայտնութիւն 21։3, 4; Եսայիա 33։24)։ Հնազանդ մարդիկ հավիտյան կապրեն երջանիկ կյանքով դրախտի վերածված երկրի վրա (Սաղմոս 37։29)։ Եհովայի վկաները ուրախ են, որ հնարավորություն ունեն տալ ուրիշներին երջանիկ ու երկար կյանքի այս աստվածաշնչյան դեղատոմսը։