Նրանք պատմում են բարի լուրը խուլ մարդկանց

ԱՀԱ, թե ինչպես արտահայտվեց Եհովայի վկաների մասին Նավալկարներոյի (Մադրիդ, Իսպանիա) ծերանոցներից մեկի տնօրենը։ Ի՞նչը մղեց նրան այդպիսի խոսքեր ասել։

Ռոզաս դել Կամինո ծերանոցի որոշ բնակիչներ խուլ են։ Սակայն քանի որ Վկաները ջանքեր են թափել սովորելու իսպաներեն ժեստերի լեզուն, նրանք կարողանում են հաղորդակցվել այդ բնակիչների հետ։ Տնօրենը գովեց Վկաներին, որ նրանք անշահախնդրորեն իրենց ժամանակը տրամադրում են, որպեսզի Աստվածաշունչ ուսումնասիրեն հոգևորով հետաքրքրվող մարդկանց հետ։ Նա նկատեց, թե ինչ բարերար ազդեցություն էր թողնում Թագավորության բարի լուրը բնակիչների վրա։ Վերջիններս, հատկապես նրանք, ովքեր տեսողական և լսողական խնդիրներ ունեն, նույնպես բարձր են գնահատում Վկաների այցելությունները։

Յուլոհիոն՝ բնակիչներից մեկը, որը կույր է և խուլ, այժմ Եհովայի վկաների հետ Աստվածաշունչ է ուսումնասիրում։ Մի օր ուսումնասիրության ժամանակ մի տարեց մարդ մոտեցավ Վկային և նրան հանձնեց մի բանաստեղծություն, որը գրել էին բնակիչները՝ ի նշան իրենց գնահատանքի։ Բանաստեղծությունը կոչվում էր «Լինել Վկա»։ Այնտեղ այսպիսի տողեր կային. «Նրանք կազմակերպված են, ապրում են բովանդակալից կյանքով և ուրախություն ու իմաստություն են ստանում Եհովայից։ Նրանք միշտ այցելում են մարդկանց, որովհետև ապավինում են Եհովային»։

Եհովայի հանդեպ վստահությունն է, որ մղել է աշխարհի բազմաթիվ Վկաների սովորել իրենց երկրում ապրող խուլ մարդկանց լեզուն։ Այդպես նրանք խուլ անհատներին պատմում են Աստվածաշնչի քաջալերական հույսի մասին։