Նրա ուրախությունը Եհովայի օրենքն էր

ԱԼԲԵՐՏ ՇՐՅՈԴԵՐԸ՝ Եհովայի վկաների Կառավարիչ մարմնի անդամներից մեկը, ավարտեց իր երկրային կյանքի ընթացքը 2006 թ. մարտի 8–ին, չորեքշաբթի օրը։ Նա 94 տարեկան էր և ավելի քան 73 տարի անցկացրել էր լիաժամ ծառայության մեջ։

Եղբայր Շրյոդերը ծնվել է Սագինո քաղաքում, (Միչիգան, ԱՄՆ) 1911 թ.–ին։a Մանուկ հասակում նա շատ բան էր սովորել Աստվածաշնչի մասին իր մորատատից, որը նաև արմատավորել էր նրա մեջ Եհովայի Խոսքը կարդալու սեր։ Միչիգանի համալսարանում նա ուսումնասիրել էր լատիներեն, գերմաներեն և էլեկտրատեխնիկա։ Սակայն, երբ Գրությունների հանդեպ նրա գնահատանքը աճեց, նա դադարեցրեց իր ուսումը և լիաժամ ծառայություն սկսեց։ 1932 թ.–ին նա դարձավ Բրուքլինի (Նյու Յորք) Բեթելի ընտանիքի անդամ։

1937 թ.–ին 26 տարեկանում եղբայր Շրյոդերը նշանակվեց վերահսկելու Եհովայի վկաների գործունեությունը Բրիտանիայում։ Այնտեղ քարոզչության հանդեպ նրա նախանձախնդրությունը շատերին մղեց լիաժամ ծառայություն սկսել։ Երիտասարդներից մեկը, ում հետ նա ընկերակցում էր Լոնդոնի Բեթելում, Ջոն Բարն էր։ Հետագայում նրանք միասին երկար տարիներ ծառայեցին Կառավարիչ մարմնում։

Եհովայի վկաների համար եղբայր Շրյոդերի կատարած աշխատանքը աննկատ չմնաց պատերազմի տարիներին։ 1942 թ. օգոստոսին նրան արտաքսեցին Բրիտանիայից։ Պատերազմի ընթացքում Ատլանտյան օվկիանոսով դժվարին ճանապարհորդությունից հետո սեպտեմբերին նա հասավ Բրուքլին։

Այդ ժամանակ Եհովայի ծառաները արդեն ակնկալում էին, որ Երկրորդ համաշխարհային պատերազմից հետո մեծ աշխատանք պետք է կատարվեր։ Եղբայր Շրյոդերը անակնկալի եկավ և ուրախացավ՝ ստանալով իր հաջորդ նշանակումը՝ օգնել կազմելու «Դիտարանի» աստվածաշնչյան «Գաղաադ» դպրոցի կրթական ծրագիրը։ Երկար տարիներ նա այդ դպրոցում ծառայեց որպես ուսուցիչ՝ կրթելով միսիոներներին։ Այն ուսանողները, որոնց նա ուսուցանել է «Գաղաադում» և հետագայում Թագավորական ծառայության դպրոցում, սիրով են հիշում նրա դասերը։ Նա ուրախություն էր ստանում՝ Աստծու օրենքները իր ուսանողների մեջ արմատավորելով և օգնելով նրանց հասկանալ Եհովային ճանաչելու կարևորությունը։

1956 թ.–ին եղբայր Շրյոդերը ամուսնացավ Շարլոտ Բոուենի հետ։ 1958 թ.–ին ծնվեց նրանց որդին՝ Ջուդա Բենը։ Եղբայր Շրյոդերը հրաշալի ամուսին էր և հայր։ 1974 թ.–ին նա սկսեց ծառայել Կառավարիչ մարմնում, որտեղ նրա խորաթափանցությունը շատ էր գնահատվում։ Նա բարի և խոնարհ մարդ էր, որի նպատակը նախևառաջ Աստծու վեհ անունը մեծարելն էր։ Մենք վստահ ենք, որ եղբայր Շրյոդերը ստացել է իր երկնային վարձատրությունը որպես օծյալ քրիստոնյա, որն իրոք ուրախություն էր գտնում Եհովայի օրենքների մեջ (Սաղմոս 1։2, ՆԱ)։

[ծանոթագրություն]