Մեր ընթերցողները հարցնում են
Հիսուսը Միքայել հրեշտակապե՞տն է
▪ Այո՛։ Շատ մշակույթներում տարածված է մեկից ավելի անուններ կրել։ Աստվածաշնչային ժամանակներում նույնպես մարդիկ մեկից ավելի անուն են ունեցել։ Օրինակ՝ Հակոբ նահապետը կոչվել է նաև Իսրայել (Ծննդոց 35։10)։ Պետրոս առաքյալը հինգ տարբեր անուններ է կրել՝ Սիմեոն, Սիմոն, Պետրոս, Կեփաս և Սիմոն Պետրոս (Մատթեոս 10։2; 16։16; Հովհաննես 1։42; Գործեր 15։7, 14)։ Իսկ ինչպե՞ս կարող ենք համոզված լինել, որ Միքայել անունն էլ Հիսուսի անուններից մեկն է եղել։ Քննենք մի քանի աստվածաշնչային համարներ։
Աստվածաշնչում Միքայել անունը հանդիպում է հինգ անգամ։ Դրանցից երեքը նշված է «Դանիէլ» գրքում։ Դանիէլ 10։13, 21 համարներում կարդում ենք, որ հատուկ հանձնարարություն կատարելու համար ուղարկված հրեշտակներից մեկին օգնության է հասնում Միքայելը, նա, ով կոչվում է «առաջի իշխաններից մէկը» և «ձեր իշխան»։ Իսկ Դանիէլ 12։1 համարից իմանում ենք, որ վերջին օրերում «վեր կ’կենայ այն մեծ իշխան Միքայէլը, որ կանգնած է քո ժողովրդի որդկանց վերայ»։
Հայտնություն 12։7–ում հիշատակվում է, որ «Միքայելը և նրա հրեշտակները» մեծ պատերազմ են մղում, որի արդյունքում Բանսարկու Սատանան և դևերը դուրս են վռնդվում երկնքից։
Ուշադրություն դարձրու, որ վերոնշյալ բոլոր համարներում Միքայելը ներկայացված է որպես պատերազմող և Աստծու ժողովրդին պաշտպանող էակ, նա նույնիսկ պատերազմում է Եհովայի ամենագլխավոր թշնամու՝ Սատանայի դեմ։
Հուդա 9–րդ համարում նշվում է, որ Միքայելը «հրեշտակապետ» է։ Մյուս համարը, որում խոսվում է հրեշտակապետի մասին, 1 Թեսաղոնիկեցիներ 4։16–ն է։ Այս համարում Պողոսը նկարագրում է հարություն առած Հիսուսին՝ ասելով. «Տերն [Հիսուսն] ինքը երկնքից կիջնի հրամանով, հրեշտակապետի ձայնով և Աստծու փողով»։ Այո՛, Հիսուս Քրիստոսը հրեշտակապետ է։
Ուստի ի՞նչ եզրակացության ենք գալիս։ Հիսուս Քրիստոսը Միքայել հրեշտակապետն է։ Ե՛վ Միքայել անունը (նշանակում է «ո՞վ է Աստծու նման»), և՛ Հիսուս անունը (նշանակում է «Եհովան է փրկությունը») մեր ուշադրությունը կենտրոնացնում են այն բանի վրա, թե ինչ դեր ունի վերջինս Աստծու գերիշխանության հարցում։ Փիլիպպեցիներ 2։9–ում կարդում ենք. «Աստված առավել բարձր դիրքի արժանացրեց նրան և մի այնպիսի անուն շնորհեց, որը վեր է մյուս բոլոր անուններից»։
Տեղին է նշել, որ Հիսուսի երկրային ծնունդը նրա կյանքի սկիզբը չէր։ Երկրային ծառայության ընթացքում Հիսուսը հաճախ էր խոսում իր մինչմարդկային գոյության մասին (Հովհաննես 3։13; 8։23, 58)։
Փաստորեն, Հիսուսը կոչվել է Միքայել հրեշտակապետ իր մինչմարդկային գոյության ժամանակ։ Հարություն առնելուց և երկինք համբարձվելուց հետո Հիսուսը նորից սկսել է կրել Միքայել անունը, քանի որ ստանձնել է իր ծառայությունը երկնքում՝ «Հոր՝ Աստծու փառքի համար» (Փիլիպպեցիներ 2։11)։