Ուսումնասիրությունդ դարձրու ավելի հաճելի և արդյունավետ
Ինչպե՞ս կարող ենք ավելի մեծ բավականություն ստանալ Աստվածաշնչի ուսումնասիրությունից։ Ինչպե՞ս կարող ենք այն ավելի արդյունավետ դարձնել։ Եկեք կարճ քննենք երեք կարևոր քայլեր, որոնք կօգնեն մեզ մեծ օգուտներ քաղելու Աստվածաշնչի անձնական ուսումնասիրությունից։
1 ԱՂՈԹԻՐ։ Առաջին քայլը աղոթելն է (Սաղ. 42։8)։ Ինչո՞ւ։ Քանի որ Աստծու Խոսքն ուսումնասիրելը մեր երկրպագության մասն է։ Հետևաբար, մենք կարիք ունենք խնդրելու Եհովային, որ տա իր սուրբ ոգին և ճիշտ մտավիճակ (Ղուկ. 11։13)։ Բարբարան, որը երկար տարիներ միսիոներ է ծառայում, ասում է. «Ես միշտ աղոթում եմ նախքան Աստվածաշունչ կարդալը կամ ուսումնասիրելը։ Դրանից հետո զգում եմ, որ Եհովան ինձ հետ է և հավանություն է տալիս այն բանին, ինչ պատրաստվում եմ անել»։ Ուսումնասիրությունից առաջ աղոթելը բացում է մեր միտքն ու սիրտը, որ լիովին ընդունենք մեր առաջ դրված առատ հոգևոր սնունդը։
2 ԽՈՐՀՐԴԱԾԻՐ։ Ժամանակի սղության պատճառով շատերը սահմանափակվում են Աստծու Խոսքը մակերեսորեն ընթերցելով։ Սակայն նրանք զրկվում են այն օգուտներից, որ կարող էին ստանալ Աստվածաշնչի ուսումնասիրությունից։ Կարլոսը, որն ավելի քան 50 տարի ծառայում է Եհովային, հասկացել է, թե ուսումնասիրությունն ավելի արդյունավետ դարձնելու համար որքան կարևոր է ժամանակ տրամադրել խորհրդածելուն։ Նա ասում է. «Հիմա Աստվածաշնչից ավելի քիչ էջեր եմ կարդում՝ մոտ երկու էջ ամեն օր, բայց ավելի շատ ժամանակ եմ տրամադրում կարդացածիս շուրջ խորհրդածելուն, որ կարևոր դասեր քաղեմ» (Սաղ. 77։12)։ Երբ ժամանակ ենք հատկացնում խորհրդածելուն, ավելացնում ենք մեր գիտելիքները և ավելի լավ ենք հասկանում Աստծու կամքը (Կող. 1։9–11)։
3 ԿԻՐԱՌԻՐ։ Երբ տեսնում ենք որևէ բանի գործնական արժեքը, ավելի շատ օգուտներ ենք ստանում դրանից։ Նույնը կարելի է ասել Աստվածաշնչի ուսումնասիրության մասին։ «Ուսումնասիրությունը օգնում է հաղթահարելու առօրյա խնդիրներս և պատրաստում է ինձ օգնելու ուրիշներին»,— ասում է Գաբրիելը՝ երիտասարդ եղբայր, որն ունի Աստվածաշնչի ուսումնասիրության կանոնավոր գրաֆիկ։ Նա ավելացնում է. «Ես ձգտում եմ կիրառել այն ամենը, ինչ սովորում եմ» (2 Օրենք 11։18; Հեսու 1։8)։ Այո՛, աստվածաշնչյան գիտելիքների մեծ պաշար կա, որ կարող ենք ստանալ ու կիրառել (Առակ. 2։1–5)։
ԱՄՓՈՓՈՒՄ։ Իրոք որ, մեծ առանձնաշնորհում ունենք «խորասուզվելու» այն գիտելիքների մեջ, որոնք բխում են իմաստության Աղբյուրից՝ Եհովայից (Հռոմ. 11։33)։ Ուստի հաջորդ անգամ ուսումնասիրությունը սկսելուց առաջ նախ աղոթիր Եհովային և խնդրիր նրան, որ տա իր սուրբ ոգին ու ճիշտ մտավիճակ։ Հետո ժամանակ առ ժամանակ կանգ առ, որ խորհրդածես կարդացածիդ շուրջ։ Նաև հետևողական եղիր, որ կիրառես սովորածդ։ Երբ այս կարևոր քայլերն անես, կտեսնես, որ Աստվածաշնչի ուսումնասիրությունդ դառնում է ավելի հաճելի և արդյունավետ։