Աստվածաշնչի խորհուրդները գործնակա՞ն են մեր օրերում
ՈՄԱՆՔ ԱՍՈՒՄ ԵՆ՝ ՈՉ։ Մի բժիշկ առաջնորդության համար Աստվածաշնչին դիմելը համեմատեց այն բանի հետ, որ այսօր քիմիա դասավանդելու համար դասախոսը օգտվի 1920-ականներին հրատարակված դասագրքից։ Աստվածաշնչի հանդեպ թերահավատորեն տրամադրված այլ մարդիկ էլ գուցե ասեն, թե դա նման է նրան, որ ժամանակակից համակարգիչ օգտագործելու համար դիմենք վաղուց արդեն գործածությունից դուրս եկած համակարգչի շահագործման ուղեցույցի։ Այսպիսով՝ տեսնում ենք, որ որոշ մարդիկ Աստվածաշունչը չափազանց հնացած գիրք են համարում։
Ուստի գուցե հարց առաջանա. գերժամանակակից տեխնոլոգիաներով հագեցած այս աշխարհում մարդ ինչո՞ւ պետք է առաջնորդության համար դիմի նման հնաշունչ մի աղբյուրի։ Չէ՞ որ այսօր մատչելի են անթիվ-անհամար վեբ կայքեր ու բլոգներ, որտեղ կանոնավորաբար տեղադրվում են թարմ տեղեկություններ, նորանոր խորհուրդներ ու առաջարկներ։ Իսկ հեղինակավոր հեռուստահաղորդումներում ու թոք շոուներում ելույթ են ունենում բազմաթիվ բանիմաց և հմուտ հոգեբաններ, խորհրդատուներ, գրողներ, որոնք զանազան խորհուրդներ են տալիս կյանքի ու ապրելակերպի վերաբերյալ։ Էլ չենք խոսում հոգեբանական խորհուրդներ պարունակող տարատեսակ գրքերի մասին, որոնք հեղեղել են գրախանութները և մեծ շահույթ են բերում միլիարդավոր դոլարների եկամուտ ունեցող այդ ոլորտին։
Ամեն րոպե թարմացվող այս առատ տեղեկությունների առկայության դեպքում մի՞թե արժե առաջնորդության համար դիմել Աստվածաշնչին, որի վերջին խոսքերը գրվելուց մոտ 2 000 տարի է անցել։ Արդյոք իրավացի՞ չեն այն մարդիկ, ովքեր այդ հնամենի գրքի խորհուրդներով առաջնորդվելը համեմատում են քիմիայի հին դասագրքից կամ հին համակարգչի ուղեցույցից օգտվելու հետ։ Իրականում, նման համեմատությունը տեղին չէ։ Թեև գիտությունն ու տեխնիկան արագորեն փոփոխվում են, բայց մարդկային էությունն ու հիմնական կարիքները նույնն են մնում։ Մարդիկ այսօր էլ են ցանկանում գտնել կյանքի իմաստը, ունենալ հնարավորինս երջանիկ ու ապահով կյանք, ջերմ ընտանեկան փոխհարաբերություններ և անկեղծ ու հոգատար ընկերներ։
Չնայած Աստվածաշունչն իսկապես հին գիրք է, բայց օգնում է ձեռք բերել այս ամենը և նույնիսկ ավելին։ Այդ գրքում գրված է, որ այն ներշնչված է մեր Արարչի կողմից։ Նաև գրված է, որ այն կարող է մեզ ուղղություն տալ կյանքի բոլոր բնագավառներում և օգնել դիմակայելու ցանկացած լուրջ դժվարության (2 Տիմոթեոս 3։16, 17)։ Ավելին, Աստվածաշնչում հավաստիացում է տրվում, որ այնտեղ գրված խորհուրդները երբեք չեն հնանում ու չեն կորցնում իրենց ուժը. դրանց վրա ժամանակը ազդեցություն չունի։ Իր մասին Աստվածաշունչն ասում է. «Աստծու խոսքը կենդանի է» (Եբրայեցիներ 4։12)։
Արդյոք դա ճի՞շտ է։ Աստվածաշունչն իսկապե՞ս գոյություն ունեցող գրքերի մեջ ամենագործնականն ու արդիականն է. այն իրո՞ք «կենդանի» գիրք է։ «Դիտարանի» այս համարը կօգնի ձեզ գտնել վերոհիշյալ բոլոր հարցերի պատասխանները (սա առաջինն է այն հատուկ թողարկումներից, որոնք լույս են տեսնելու այսուհետ)։