Ամբողջ աշխարհում նշվող Քրիստոսի մահվան Հիշատակի երեկոն

¹ Եհովան մեզ առատ պարգևներ է շնորհում։ Նրա ցուցաբերած բարությունն ու սիրալիրությունը վառ կերպով նկարագրվում է որպես «նորա անպատմելի պարգև»։ Այո՛, ‘Աստծո շնորհն’ այն աստիճանի հրաշալի է, որ մեր կարողությունից վեր է այն նկարագրելը (Բ Կորնթ. 9։14, 15, ԱԹ)։

² Նրա մեծագույն պարգևը։ Հիսուս Քրիստոսը՝ որպես մարդկության Փրկիչ, բոլոր պարգևներից մեծագույնն է։ Եհովան իր սիրելի և միածին Որդուն տվեց՝ մարդկային ցեղի հանդեպ իր մեծ սերը արտահայտելով (Յովհ. 3։16)։ Աստծո կողմից այսպիսի օրհնությունը արժանի է նշվելու ամբողջ աշխարհում։ Իսկ ե՞րբ և ինչպե՞ս։ 1999 թ. ապրիլի 1–ին՝ հինգշաբթի օրը, ողջ աշխարհում քրիստոնյաները կնշեն Տիրոջ ընթրիքը, և, այդ անելով, կպահեն բոլոր զոհաբերություններից մեծագույնի հիշատակը (Ա Կորնթ. 11։20, 23—26)։

³ Քրիստոսը զոհվեց մեզ համար նույնիսկ «երբոր մենք դեռ մեղաւոր էինք», և մենք կարող ենք ցույց տալ մեր երախտագիտությունը՝ պահելով նրա մահվան հիշատակը և ուրիշներին էլ հրավիրելով մեզ հետ ներկա գտնվելու այդ ամենակարևոր իրադարձությանը (Հռովմ. 5։8, ԱԹ)։

⁴ Ամենակարևոր իրադարձությունը։ Քրիստոսի մահվան հիշատակը պահելիս՝ գլխավորապես ուշադրություն է դարձվում այն բանի վրա, որ Հիսուսն անթերի կերպով թիկունք է կանգնել Աստծո գերիշխանությանը։ Այն նաև հիշեցնում է մեզ, որ Հիսուսի զոհաբերության հանդեպ հավատ ընծայելու շնորհիվ կարող ենք անարատ կանգնել Եհովայի առաջ՝ այդպիսով փրկության հույսն ունենալով (Գործք 4։12)։ Իսկապես, այդ միջոցառումը տարվա ամենակարևոր իրադարձությունն է։

⁵ Մենք մեր դրացու հանդեպ սեր կցուցաբերենք, եթե նրանց հրավիրենք՝ մեզ հետ միասին Տիրոջ ընթրիքը նշելու։ Փրկանքի օգուտներից դեռ միլիոնավոր մարդիկ կարող են օգտվել՝ նրա գերազանց արժեքի մասին սովորելով (Փիլիպ. 3։8)։ Քրիստոսի զոհաբերությանը հավատ ընծայողները կարող են հավիտենական կյանքի ամուր հույսը ունենալ (Յովհ. 17։3)։

⁶ Հիշատակի երեկոյին նախորդող և հաջորդող օրերը հատուկ առիթներ են ստեղծում մեզ համար, որպեսզի ցույց տանք մեր գնահատանքը Աստծո մեծագույն պարգևի հանդեպ։ Սա մի հոյակապ ժամանակ է Աստծո Թագավորության բարի լուրը քարոզելու մեջ եռանդուն մասնակցություն բերելու համար։ Առատ օրհնություններ են սպասվում բոլոր նրանց, ովքեր շարունակ աղոթելով խորհրդածում են Եհովայի աննկարագրելի պարգևի շուրջը և պատրաստվում են այս տարի ներկա գտնվել Տիրոջ ընթիքը նշելուն։