Նրանք տեսան ժողովի սերը

ՅՈՄԱՐԱՆ իր եղբայրների՝ Մարսելոյի և Հիվերի հետ ապրում է Գվատեմալայի փոքր գյուղերից մեկում։ Յոմարան սկսեց Աստվածաշունչ ուսումնասիրել Եհովայի վկաների օգնությամբ, և ժամանակի ընթացքում նրա եղբայրներն էլ միացան նրան։ Բայց մի դժվարություն կար։ Նրանք երեքն էլ կույր են և այդ ժամանակ չգիտեին Բրայլի գրատիպը։ Այդ պատճառով ուսումնասիրության նյութն ու աստվածաշնչյան համարները նրանց ուսուցանող եղբայրն էր կարդում։

Ժողովի հանդիպումներին հաճախելը նույնպես դժվար էր նրանց համար։ Մեքենայով մոտակա Թագավորության սրահ հասնելու համար 40 րոպե էր պահանջվում, իսկ դա նրանք ինքնուրույն չէին կարող անել։ Բայց հավատակիցների օգնությամբ Յոմարան և նրա եղբայրները ներկա էին լինում բոլոր հանդիպումներին։ Իսկ երբ նրանք սկսեցին միջշաբաթյա հանդիպումներին հանձնարարություններ ստանալ, եղբայրներն օգնում էին, որ ներկայացվելիք նյութը անգիր անեն։

2019 թ. մայիսից ժողովի հանդիպումները սկսեցին անցկացվել նաև նրանց գյուղում։ Մի ռահվիրա զույգ տեղափոխվեց այնտեղ և նպատակ դրեց Յոմարային և նրա եղբայրներին սովորեցնել Բրայլի գրատիպը, չնայած որ իրենք էլ ծանոթ չէին դրան։ Նրանք գրադարանից Բրայլյան համակարգի մասին գրքեր վերցրին, որպեսզի իմանան, թե ինչ մեթոդներով կարելի է այն սովորեցնել։

Մի քանի ամիս հետո Յոմարան և նրա եղբայրները արդեն կարողանում էին Բրայլի գրատիպով սահուն կարդալ։ Դա նպաստեց նրանց հոգևոր առաջադիմությանը։ Այժմ Յոմարան, Մարսելոն և Հիվերը ռահվիրաներ են։ Մարսելոն նաև ծառայող օգնական է։ Նրանք շատ ակտիվ են հոգևոր գործունեության մեջ։ Նրանց նախանձախնդրությունը փոխանցվում է նաև մյուսներին։

Յոմարան և նրա եղբայրները անչափ շնորհակալ են հավատակիցներին նրանց ցուցաբերած սիրո և հոգատարության համար։ Յոմարան ասում է. «Մեզ հետ առաջին իսկ հանդիպման ժամանակ Վկաները իսկական քրիստոնեական սեր դրսևորեցին»։ Իսկ Մարսելոն ավելացնում է. «Մենք հրաշալի ընկերներ ունենք մեր ժողովում և միջազգային եղբայրության մաս ենք կազմում, որը միավորված է սիրով»։ Յոմարան, Մարսելոն և Հիվերը անհամբերությամբ սպասում են այն օրվան, երբ կտեսնեն, թե ինչպես է Եհովան երկիրը դրախտի վերածում (Սաղ. 37։10, 11; Ես. 35։5)։