Եհովայի վկաների արբանյակային ալիքը հասնում է այնտեղ, ուր ինտերնետն անկարող է

Ամեն ամիս «JW Broadcasting» հեռուստաալիքով մենք հաճույքով դիտում ենք ելույթներ և տեսանյութեր։ Սակայն Աֆրիկայում բնակվող շատ եղբայրներ այդ ծրագրերը ինտերնետով դիտելու հնարավորություն չունեն։ Ինչո՞ւ։

Աֆրիկայի մեծ մասում ինտերնետ հասանելիություն չկա։ Իսկ որտեղ էլ կա, այն կա՛մ շատ թանկ է, կա՛մ՝ դանդաղ։ Օրինակ՝ Մադագասկարում բնակվող մի շրջանային վերակացու ինտերնետ ակումբում բեռնեց «JW հեռարձակման» թողարկումներից մեկը, և դրա արժեքը կազմեց 16 դոլար։ Սա ավելին է, քան ոմանք կարող են վաստակել մեկ շաբաթվա ընթացքում։

Չնայած այս սահմանափակումներին՝ Աֆրիկայում բնակվող միլիոնավոր մարդիկ առանց ինտերնետ կապի վայելում են «JW հեռարձակման» ծրագրերը։ Ինչպե՞ս։

2017 թ.-ից սկսած՝ Անդրսահարյան Աֆրիկայում «JW Broadcasting» հեռուստաալիքը հեռարձակվում է արբանյակային հեռուստատեսությամբ։ Այս ալիքը անվճար է, հասանելի է 16 լեզուներով և գործում է շաբաթը 7 օր, օրը՝ 24 ժամ։

Իրենց ծրագրերը արբանյակով հեռարձակելու համար Եհովայի վկաները պայմանագիր են կնքել մի հեռուստաընկերության հետ։ Ամսական ավելի քան 12 000 դոլար է հարկավոր վճարել, որպեսզի մեր ալիքը հասանելի լինի Անդրսահարյան Աֆրիկայի մոտ 35 երկրներում։ Որոշ իրադարձություններ ուղիղ եթերով հեռարձակելու նպատակով ժամանակ առ ժամանակ անհրաժեշտ է լինում նաև հավելյալ գումար վճարել առանձին ալիքի համար։ Սա հնարավորություն է տալիս հազարավոր մարդկանց՝ դիտելու համաժողովներն ու գլխավոր վարչության ներկայացուցչի այցելության կապակցությամբ հատուկ ծրագրերը։

Շատ մարդիկ, այդ թվում՝ ոչ Վկաներ, հեռուստացույցով դիտում են մեր արբանյակային հեռուստաալիքը։ Այնուամենայնիվ, մեծ թվով եղբայրներ ու քույրեր արբանյակային հեռուստաալիքը դիտելու համար համապատասխան սարքեր գնելու միջոցներ չունեն։ Ուստի 3 670 Թագավորության սրահներում տեղադրվեցին համապատասխան սարքեր, որպեսզի եղբայրներն ու քույրերը հնարավորություն ունենան դիտել «JW հեռարձակման» ծրագրերը։ Այն Թագավորության սրահներում, որտեղ կար հեռուստացույց կամ պրոյեկտոր, օժանդակ սարքեր գնելու և տեղ հասցնելու վրա ծախսվել է մոտ 70 դոլար, իսկ որտեղ դրանք չկային, ընդհանուր առմամբ ծախսվել է մոտ 530 դոլար։

Մեր եղբայրներն ու քույրերը շատ երախտապարտ են այս նախաձեռնության համար։ Կամերունում բնակվող մի երեց ասում է. «Իմ ընտանիքի համար սա կարծես անապատի մեջտեղում թափվող մանանա լինի»։ Նիգերիայում բնակվող Օդեբոդի անունով մի եղբայր ասում է. «Ընտանիքով շաբաթը երեք անգամ դիտում ենք մեր հեռուստաալիքը։ Երեխաներս միշտ սիրով են սպասում այդ օրերին։ Նրանք օրվա ընթացքում հաճախ խնդրում են, որ միացնեմ այդ ալիքը»։ Ռոզը, որը նույնպես Նիգերիայից է, ասում է. «Ես հեռուստացույցով անընդհատ նորություններն էի նայում, սակայն այժմ դրա փոխարեն «JW Broadcasting» հեռուստաալիքն եմ դիտում և շատ ուրախ եմ։ Երբ նորություններ էի նայում, շատ հաճախ տեսածներիս պատճառով սկսում էի անհանգստանալ, ու արյանս ճնշումը բարձրանում էր։ Բայց մեր հեռուստաալիքը այնքա՜ն քաջալերական է և թարմացնող։ Այն դարձել է իմ սիրելի հեռուստաալիքը։ Սա իրոք Եհովայի օրհնությունն է»։

Մոզամբիկում բնակվող մի շրջանային վերակացու նշեց, որ իր շրջանի Թագավորության սրահներում արբանյակային ալեհավաք տեղադրելուց հետո եղբայրները մեկ ժամից էլ ավելի շուտ են գալիս ժողովի հանդիպման՝ «JW հեռարձակման» հերթական ծրագիրը դիտելու համար։

Մեր արբանյակային ալիքով 9 տարբեր վայրեր հեռարձակվեցին 2019 թ.-ին Յոհաննեսբուրգում (ՀԱՀ) տեղի ունեցած միջազգային համաժողովի գլխավոր ելույթները, այդ թվում՝ Կառավարիչ մարմնի անդամի ելույթը։ Հարավային Աֆրիկայի մասնաճյուղի տեղի հեռարձակման բաժնից եղբայր Սֆումելելեն ասում է. «Նախկինում մենք ինտերնետի միջոցով էինք հեռարձակում ելույթները, սակայն դրա համար հարկավոր էր որակյալ կապ ունենալ, և պետք է լրացուցիչ գումար վճարեինք մեծ ծավալով ինտերնետ օգտագործելու համար։ Մեր արբանյակային ալիքը շատ ավելի մատչելի է և հուսալի»։

Շնորհակալ ենք ձեր առատաձեռն նվիրատվությունների համար, որոնց շնորհիվ Աֆրիկայում բնակվող մեր եղբայրներն ու քույրերը կարող են դիտել «JW հեռարձակման» ծրագրերը արբանյակային հեռուստատեսության միջոցով։ Մենք գնահատում ենք donate.jw.org կայքում առկա տարբեր մեթոդներով կատարած ձեր նվիրատվությունները։