Աթեիստները դուրս են եկել խաչակրաց արշավանքի

ՀԱՍԱՐԱԿՈՒԹՅԱՆ մեջ առաջ է եկել աթեիզմի մի նոր ուղղություն, որը կոչվում է նոր աթեիզմ։ Նրա ներկայացուցիչները չեն բավարարվում համախոհների շրջանում իրենց տեսակետները հայտնելով։ Ընդհակառակը՝ դուրս են եկել խաչակրաց արշավանքի՝ «ակտիվորեն, բարկացած, եռանդագին փորձելով իրենց կողմը քաշել հավատացյալ մարդկանց»,— գրում է լրագրող Ռիչարդ Բերնշտայնը։ Նրանց թիրախն են նույնիսկ ագնոստիկները, քանի որ այս նոր աթեիստները կասկածի տեղ չեն թողնում։ Իրենց կարծիքով՝ Աստված պարզապես չկա և վերջ։

«Աշխարհը պետք է արթնանա կրոն կոչվող երկար մղձավանջից,— ասաց Նոբելյան մրցանակակիր Ստիվեն Վայնբերգը։— Եթե կարող ենք մենք՝ գիտնականներս, որևէ բան անել, որպեսզի թուլացնենք կրոնական ազդեցությունը, պետք է անենք, և դա կարող է լինել մեր մեծագույն ներդրումը քաղաքակրթության զարգացման մեջ»։ Գործիքներից մեկը, որի նպատակն է թուլացնել կրոնի ազդեցությունը՝ գրավոր խոսքն է, որը թվում է՝ բավականին մեծ հետաքրքրություն է արթնացնում մարդկանց մեջ։ Նոր աթեիստների գրքերից մի քանիսն անգամ բեսթսելեր են դարձել։

Կրոնն է նպաստել նոր աթեիզմի առաջացմանը, քանի որ մարդիկ զզվել են կրոնական ծայրահեղականությունից, ահաբեկչությունից և զինված ընդհարումներից, որոնցով ողողված է աշխարհը։ «Կրոնը թունավորում է ամեն բան»,— հայտարարել է աթեիզմի լիդերներից մեկը։ Ավելին, կարծիք կա, որ այդ «թույնի» մեջ մտնում են կրոնական համոզմունքներն ընդհանրապես և ոչ թե միայն ծայրահեղական տեսակետները։ Ըստ նոր աթեիստների՝ հիմնական ուսմունքները պետք է քողազերծել, արմատախիլ անել և փոխարինել բանականությամբ ու տրամաբանությամբ։ Ինչպես գրում է աթեիստ Սեմ Հարիսը, մարդիկ չպետք է վախենան «կյանքը կործանող դատարկաբանությունների» դեմ բացահայտ խոսելուց, որոնք գտնվում են Աստվածաշնչում և Ղուրանում։ «Մենք այլևս չենք կարող այնպիսի ճոխություն թույլ տալ մեզ, ինչպիսին.... քաղաքական շողոքորթությունն է»։

Նոր աթեիստները քննադատում են կրոնը, սակայն խոնարհվում են գիտության առաջ։ Ոմանք նույնիսկ պնդում են, թե այն հերքում է Աստծու գոյությունը։ Արդյոք դա այդպե՞ս է։ Իսկապե՞ս կարող է այն հերքել։ «Իր ժամանակին մի կողմը անպայման կհաղթի այս վիճաբանության մեջ, իսկ մյուսը՝ կպարտվի»,— ասում է Հարիսը։

Քո կարծիքով՝ կողմերից ո՞ր մեկը կհաղթի։ Այս հարցի շուրջ խորհելիս հարցրու ինքդ քեզ. «Ստեղծչին հավատալը իրականում վնասակա՞ր է։ Աշխարհը ավելի լավը կդառնա՞, եթե բոլոր մարդիկ աթեիստներ լինեն»։ Եկեք տեսնենք, թե ինչ են ասել աթեիզմի, կրոնի ու գիտության մասին որոշ հարգված գիտնականներ ու փիլիսոփաներ։