Ազնվություն. հաջողակ լինելու պայման
«Նույնիսկ երբ մարդ առատությամբ ունի, նրա կյանքը կախված չէ իր ունեցվածքից» (Ղուկաս 12։15)։
ԻՆՉ խոսք, փող վաստակելը մեր կյանքի մի մասն է։ Մենք Աստծու առաջ մեծ պատասխանատվություն ենք կրում մեր և մեր ընտանիքի կարիքները հոգալու համար (1 Տիմոթեոս 5։8)։
Սակայն շատերի համար փող վաստակելը և իրեր գնելը կյանքի հիմնական բաները հոգալուց ավելին է։ Փողը անգամ դառնում է մարդկանց կյանքի իմաստը։ Հետևաբար շատ փող ձեռք բերելու համար մարդիկ անազնիվ քայլերի են դիմում։ Իսկ հետո, երբ հասկանում են, որ անազնվության պատճառով զրկվել են իսկական հաջողությունից, շատ ուշ է լինում։ Ինչպես Աստվածաշունչն է նշում, փողասիրությունը բազում ցավերի պատճառ է դառնում (1 Տիմոթեոս 6։9, 10)։
Այժմ քննենք չորս անհատների օրինակներ, որոնց համար հաջողությունը միայն փող վաստակելը և ունեցվածք դիզելը չէ։
Ինքնահարգանք
«Մի քանի տարի առաջ հարցազրույց անցկացրի մեկի հետ, ով ուզում էր մեկ միլիոն դոլարանոց կյանքի ապահովագրության պայմանագիր կապել։ Իմ միջնորդավճարը կազմելու էր հազարավոր դոլարներ։ Սակայն այդ հաճախորդը ասաց, որ իր հետ գործի մեջ մտնելու համար ես պետք է իմ միջնորդավճարի կեսը նրան տամ։ Այդ առաջարկը ոչ միայն էթիկայի կանոններից դուրս էր, այլև անօրինական, ու ես այդ մասին ասացի նրան։
Փորձեցի տրամաբանել նրա հետ ու հարցրի, թե արդյոք նա իր անձնական ու ֆինանսական գաղտնի տեղեկությունները կհայտներ որևէ անազնիվ մարդու։ Հետո նորից նշեցի իմ դիրքորոշումը ու ասացի, որ եթե ուզում է ինձ հետ գործ անել, կարող է զանգահարել։ Ես նրան այդպես էլ չտեսա։
Եթե համաձայնվեի, իմ բարի համբավի վրա բիծ կբերեի և որպես քրիստոնյա կկորցնեի ինքնահարգանքս։ Ես կդառնայի այդ մարդու ստրուկը և կօգտագործվեի նրա խարդախ ծրագրերի մեջ» (Դոն, ԱՄՆ)։
Մտքի խաղաղություն
Ինչպես նշվեց սկզբում, Դենիին մեծ կաշառք առաջարկվեց այն պայմանով, որ նա սուտ խոսի։ Ինչպե՞ս նա վարվեց։
«Ես շնորհակալություն հայտնեցի այդ անձնավորությանը ճաշի հրավիրելու համար և վերադարձրի ծրարը։ Նա շարունակեց համոզել ինձ ու ասաց, որ եթե իրենց գործարանը արդարացնի իրեն, ավելի շատ փող կտա ինձ։ Ես հրաժարվեցի։
Եթե վերցնեի գումարը, մշտապես վախի մեջ կլինեի՝ մտածելով, որ մի օր ամեն բան ջրի երես դուրս կգա։ Հետո գործատերս ինչ-որ ձևով իմացել էր տեղի ունեցածի մասին։ Ես շատ ուրախ էի ու հանգիստ, որ անազնիվ չեմ եղել։ Այդ պահին միտքս եկավ Առակներ 15։27-ը. «Անարդար եկամուտ ձեռք բերողը փորձանք է բերում իր տան վրա, բայց նվերներ [կամ՝ կաշառք] ատողը կապրի»» (Դենի, Հոնկոնգ)։
Ընտանեկան երջանկություն
«Ես շինարարական ձեռնարկություն ունեմ։ Ինչ խոսք, շատ առիթներ կան հաճախորդներին խաբելու կամ հարկերից խուսափելու համար։ Բայց ես ու ընտանիքս մեծ օգուտներ ենք ստացել, այն բանի շնորհիվ, որ վճռել եմ ազնիվ մնալ։
Ազնիվ լինում են ոչ միայն աշխատանքում կամ բիզնեսում, այլև ողջ կյանքի ընթացքում։ Երբ գիտես, որ ամուսինդ կամ կինդ ազնվության հարցում չի ոտնահարի Աստծու չափանիշները, ավելի շատ ես վստահում նրան։ Կողակիցդ էլ ապահովության զգացում ունի՝ իմանալով, որ մաքուր մնալը քեզ համար այնպիսի բան չէ, որ հագնես, երբ հարմար է, հետո հանես։
Դու կարող ես լինել աշխարհի ամենամեծ բիզնեսմենը, բայց չկարողանաս գնել ընտանեկան խաղաղություն։ Որպես Եհովայի վկա՝ հասկացել եմ, որ աստվածաշնչային սկզբունքներին հետևելը օգնում է կյանքում լինելու հավասարակշռված։ Ես միշտ ժամանակ ունեմ ընտանիքիս համար ու այս աշխարհի դուդուկի տակ չեմ պարում՝ ընկնելով փողի և ագահության հետևից» (Դարվին, ԱՄՆ)։
Աստծու հետ լավ փոխհարաբերություն
«Ես ապրանքներ եմ գնում այն ընկերության համար, որտեղ աշխատում եմ։ Զեղչերի ժամանակ վաճառողները առաջարկում են ընկերությանը ներկայացնել ապրանքի լրիվ գինը, իսկ զեղչի գումարը պահել ինձ։ Բայց դա կնշանակի գողանալ ընկերության փողերը։
Աշխատավարձս այդքան էլ մեծ չէ և, ինչ խոսք, լրացուցիչ փողից չէի հրաժարվի։ Բայց ոչինչ չի կարող փոխարինել մաքուր խղճին և Եհովա Աստծու հավանությունը ունենալուն։ Այդ պատճառով բոլոր գործարքներում հետևում եմ այն սկզբունքին, որը գրված է Եբրայեցիներ 13։18-ում. «Ուզում ենք ամեն ինչում ազնվությամբ վարվել»» (Ռաքել, Ֆիլիպիններ)։
[շրջանակ 9-րդ էջի վրա]
Սկզբունքներ, որոնք կօգնեն բիզնեսում լինելու ազնիվ
Տարբեր երկրներում բիզնեսի ոլորտում ընդունված էթիկայի կանոնները տարբեր են։ Սակայն աստվածաշնչային սկզբունքները կարող են հիմք ծառայել նման հարցերում։ Բիզնեսում ազնիվ լինելու համար հարկավոր է հետևել ներքոհիշյալ վեց սկզբունքներին։
Ճշմարտախոս
Սկզբունք. «Մի՛ ստեք իրար» (Կողոսացիներ 3։9)։
Վստահելի
Սկզբունք. «Թող ձեր «այո»- ն այո լինի, և «ոչ»- ը՝ ոչ» (Մատթեոս 5։37)։
Գաղտնապահ
Սկզբունք. «Մտերմիկ զրույցում ասվածը մի՛ հայտնիր» (Առակներ 25։9)։
Ազնիվ
Սկզբունք. «Կաշառք չվերցնես, որովհետև կաշառքը կուրացնում է պարզ տեսողություն ունեցողներին» (Ելք 23։8)։
Արդար
Սկզբունք. «Ուրեմն այն, ինչ ուզում եք, որ մարդիկ ձեզ անեն, նույնը դուք արեք նրանց» (Մատթեոս 7։12)։
Օրինապահ
Սկզբունք. «Ամեն մեկին տվեք իր հասանելիքը. որին պետք է հարկ տալ՝ հարկը» (Հռոմեացիներ 13։7)։
[շրջանակ/նկարներ 9-րդ էջի վրա]
Ինչպես լավ անուն ունենալ բիզնեսում
● Առաջնահերթություններ դիր։ Քեզ համար ո՞րն է կարևոր՝ հարստություն ձեռք բերե՞լը, թե՞ Աստծու առաջ լավ անուն ունենալը։
● Նախապես մտածիր։ Պատկերացրու իրավիճակներ, որոնց ժամանակ դժվար կլինի ազնիվ մնալ և մտածիր, թե ինչպես ես վարվելու։
● Քո դիրքորոշումը հայտնի դարձրու։ Հենց սկզբից նրբանկատորեն ասա ուրիշներին քո չափանիշների մասին։
● Խորհուրդ հարցրու։ Երբ փորձության ես բախվում կամ չգիտես, թե ինչպես վարվել, խորհուրդ հարցրու մեկից, ով ունի նույն արժեքները, ինչ դու։
[նկար 8-րդ էջի վրա]
Եթե ազնիվ լինես, մտքի խաղաղություն կունենաս