2. Մաքրություն պահպանիր

ԻՆՉՊԵՍ վիրաբույժն է պաշտպանում իր հիվանդներին՝ ձեռքերը լվանալով, իր գործիքները մանրէազերծելով և վիրահատարանը մաքուր վիճակում պահելով, այնպես էլ դու կարող ես պաշտպանել քո ընտանիքը՝ քեզ, քո խոհանոցը և մթերքը մաքուր պահելով։

● Ձեռքերդ լվա

Կանադայի առողջապահության նախարարությունը նշում է, որ «սովորական վարակիչ հիվանդությունների 80 տոկոսը, օրինակ՝ մրսածություն կամ գրիպ, տարածվում է ձեռքերի միջոցով»։ Հետևաբար կարևոր է ուտելուց առաջ, զուգարանից օգտվելուց հետո կամ ճաշ պատրաստելիս օճառով լավ լվանալ ձեռքերը։

● Խոհանոցդ մաքուր պահիր

Մի ուսումնասիրություն ցույց է տվել, որ թեև ընդունված է տան մեջ ավելի շատ մաքուր պահել զուգարանը, սակայն «ամենաշատ բակտերիաները գտնվում են խոհանոցի սպունգի կամ լաթերի վրա»։

Հետևաբար հաճախակի փոխիր սպունգը կամ լաթերը, օճառով ու տաք ջրով մաքրիր կամ ախտահանիր խոհանոցային պարագաներն ու մակերեսները։ Ինչ խոսք, գուցե միշտ հնարավոր չլինի այսպես անել։ Բոլա անունով մի կին ապրում է այնպիսի տան մեջ, որտեղ հոսող ջուր չկա։ Նա ասում է. «Դա մեծ խնդիր է, բայց մենք ամեն ինչ անում ենք, որ օճառն ու ջուրը միշտ լինեն, որպեսզի խոհանոցը և տունը մաքուր պահենք»։

● Մթերքը լվա

Նախքան սննդամթերքը վաճառքի հանելը հնարավոր է՝ այն աղտոտվի ջրի, կենդանիների, կղանքային բակտերիաների կամ հում մթերքին առնչվող պարագաների պատճառով։ Դրա համար լավ լվա մրգերն ու բանջարեղենը՝ հեռացնելով վնասակար բակտերիաները, նույնիսկ այն դեպքում, եթե պետք է կճպես միրգը կամ բանջարեղենը։ Սա, ինչ խոսք, ժամանակատար է։ Բրազիլիայում ապրող մի մայր՝ Դայանան, ասում է. «Երբ սալաթ եմ պատրաստում, փորձում եմ չշտապել, որպեսզի կարողանամ լավ լվանալ կանաչեղենը»։

● Առանձնացրու հում միսը

Բակտերիաների տարածումը կանխելու համար հում միսը, թռչնամիսը և ձուկը փակ պահիր ու այլ մթերքներից առանձնացրու։ Տարբեր տախտակներ և տարբեր դանակներ օգտագործիր։ Կամ հում միս և ձուկ կտրատելուց առաջ ու հետո օճառով և տաք ջրով լավ լվա տախտակը և դանակը։

Այժմ, երբ դու, քո գործիքները և պարագաները մաքուր են, տեսնենք, թե ինչպես կարող ես զգուշորեն պատրաստել ու պահել կերակուրը։

[շրջանակ 5-րդ էջի վրա]

ՍՈՎՈՐԵՑՐՈՒ ԵՐԵԽԱՆԵՐԻԴ «Մենք մեր երեխաներին սովորեցնում ենք ուտելուց առաջ լվանալ ձեռքերը, իսկ գետին ընկած ուտելիքը լվանալ կամ գցել» (Հոյ, Հոնկոնգ)։