Ի՞նչ է ասում Աստվածաշունչը

Տիեզերքը միշտ եղե՞լ է

Ծննդոց 1։1-ում ասվում է. «Սկզբում Աստված ստեղծեց երկինքն ու երկիրը»։

Մինչև 20-րդ դարի կեսը բազմաթիվ ականավոր գիտնականներ մտածում էին, որ տիեզերքը միշտ գոյություն է ունեցել։ Բայց հիմնվելով վերջին բացահայտումների վրա՝ գիտնականների մեծ մասը ներկայումս ընդունում է, որ տիեզերքը սկիզբ է ունեցել։

Սկզբում երկիրը ի՞նչ տեսք է ունեցել

Ծննդոց 1։2, 9 համարներում նկարագրվում է, որ սկզբում երկիրը «անձև ու դատարկ էր» և պատված էր ջրով։

Այս նկարագրությունը համահունչ է գիտական ժամանակակից ուսումնասիրություններին։ Կենսաբան Պատրիկ Շին ասում է, որ սկզբում «մթնոլորտը թթվածնից զուրկ էր՝ շնչելու համար անպիտան.... [մեր մոլորակն] ասես գիտաֆանտաստիկ պատմվածքից լիներ»։ Իսկ աստղագիտության մասին մի ամսագրում ասվում է. «Ըստ վերջին հետազոտությունների՝ սկզբնական շրջանում երկիրը գրեթե ամբողջությամբ ջրով էր ծածկված» (Astronomy)։

Ինչպե՞ս է ժամանակի ընթացքում մեր մթնոլորտը փոխվել

Ծննդոց 1։3–5-ում նշվում է, որ երբ լույսը սկսեց ներթափանցել մթնոլորտ, լույսի աղբյուրը երկրի վրայից դեռ չէր երևում։ Միայն որոշ ժամանակ հետո արևն ու լուսինը հստակ տեսանելի դարձան երկրից (Ծննդոց 1։14–18)։

Շրջակա միջավայրի ուսումնասիրության մի կենտրոնի հետազոտությունների համաձայն՝ սկզբում մթնոլորտը թույլ էր տալիս, որ միայն ցրված լույսը հասնի երկիր։ Այնտեղ նշվում է. «Երկիրը ամբողջովին պատված էր մեթանային թանձր մշուշով»։ Հետագայում «մեթանային շերտը ցրվեց, և սկսեց երևալ կապույտ երկինքը» (Smithsonian Environmental Research Center)։

Ի՞նչ հաջորդականությամբ է առաջ եկել կյանքը

Ծննդոց 1։20–27-ում ասվում է, որ սկզբում ստեղծվել են ձկները, թռչունները, ցամաքային կենդանիները, իսկ վերջում՝ մարդիկ։ Գիտնականները նշում են, որ առաջին ձկները առաջին կաթնասուններից ավելի շուտ են առաջ եկել, իսկ մարդիկ՝ շատ ավելի ուշ։

Թվացյալ հակասություններ

Որոշ մարդիկ պնդում են, որ Աստվածաշնչի արձանագրությունը չի համապատասխանում ժամանակակից գիտական բացահայտումներին։ Բայց նման պնդումների պատճառը հաճախ այն է, որ մարդիկ ճիշտ չեն հասկանում Աստվածաշնչի ասածները։

Աստվածաշունչը չի ասում, որ տիեզերքը և երկիրը ընդամենը 6 000 տարեկան են։ Դրա փոխարեն՝ այն պարզապես ասում է, որ երկիրն ու տիեզերքը ստեղծվել են «սկզբում» (Ծննդոց 1։1)։ Աստվածաշունչը չի նշում, թե դա կոնկրետ որքան ժամանակ առաջ է եղել։

Աստվածաշունչը չի ասում, որ երկրի վրա կյանքը ստեղծվել է 24-ժամյա 6 օրերում։ Այն օգտագործում է «օր» բառը որոշակի ժամանակահատված ցույց տալու համար։ Օրինակ՝ «Ծննդոց» գրքի 1-ին գլխում ասվում է, որ ստեղծագործական 6 օրերի ընթացքում երկրի ու դրա վրա գոյություն ունեցող կյանքի արարումը տեղի է ունեցել մի ժամանակահատվածում, որը նկարագրվում է որպես մեկ օր՝ «այն օրը, երբ Եհովաa Աստված արարեց» երկինքն ու երկիրը (Ծննդոց 2։4)։ Ուստի ստեղծագործական 6 «օրերը», որոնց ընթացքում Աստված երկրի վրա կյանքի համար անհրաժեշտ պայմաններ է ստեղծել, այնուհետև արարել է կյանքը, կարող են բավականին երկար ժամանակահատված մատնանշել։

Աստվածաշունչը չի ասում, որ կենդանի օրգանիզմները ժամանակի ընթացքում չեն կարող փոփոխության ենթարկվել։ «Ծննդոց» գրքում ասվում է, որ կենդանիները ստեղծվել են «ըստ իրենց տեսակի» (Ծննդոց 1։24, 25)։ Աստվածաշնչում օգտագործված «տեսակ» բառը գիտական տերմին չէ, այն վերաբերում է կենդանի օրգանիզմների խմբերի։ Ընդամենը մի «տեսակը» կարող է ներառել կենսաբանական բազմաթիվ տեսակներ։ Սա ցույց է տալիս, որ հնարավոր է՝ «տեսակի» մեջ փոփոխություններ լինեն, այսինքն՝ ժամանակի ընթացքում նույն տարածքում եղող նույն տեսակի առանձնյակների հատկանիշները փոփոխվեն։

Ի՞նչ եք կարծում

Ինչպես արդեն նշվեց, տիեզերքի առաջացման, երկրի սկզբնական վիճակի և կյանքի ծագման մասին Աստվածաշունչը պարզ և ճշգրիտ նկարագիր է տալիս։ Իսկ գուցե այն նաև հայտնում է, թե ով է կանգնած այս ամենի ետևում։ «Այն գաղափարը, որ կյանքն առաջացել է գերբնական միջամտությամբ, ընդհանուր առմամբ, չի հակասում ժամանակակից գիտական տեղեկություններին»,— ասվում է «Բրիտանական հանրագիտարանում» (Encyclopædia Britannica)։b