Գլուխ 131

Հայտնվում է վերջին անգամ. մ. թ. 33–ի Պենտեկոստեն

ՀԻՍՈՒՍԸ իր 11 առաքյալների հետ պայմանավորվում է հանդիպել Գալիլեայի լեռներից մեկի մոտ։ Հավանաբար, մյուս աշակերտներին նույնպես տեղեկացնում են այդ հանդիպման մասին, քանի որ հավաքվում է ավելի քան 500 մարդ։ Որքա՜ն են նրանք ուրախանում, երբ հայտնվում է Հիսուսը և սկսում է նրանց սովորեցնել։

Այլ բաների թվում Հիսուսը այդ մեծ բազմությանը բացատրում է նաև, որ Աստված երկնքում և երկրի վրա ամբողջ իշխանությունը իրեն է տվել։ «Ուրեմն գնացե՛ք,— հորդորում է նա,— և բոլոր ազգերի մարդկանցից աշակերտնե՛ր դարձրեք՝ մկրտելով նրանց Հոր և Որդու և սուրբ ոգու անունով, սովորեցնելով նրանց պահել այն ամենը, ինչ որ ձեզ պատվիրեցի»։

Խորհի՛ր այս մասին։ Աշակերտներ պատրաստելու հանձնարարությունը բոլորն են ստանում. տղամարդիկ, կանայք և երեխաները։ Հակառակորդները կփորձեն դադարեցնել քարոզելու և ուսուցանելու գործը, սակայն Հիսուսը մխիթարում է նրանց. «Ահա ես ձեզ հետ եմ բոլոր օրերում՝ մինչև իրերի համակարգի վախճանը»։ Հիսուսը իր հետևորդների հետ մնում է սուրբ ոգու միջոցով, որպեսզի օգնի նրանց կատարելու իրենց ծառայությունը։

Հարություն առնելուց հետո Հիսուսը 40 օրվա ընթացքում երևում է իր աշակերտներին։ Այդ օրերին նա սովորեցնում է Աստծու Թագավորության մասին և բացատրում է, թե որպես իր աշակերտներ՝ նրանք ինչ պարտականություններ ունեն։ Մի անգամ նա նույնիսկ հայտնվում է իր եղբորը՝ Հակոբոսին, և վերջինս, որը մի ժամանակ չէր հավատում, որ Հիսուսը Քրիստոսն է, այժմ համոզվում է դրանում։

Մինչ առաքյալները գտնվում են Գալիլեայում, Հիսուսն, ըստ երևույթին, պատվիրում է նրանց գնալ Երուսաղեմ։ Երբ այնտեղ հանդիպում է նրանց, ասում է. «Երուսաղեմից մի՛ հեռացեք, այլ սպասեք այն բանին, որը Հայրը խոստացավ, և որի մասին դուք ինձանից լսեցիք, որովհետև Հովհաննեսը իրականում ջրով մկրտեց, բայց դուք, շատ օրեր չանցած, սուրբ ոգով պիտի մկրտվեք»։

Հետագայում Հիսուսը նորից է հանդիպում իր առաքյալներին և նրանց տանում է մինչև Բեթանիա, որը գտնվում է Ձիթենյաց լեռան արևելյան լանջին։ Զարմանալի է. թեպետ Հիսուսն ասել է, որ շուտով համբարձվելու է երկինք, այնուամենայնիվ, առաքյալները դեռ կարծում են, թե Թագավորությունը պետք է հաստատվի երկրի վրա։ Ուստի նրանք հարցնում են. «Տե՛ր, Իսրայելի համար թագավորությունը այս ժամանակո՞ւմ ես վերականգնելու»։

Փոխանակ դարձյալ ուղղելու նրանց սխալ տեսակետը՝ Հիսուսը պարզապես պատասխանում է. «Ձեզ տրված չէ ժամանակները կամ ժամանակահատվածները իմանալ, որոնք Հայրը իր իշխանության տակ դրեց»։ Ապա ևս մեկ անգամ ցույց տալով, թե նրանք ինչ գործ պետք է անեն՝ ասում է. «Բայց դուք զորություն կստանաք, երբ սուրբ ոգին գա ձեզ վրա, և իմ վկաները կլինեք Երուսաղեմում և ամբողջ Հրեաստանում ու Սամարիայում և մինչև երկրի ամենահեռավոր վայրը»։

Մինչ նրանք նայում են, Հիսուսը սկսում է բարձրանալ երկինք, և մի ամպ նրան ծածկում է նրանց տեսողությունից։ Հիսուսի ֆիզիկական մարմինը անէանում է, և նա երկինք է համբարձվում որպես ոգեղեն անձնավորություն։ Մինչ 11 առաքյալները շարունակում են երկինք նայել, սպիտակ հանդերձներով երկու տղամարդ հայտնվում են նրանց կողքին։ Այս մարմնավորված հրեշտակները հարցնում են. «Ո՛վ գալիլեացի մարդիկ, ինչո՞ւ եք կանգնել ու նայում երկնքին։ Այս Հիսուսը, որ ձեզանից երկինք վերցվեց, նույն ձևով պիտի գա, ինչպես որ տեսաք նրան երկինք գնալիս»։

Հիսուսը երկրից չհեռացավ մեծ բազմության աչքի առաջ. ներկա էին միայն նրա հավատարիմ հետևորդները։ Ուստի նա այդպես էլ կվերադառնա. միայն նրա հավատարիմ հետևորդները կհասկանան, որ նա վերադարձել է և ներկա է իր թագավորական իշխանությամբ։

Առաքյալներն իջնում են Ձիթենյաց լեռան վրայից, անցնում են Կեդրոն հեղեղատը և դարձյալ մտնում Երուսաղեմ։ Նրանք, հնազանդվելով Հիսուսի պատվերին, մնում են այնտեղ։ Տասը օր անց, երբ մ. թ. 33–ի Պենտեկոստեն՝ հրեաների տոնը, դեռ ընթացքի մեջ է, և 120 աշակերտները Երուսաղեմում հավաքված են վերնասենյակում, հանկարծ մի աղմուկ է լսվում՝ սաստիկ հողմից եկող ձայնի նման, և լցնում է ամբողջ տունը։ Կրակե լեզուներ են երևում ու իջնում են ներկաներից յուրաքանչյուրի վրա, և աշակերտները սկսում են տարբեր լեզուներով խոսել։ Դա սուրբ ոգու վերաբերյալ Հիսուսի տված խոստման կատարումն է։ Մատթեոս 28։16–20; Ղուկաս 24։49–52; 1 Կորնթացիներ 15։5–7; Գործեր 1։3–15; 2։1–4։

▪ Ովքե՞ր են ներկա Գալիլեայի մի լեռան մոտ, և Հիսուսը ի՞նչ հրահանգներ է տալիս նրանց։

▪ Ինչպե՞ս է Հիսուսը մխիթարում իր աշակերտներին, և ինչպե՞ս է նա մնալու նրանց հետ։

▪ Հարություն առնելուց հետո Հիսուսը որքա՞ն ժամանակ է հայտնվում իր աշակերտներին և ի՞նչ է սովորեցնում նրանց։

▪ Հիսուսը ո՞ւմ է հայտնվում, որն, ակներևաբար, մինչև նրա մահանալը չէր հավատում, որ նա է Քրիստոսը։

▪ Ինչպե՞ս է Հիսուսը երկու անգամ հանդիպում իր առաքյալներին, և ի՞նչ է պատահում այս վերջին հանդիպումների ժամանակ։

▪ Ի՞նչ է նշանակում այն, որ Հիսուսը վերադառնալու է այն նույն ձևով, ինչպես որ հեռացավ։

▪ Ի՞նչ է պատահում մ. թ. 33–ի Պենտեկոստեին։