ԿԱՐԻԱԿԱՆ ԹԻԿՆԱՊԱՀՆԵՐ

Զինվորական ջոկատներ, որոնք օգնեցին Հովիադային գահընկեց անել Գոթողիային և Հովասին դարձնել Հուդայի թագավոր (2Թգ 11։4, 13-16, 19)։

Շատ աստվածաշնչագետների կարծիքով՝ «կարիական թիկնապահներ» արտահայտությունը քերեթցիների մեկ այլ անվանումն է։ Քերեթցիները ծառայում էին Դավթի և Սողոմոնի զինված ուժերում։ Իսկ որոշ աստվածաշնչագետներ կարծում են, որ քերեթցիները նաև այդ թագավորների անձնական թիկնապահներն էին (2Սմ 8։18; 1Թգ 1։38; 1Տգ 18։17)։ Այդ տեսակետին թիկունք է կանգնում նաև այն, որ թեև մասորեթական տեքստում 2 Սամուել 20։23-ում գրված է «կարիական թիկնապահներ», սակայն լուսանցքում, ինչպես նաև եբրայերեն բազմաթիվ ձեռագրերում գրված է «քերեթցիներ»։

Փոքր Ասիայի հարավ-արևմուտքում գտնվում է Կարիա պատմական մարզը։ Քանի որ Եզեկիել 25։16-ում և Սոփոնիա 2։5-ում քերեթցիներն ու փղշտացիները միասին են հիշատակվում, և հունարեն «Յոթանասնից»-ում այս համարներում «քերեթցիներ» բառի փոխարեն գրված է «կրետացիներ», ոմանք կարծում են, որ կարիական թիկնապահները ծագումով Կարիա մարզից էին, բայց Քանան գաղթել էին Կրետեից։