Ընտանիքով կանոնավորաբար ուսումնասիրե՛ք Աստծո Խոսքը
«Միայն հացով չի ապրի մարդ, այլ՝ այն ամէն խօսքով, որ դուրս է գալիս Աստծու բերանից» (Մատթէոս 4։4)։
1. Աստվածաշունչն ի՞նչ է ասում ընտանիքի գլխին Եհովայի ճանապարհները երեխաներին սովորեցնելու նրա պարտականության մասին։
ԵՀՈՎԱ ԱՍՏՎԱԾ ընտանիքի գլխին հաճախ է երեխաներին խրատելու հարցում նրա կրած պարտականությունների մասին հիշեցումներ տվել։ Այդպիսի հիշեցումները երեխաներին անհրաժեշտ գիտելիքներ էին տալիս և նախապատրաստում էին նրանց ինքնուրույն կյանքի։ Աբրահամի առջև Աստծուն ներկայացնող հրեշտակը խոսեց այն պարտականության մասին, որը Աբրահամը պետք է կատարեր իր ընտանիքի հանդեպ, այն է՝ սովորեցնել տան անդամներին, որ ‘պահեն Եհովայի ճանապարհը’ (Ծննդոց 18։19)։ Իսրայելացի ծնողներին հրահանգ էր տրված պատմել իրենց երեխաներին այն մասին, թե ինչպես Աստված ազատագրեց նրանց Եգիպտոսից և ինչպես Սինայ լեռան մոտ՝ Քորեբում, տվեց իր Օրենքը (Ելից 13։8, 9; Բ Օրինաց 4։9, 10; 11։18—21)։ Ինչ վերաբերում է քրիստոնյա ընտանիքներին, ապա այստեղ ևս տան գլուխներին հորդոր է տրվում զավակներին մեծացնել «Տիրոջ խրատով եւ ուսումով» (Եփեսացիս 6։4)։ Նույնիսկ եթե ծնողներից միայն մեկն է ծառայում Եհովային, նա պետք է իր ողջ ուժերը ներդնի երեխաներին Եհովայի ճանապարհները սովորեցնելու համար (Բ Տիմոթէոս 1։5; 3։14, 15)։
2. Արդյո՞ք ընտանեկան ուսումնասիրության անհրաժեշտությունը միայն երեխաներ ունեցող ընտանիքներին է վերաբերում։
2 Սա չի նշանակում, որ Աստվածաշնչի ընտանեկան ուսումնասիրություն անցկացնելու խորհուրդը վերաբերվում է միայն այն ընտանիքներին, որտեղ երեխաներ կան։ Երբ ամուսինն ու կինը ընտանեկան ուսումնասիրություն են անցկացնում նույնիսկ այն դեպքում, երբ տանը երեխաներ չկան, դա խոսում է հոգևորի հանդեպ նրանց երախտագիտության մասին (Եփեսացիս 5։25, 26)։
3. Ինչո՞ւ է կարևոր կանոնավորությունը ընտանեկան ուսումնասիրությունն անցկացնելու հարցում։
3 Որպեսզի հասնենք լավագույն արդյունքների, հարկավոր է կանոնավոր ուսումնասիրություն անցկացնել՝ հիշելով այն խրատը, որը ժամանակին անապատում իսրայելացիներին տվեց Եհովան. «Ոչ միայն հացով կ’ապրէ մարդ, այլ մարդը Եհովայի բերանից դուրս եկած ամեն բանով կ’ապրէ» (Բ Օրինաց 8։3)։ Ընտանիքի հանգամանքներից կախված՝ ոմանց ընտանեկան ուսումնասիրությունը տեղի է ունենում շաբաթը մեկ անգամ, ուրիշներինը կարող է ամեն օր լինել, բայց ավելի կարճ տևողությամբ։ Ինչպես էլ որ ծրագրեք ձեր նպատակն իրագործել, թույլ մի՛ տվեք, որ ուսումնասիրություններն անցկացվեն հանգամանքների բերումով։ «Ժամանակը ծախու առէք»։ Իսկ դրա համար անհրաժեշտ վճարը ջանքերի ողջամիտ ներդրումն է. հիշեք, որ ձեր ընտանիքի անդամների կյանքը վտանգի տակ է... (Եփեսացիս 5։15—17, Արևմտահայերեն Աստվածաշունչ; Փիլիպպեցիս 3։16)։
Նպատակակետեր, որոնք մտապահել է անհրաժեշտ
4, 5. ա) Երեխաների դաստիարակության գործում Եհովան Մովսեսի միջոցով ի՞նչ կարևոր պարտականություն դրեց ծնողների առջև։ բ) Ի՞նչ է դա իր մեջ բովանդակում մեր օրերում։
4 Ընտանեկան ուսումնասիրություն անցկացնելիս լավագույն արդյունքների հասնելու համար հարկավոր է մտքում ունենալ որոշակի նպատակակետեր։ Եկեք քննարկենք հնարավոր նպատակակետերից մի քանիսը։
5 Յուրաքանչյուր ուսումնասիրության ժամանակ աշխատեք ամրապնդել երեխաների սերը դեպի Եհովան։ Երբ իսրայելացիները Խոստացյալ երկիր մտնելուց առաջ հավաքվել էին Մովաբի հարթավայրում, Մովսեսը նրանց ուշադրությունը հրավիրեց մի պատվիրանի վրա, որն ավելի ուշ Հիսուս Քրիստոսի կողմից համարվեց Օրենքի պատվիրաններից ‘մեծագույնը’։ Ո՞ր պատվիրանն էր դա։ «Սիրիր քո Եհովայ Աստուծուն բոլոր սրտովդ, բոլոր հոգիովդ եւ բոլոր զօրութիւնովդ» (Մատթէոս 22։36, 37; Բ Օրինաց 6։5)։ Մովսեսը պատվիրեց իսրայելացիներին պահել այդ խոսքերն իրենց սրտերում և նույնը սովորեցնել իրենց զավակներին։ Այդ անելու համար հարկավոր էր, որ իսրայելացի ծնողներն այդ խոսքերը շարունակ կրկնեին իրենց երեխաների հետ, բացատրեին, թե որոնք էին Եհովային սիրելու պատճառները, սովորեցնեին խուսափել այնպիսի մտածելակերպից և վարվելակերպից, որոնք կխանգարեին ցույց տալ իրենց սերը դեպի Եհովան։ Մի՞թե մեր երեխաները միևնույն դաստիարակության կարիքը չունեն։ Անշուշտ, ունե՛ն։ Նրանք նույնպես պետք է ‘թլփատվեն իրենց սրտերի անթլփատությունից’, այսինքն՝ հեռացնեն իրենցից ամեն բան, ինչը խոչընդոտում է նրանց սիրել Աստծուն (Բ Օրինաց 10։12, 16; Երեմիա 4։4)։ Այդպիսի արգելքների թվին են պատկանում աշխարհին հատուկ բաներ ձեռք ձգելու տենչը, նրա գործերին մասնակցելու հնարավորություններ փնտրելը (Ա Յովհաննէս 2։15, 16)։ Սերը դեպի Եհովան պետք է լինի գործուն, արտահայտիչ, այն պետք է մղի մեզ մեր երկնային Հոր համար հաճելի գործեր կատարելու (Ա Յովհաննէս 5։3)։ Որպեսզի ձեր ընտանեկան ուսումնասիրությունը երկարատև օգուտներ բերի, ամեն անգամ նպատակ դրեք ամրացնել Եհովայի հանդեպ երեխաների ունեցած սերը։
6. ա) Ի՞նչ է անհրաժեշտ ճշգրիտ գիտություն տալու համար։ բ) Ինչպե՞ս են Գրություններն ընդգծում ճշգրիտ գիտության կարևորությունը։
6 Աստծո պահանջների մասին ճշգրիտ գիտելիքներ տվեք։ Սա իր մեջ ի՞նչ է ընդգրկում։ Բավական չէ ամսագրից կամ գրքից հարցի պատասխանն ընթերցել։ Սովորաբար հարկ է լինում քննարկել նյութը՝ համոզվելու համար, որ իմաստային բառերը և սկզբունքային գաղափարները երեխաները լրիվ ընկալել են։ Ճշգրիտ գիտություն ստանալը անչափ կարևոր է նոր անձնավորությունը «հագնելու», կյանքում պրոբլեմների հետ բախվելիս ուշադրության կենտրոնում իսկապես հիմնական բաները պահելու մեջ, ուստի և այն հարցում, թե ինչ է հարկավոր անել Աստծուն հաճեցնելու համար (Փիլիպպեցիս 1։9—11; Կողոսացիս 1։9, 10; 3։10)։
7. ա) Ո՞ր հարցերի օգնությամբ ընտանիքը կարող է գործնականում կիրառել ուսումնասիրվող նյութը։ բ) Գրություններն ինչպե՞ս են արժեքավորում այդ նպատակը։
7 Օգնեք գործնականում կիրառել սովորածը։ Այս նպատակն առջևում ունենալով՝ ուսումնասիրությունների ժամանակ հարցրեք. «Ինչպե՞ս պետք է այս նյութը ազդի յուրաքանչյուրիս կյանքի վրա։ Արդյո՞ք որևէ բան փոխելու կարիք զգացվում է։ Ինչո՞ւ են փոփոխություններն անհրաժեշտ» (Առակաց 2։10—15; 9։10; Եսայիա 48։17, 18)։ Մեր ընտանիքի անդամների հոգևոր աճն ապահովելու համար կարևոր հանգամանք է սովորածը գործնականում կիրառելուն բավականաչափ ուշադրություն դարձնելը։
Խելացիորեն օգտվեցեք սովորեցնելու օժանդակ միջոցներից
8. Ինչպիսի՞ օժանդակ միջոցներով է ծառայի դասակարգը մեզ ապահովում։
8 «Հաւատարիմ եւ իմաստուն ծառան» մեզ ապահովում է ուսումնասիրության համար անհրաժեշտ բազմաթիվ օժանդակ միջոցներով։ Աստվածաշնչի հետ միասին օգտագործվող «Դիտարան» ամսագիրը լույս է տեսնում 131 լեզուներով։ Աստվածաշնչի ուսումնասիրության համար գոյություն ունեն գրքեր՝ 153 լեզուներով, բրոշյուրներ՝ 284 լեզուներով թարգմանված, ձայներիզներ, որոնք մատչելի են 61, իսկ տեսաերիզները՝ 41 լեզուներով. գոյություն ունի նույնիսկ Աստվածաշունչը հետազոտելու համար նախատեսված համակարգչային ծրագիր (research)՝ 9 լեզուներով (Մատթէոս 24։45—47)։
9. «Դիտարանի» ընտանեկան ուսումնասիրության ժամանակ ինչպե՞ս կարող եք կիրառել այս պարբերության մեջ վկայակոչված Գրությունների համարներից բխող խորհուրդը։
9 Շատերն ընտանեկան ուսումնասիրության ժամանակ նախապատրաստվում են ժողովի «Դիտարանի» ուսումնասիրությանը։ Այս սովորությունը շատ օգուտներ կարող է բերել։ «Դիտարանը» պարունակում է այն գլխավոր հոգևոր կերակուրը, որից օգտվում է համայն աշխարհում սփռված Եհովայի ժողովուրդը հոգևորապես կազդուրվելու համար։ Երբ ընտանիքով ուսումնասիրում եք «Դիտարանը», մի՛ բավարարվեք միայն պարբերությունները կարդալով և տրված հարցերին պատասխանելով։ Փորձեք ըմբռնել այնտեղ ամփոփված մտքերը։ Ժամանակ հատկացրեք Գրությունների այն համարներն ընթերցելուն, որոնք նշված են թեմայում, սակայն մեջբերված չեն։ Լավ կլիներ, որ ընտանիքի անդամները մեկնաբանություններ տային այն մասին, թե այդ համարներն ինչպես են կապված պարբերության մեջ քննարկվող նյութի հետ։ Ուշադիր եղեք, որպեսզի բոլորը մասնակցեն քննարկմանը։ Փորձեք հասնել յուրաքանչյուրի սրտին (Առակաց 4։7, 23; Գործք 17։11)։
10. Ի՞նչ կարելի է անել փոքրերին ուսումնասիրության մեջ ներգրավելու և այդ ժամանակն ուրախ անցկացնելու համար։
10 Եթե տանը երեխաներ կան, ի՞նչ կարող եք անել, որպեսզի ուսումնասիրությունը ոչ թե զուտ ընտանեկան առօրյա բնույթ կրի, այլ լինի շինիչ և հետաքրքիր, ուրախ մթնոլորտում անցնի։ Ջանացեք բոլորին ընդգրկել ուսումնասիրության մեջ այնպես, որ յուրաքանչյուրի ուշադրությունը կենտրոնացված լինի ուսումնասիրվող նյութի վրա։ Եթե հնարավոր է, հոգ տարեք, որ ձեր երեխաներից ամեն մեկն ունենա իր անձնական Աստվածաշունչը և ուսումնասիրվող ամսագիրը։ Հայրը կամ մայրը կարող են փոքրիկին նստեցնել իրենց կողքին կամ էլ գրկում՝ դրանով իսկ հետևելով Հիսուսի սրտագրավ օրինակին (համեմատեք Մարկոս 10։13—16)։ Ընտանիքի գլուխը կարող է խնդրել իր կրտսերներին, որպեսզի բացատրեն նյութին վերաբերվող նկարները։ Փոքրերին հարկավոր է նախօրոք որևէ համար հանձնարարել կարդալու համար, իսկ մեծերին՝ մեկնաբանել, թե ինչպե՛ս կարելի է գործնականում կիրառել ուսումնասիրվող նյութը։
11. Ուրիշ ի՞նչ օժանդակ միջոցներ գոյություն ունեն, որտե՞ղ կարելի է դրանք գտնել և ինչպե՞ս կարելի է լավագույն կերպով գործածել ընտանեկան ուսումնասիրության ժամանակը։
11 Եթե ձեր ուսումնասիրությունները հիմնականում «Դիտարանից» են, հիշեք, որ բացի այդ հրատարակությունից, գոյություն ունեն շատ լեզուներով մատչելի ուսումնասիրության այլ օժանդակ միջոցներ ևս։ Օրինակ՝ Աստվածաշնչից որևէ արտահայտության ծագման մասին տեղեկության կամ բացատրության կարիք առաջանալու դեպքում մեզ օգնության կարող է հասնել «Գրությունների ըմբռնում» գիրքը (անգլ.)։ Մեզ հետաքրքրող այլ հարցերի պատասխանները կարելի է գտնել ««Դիտարանի» հրատարակությունների ցանկում» կամ էլ՝ օգտվելով Աստվածաշունչը հետազոտելու համար Ընկերության ստեղծած համակարգչային ծրագրից։ Եթե սովորեք օգտվել ձեր լեզվով մատչելի այս օժանդակ միջոցներից, ապա դրանք կդառնան ձեր ընտանեկան ուսումնասիրության անգնահատելի մասը։ Ձեր ընտանիքի կրտսեր անդամների հանդեպ հոգատարություն ցույց կտաք նաև այն դեպքում, եթե ուսումնասիրությանը հատկացված ժամանակի մի որոշ մասը տրամադրեք Ընկերության ուսանելի տեսաերիզներից որևէ մեկը դիտելուն կամ ձայներիզով դրամաներից որևէ հատված լսելուն. վերջում կարող եք ձեր տեսածը և լսածը քննարկել։ Այս օժանդակ միջոցների հմուտ գործածությունը ձեր ուսումնասիրությունը հետաքրքիր կդարձնի և օգտակար կլինի ողջ ընտանիքի համար։
Նյութը հարմարեցրեք ձեր ընտանիքի կարիքներին
12. Ի՞նչ դեր կարող է խաղալ ընտանեկան ուսումնասիրությունը զանազան բնույթի խնդիրներ հաղթահարելու հարցում։
12 Ենթադրենք՝ ամբողջ ընտանիքով պատրաստվում եք «Դիտարանի» շաբաթական ուսումնասիրությանը։ Բայց մի մոռացեք ընտանիքի ամենօրյա խնդիրների մասին։ Եթե մայրը չի աշխատում, կարող է ամեն օր ժամանակի մի մասն անցկացնել երեխաների հետ, երբ նրանք դպրոցից տուն են վերադառնում։ Որոշ խնդիրներ կարելի է պարզել հենց այդ ժամանակ, մյուսները գուցե ուշադրության կարիք ունենան հետագայում։ Աչքաթող մի՛ արեք ընտանիքի լուրջ կարիքները (Առակաց 27։12)։ Դրանք կարող են ոչ միայն դպրոցի հետ կապված խնդիրներ լինել, այլև ուրիշ իրավիճակներ։ Համապատասխան նյութ ընտրեք և նախօրոք տեղեկացրեք բոլորին, թե ի՛նչ է ուսումնասիրվելու այդ անգամ։
13. Ինչո՞ւ կարող է չքավորությունը հաղթահարելու մասին թեման ընտանեկան ուսումնասիրությանը օգտակար լինել։
13 Օրինակ՝ մարդկության մեծ մասը ծայրահեղ չքավորության մեջ է գտնվում, ուստի լավ կլինի, որ նրանք, ովքեր ապրում են այդպիսի մարդկանց հարևանությամբ, անհրաժեշտ համարեն խոսել այն մասին, թե ինչպես կարելի է հաղթահարել այդ իրավիճակը։ Արդյոք իրական կյանքի ու Աստվածաշնչի սկզբունքների վրա կառուցվող ուսումնասիրությունները արդյունավետ չե՞ն լինի ձեր ընտանիքի համար (Առակաց 21։5; Ժողովող 9։11; Եբրայեցիս 13։5, 6, 18)։
14. Ո՞ր իրավիճակներն են ժամանակահարմար դարձնում բռնության, պատերազմների և քրիստոնեական չեզոքության վերաբերյալ Եհովայի տեսակետի քննարկումը ընտանեկան ուսումնասիրության ժամանակ։
14 Քննարկման ենթակա մեկ այլ կարևոր թեմա է բռնությունը։ Յուրաքանչյուրիս մտքում և սրտում պետք է ամուր տպավորված լինի Եհովայի տեսակետը (Ծննդոց 6։13; Սաղմոս 11։5, Արևմտահայերեն Աստվածաշունչ)։ Այս թեմայով ընտանեկան ուսումնասիրությունը հնարավորություն կտա այնպիսի հարցեր քննարկելուն, ինչպիսիք են՝ ինչպե՞ս դպրոցում հեռու մնալ խուլիգանների հետապնդումներից, թույլատրելի՞ է զբաղվել ռազմական արվեստով, թե՝ ոչ, ինչպե՞ս հարմար զվարճություններ ընտրել և այլն։ Բռնի ընդհարումները ամբողջ աշխարհում սովորական երևույթ են դարձել, գրեթե չկա մի այնպիսի երկիր, որտեղ տեղի չունենան քաղաքացիական պատերազմներ, քաղաքական կամ էթնիկական պայքարներ, կամ էլ հրոսակախմբերով ընդհարումներ։ Ուստի, մինչ շրջապատված ենք պատերազմական նման երկպառակություններով, ժամանակահարմար կլինի քննարկել, թե մեր օրերում ինչպես կարելի է քրիստոնեավայել վարք պահպանել (Եսայիա 2։2—4; Յովհաննէս 17։16)։
15. Ինչպե՞ս պետք է ապահովել երեխաներին սեռի և ամուսնության վերաբերյալ ինֆորմացիայով։
15 Որքան մեծանում են երեխաները, այնքան, իրենց տարիքին համապատասխան, հասունանում է նրանց հետ սեռական կյանքի և ամուսնության վերաբերյալ զրույցներ վարելու անհրաժեշտությունը։ Որոշ մշակույթներում ընդունված չէ, որ ծնողները սեռին վերաբերվող հարցերը երեխաների հետ քննարկեն։ Անտեղյակ երեխաները աղավաղված ինֆորմացիա են ստանում իրենց հասակակիցներից, ինչի արդյունքը երբեմն ողբերգական է լինում։ Լավ չէ՞ր լինի ընդօրինակել Եհովային, որն այս առումով բացահայտ, բայց և, միևնույն ժամանակ, փափկանկատորեն խորհուրդներ է տալիս Աստվածաշնչում։ Աստծո հայթայթած խորհուրդները կօգնեն մեր երեխաներին ինքնահարգանքի զգացում ունենալ և հակառակ սեռի հանդեպ արժանապատիվ վերաբերմունք ցուցաբերել (Առակաց 5։18—20, Կողոսացիս 3։5, Ա Թեսաղոնիկեցիս 4։3—8)։ Եթե նույնիսկ այդ թեմայով արդեն խոսել եք ձեր երեխաների հետ, մի՛ հապաղեք մեկ անգամ ևս անդրադառնալ այդչափ կարևոր հարցին։ Այդ մասին կրկին անգամ խոսելը լիովին տեղին է հատկապես նոր հանգամանքներ ծագելու դեպքում։
16. ա) Տարբեր ընտանիքներում շաբաթվա ո՞ր օրերին է անցկացվում ընտանեկան ուսումնասիրությունը։ բ) Ինչպիսի՞ խոչընդոտներ եք հաղթահարել ընտանեկան կանոնավոր ուսումնասիրություն ունենալու համար։
16 Իսկ շաբաթվա ո՞ր օրը կարելի է անցկացնել ընտանեկան ուսումնասիրությունը։ Հետևելով ողջ աշխարհի Բեթելի ընտանիքների օրինակին՝ շատերն իրենց ուսումնասիրությունն անցկացնում են երկուշաբթի երեկոյան։ Ուրիշները մեկ այլ օր են ընտրում։ Արգենտինայում տասնմեկ հոգուց բաղկացած մի ընտանիք, որտեղ ինը երեխա կար, ամեն օր արթնանում էր առավոտյան ժամը հինգին ընտանեկան ուսումնասիրությունն անցկացնելու համար, քանի որ տարբեր աշխատաժամերի պատճառով ուրիշ ժամ հարմար չէր։ Ամեն օր այդքան վաղ արթնանալն այդքան էլ հեշտ չէր, սակայն այդպիսով երեխաները գիտակցում էին ընտանեկան ուսումնասիրության կարևորությունը, և դա տպավորվում էր նրանց մտքում ու սրտում։ Ֆիլիպիններում ապրող մի երեց կանոնավորաբար ընտանեկան ուսումնասիրություն էր անցկացնում իր կնոջ և երեք երեխաների հետ։ Շաբաթվա ընթացքում ծնողներն անհատապես ուսումնասիրում էին նաև երեխաներից յուրաքանչյուրի հետ, որպեսզի ամեն մեկն իր հերթին յուրացներ ճշմարտությունը։ Միացյալ Նահանգներում մի քույր, որի ամուսինը Վկա չէր, ամեն առավոտ երեխաներին ճանապարհում էր մինչև ավտոբուսի կանգառը։ Նախքան ավտոբուսի գալը, նրանք հասցնում էին տասը րոպեի ընթացքում միասին կարդալ և քննարկել Գրություններից որևէ հատված, և հետո, մինչ երեխաները ավտոբուս կբարձրանան, նրանց մայրը կարճ աղոթք էր ասում։ Կոնգոյի Դեմոկրատական Հանրապետությունում մի կին, որի անհավատ ամուսինը լքել էր ընտանիքը, ստիպված էր ուսումնասիրության մեջ մեծ ջանքեր ներդնել իր սահմանափակ կրթության պատճառով։ Նրա ավագ որդին ամեն շաբաթ այցելում էր նրանց և ուսումնասիրություն անցկացնում մոր և կրտսեր եղբայրների հետ։ Երեխաների համար մայրը հիանալի օրինակ էր ծառայում նրանով, որ ժրաջանորեն պատրաստվում էր ուսումնասիրություններին։ Որևէ խոչընդոտ դժվարացնո՞ւմ է ձեր կանոնավոր ընտանեկան ուսումնասիրությունները։ Եթե այո, ապա երբեք մի՛ հանձնվեք։ Եհովան ձեզ առատորեն կօրհնի, եթե միշտ ձգտեք Աստվածաշնչի կանոնավոր ուսումնասիրություն անցկացնել (Մարկոս 11։23, 24)։
Հաստատակամության վարձատրությունը
17. ա) Ի՞նչ է պահանջվում կանոնավոր ընտանեկան ուսումնասիրություն անցկացնելու համար։ բ) Ո՞ր օրինակն է ցույց տալիս, որ ընտանիքում կանոնավորաբար Եհովայի հրահանգները ստանալը մեծ արժեք ունի։
17 Հարկավոր է պլանավորել, իսկ դրա համար հաստատակամության կարիք է զգացվում։ Իսկ ընտանեկան կանոնավոր ուսումնասիրության օգուտներն այնքան շատ են, որ իրոք արժե հաստատակամ լինել (Առակաց 22։6; Գ Յովհաննէս 4)։ Գերմանիայում բնակվող Ֆրանց և Հիլդա անուններով ամուսինները տասնմեկ երեխա են մեծացրել։ Տարիներ անց նրանց դստրերից մեկը՝ Մագդալինան, պատմում է. «Ինչը ես այսօր կարևոր ազդակներից մեկն եմ համարում, դա այն է, որ մեր ընտանիքում ոչ մի օր չէր անցնում առանց հոգևոր հրահանգ ստանալու»։ Երբ Ադոլֆ Հիտլերի ազգայնամոլական ոգին սկսեց տիրել ամենուրեք, Մագդալինայի հայրը դիմեց Աստվածաշնչի օգնությանը, որպեսզի իր ընտանիքը պատրաստ լինի այն փորձություններին, որոնք ամեն րոպե կարող էին վրա հասնել։ Շատ ժամանակ չանցած՝ ընտանիքի կրտսեր երեխաներն առևանգվեցին և տարվեցին ուղղիչ դպրոց, ընտանիքի մյուս անդամներին ձերբակալեցին, բանտարկեցին կամ էլ համակենտրոնացման ճամբարներ ուղարկեցին։ Նրանցից մի քանիսը մահապատժի ենթարկվեցին։ Սակայն բոլորն էլ ամուր հավատ պահեցին ոչ միայն այդ կատաղի հալածանքների ներքո, այլև հետագա տարիների ընթացքում, երբ այդ դաժան օրերն արդեն ետևում էին մնացել։
18. Ինչպե՞ս են վարձատրվել շատ միայնակ ծնողներ իրենց ներդրած ջանքերի համար։
18 Բազմաթիվ միայնակ ծնողներ, ինչպես նաև նրանք, որոնց կողակիցները չեն կիսում իրենց հավատը, միևնույն մեթոդները կիրառելով, կանոնավորաբար ուսուցանում են իրենց երեխաներին Աստծո Խոսքը։ Հնդկաստանից մի այրի մեծ ջանք էր թափել, մինչև որ կարողացել էր իր երկու երեխաների մեջ Եհովայի հանդեպ սեր սերմանել։ Սակայն այդ կինը խորը հիասթափություն ապրեց, երբ որդին դադարեց շփվել Եհովայի ժողովրդի հետ։ Նա շարունակ խնդրում էր Եհովային ներել իրեն այն սխալների համար, որ, թերևս, թույլ էր տվել որդուն դաստիարակելիս։ Սակայն որդու հիշողության մեջ դեռ որոշ բաներ մնացել էին իր սովորածից։ Ավելի քան տասը տարի հետո նա վերադարձավ, հոգևոր մեծ առաջադիմություններ կատարեց, և այժմ, կնոջ հետ միասին լիաժամ քարոզիչներ լինելով հանդերձ, ժողովում ծառայում է որպես երեց։ Որքա՜ն երախտապարտ են այն ծնողները, որոնք լրջորեն են վերաբերվել Եհովայի և իր կազմակերպության տված խորհրդին ու կանոնավորաբար աստվածաշնչային հրահանգներով են ապահովել իրենց ընտանիքը։ Իսկ դուք կիրառո՞ւմ եք այդ խորհուրդը ձեր ընտանիքում։
Կարո՞ղ եք բացատրել
◻ Ինչո՞ւ է կարևոր կանոնավոր ընտանեկան ուսումնասիրությունը։
◻ Ինչպիսի՞ նպատակներ պետք է դնել յուրաքանչյուր ընտանեկան ուսումնասիրության ժամանակ։
◻ Ուսումնասիրություն անցկացնելու համար ո՞ր օժանդակ միջոցներն են մեզ մատչելի։
◻ Ինչպե՞ս կարելի է ուսումնասիրությունը հարմարեցնել ընտանիքի կարիքներին։
[նկար 25–րդ էջի վրա]
Որոշակի նպատակակետերը ավելի արդյունավետ կդարձնեն ձեր ընտանեկան ուսումնասիրությունը։