Ընտանեկան գրաֆիկ. ընտանեկան ուսումնասիրությունը

¹ Մեծագույն պարգևը, որ դու, լինելով քրիստոնյա ծնող, կարող ես տալ քո երեխաներին, նրանց մեջ Եհովայի հանդեպ նույնպիսի սեր զարգացնելն է, ինչպիսին դու ունես։ Դա կարելի է անել, օրինակ, «տան մէջ նստած ժամանակդ», երբ Աստվածաշնչի ընտանեկան ուսումնասիրություն ես անցկացնում (Բ Օրին. 6։5–7)։ Անկախ նրանից, թե դու քրիստոնյա կողակից ունես, կրոնապես բաժանված ընտանիքում ես ապրում, թե միայնակ ծնող ես՝ կարող ես օգնել երեխաներիդ մտերմանալ քեզ հետ և Եհովայի՝ կանոնավորաբար ընտանեկան ուսումնասիրություն անցկացնելով։

² Ինչպե՞ս սկսել։ Առաջին քայլը ընտանեկան ուսումնասիրությունը սովորություն դարձնելն է։ Եթե դու չգիտես, թե երբ կարելի է անցկացնել ուսումնասիրությունը, կարող ես քննարկել այդ հարցը ընտանիքիդ անդամների հետ միասին (Առակ. 15։22)։ Եթե փոքր տարիքի երեխաներ ունես, գուցե նախընտրես շաբաթվա մեջ մի քանի անգամ կարճատև ուսումնասիրություններ անցկացնել։ Որոշիր, թե ինչպիսի գրաֆիկն է գործնական ձեր ընտանիքի համար։ Ձեր ընտանեկան գրաֆիկում կոնկրետ ժամ նշիր ուսումնասիրության համար և վճռիր հետևել այդ գրաֆիկին։

³ Ի՞նչ կարող եք ուսումնասիրել։ Ոմանք պատրաստում են տվյալ շաբաթվա ժողովի Գրքի ուսումնասիրության կամ «Դիտարանի» ուսումնասիրության համար նախատեսված նյութը։ Ուրիշները ուսումնասիրում են հատկապես երիտասարդների համար նախատեսված գրականություն։ Մի հայր, որը մանկահասակ որդի և դուստր ունի, ասում է. «Մեր շաբաթական ուսումնասիրությունը ցանկալի է դարձնում այն, որ մենք բեմականացումներ ենք անում «Աստվածաշնչի պատմությունների իմ ժողովածուն» գրքից։ Շատ ավելի կարևոր է ոչ թե այն՝ քանի պարբերություն ենք անցնում, այլ այն, թե որքան խորն է տպավորվում նրանց մեջ, և թե որքան լավ են հասկանում նրանք անցած նյութը»։

⁴ Ուսումնասիրեք ամեն շաբաթ։ Ընտանեկան ուսումնասիրությունը պետք է անցկացվի կանոնավորաբար և այնպես, որ ընտանիքի բոլոր անդամներն էլ ուրախությամբ սպասեն ուսումնասիրությանը։ Կարելի է ճկուն լինել ուսումնասիրության օրվա ու ժամի հարցում, երբ անսպասելի իրավիճակներ են առաջանում։ Կլինեն նաև դեպքեր, երբ անհրաժեշտ կլինի փոխել ուսումնասիրության նյութը։ Ինչևէ, ցանկացած անհրաժեշտ փոփոխություն չպետք է պատճառ լինի, որ ձեր ընտանեկան գրաֆիկը երկար ժամանակով խախտվի։ Մի աղջիկ պատմում է իրենց ընտանիքի մասին. «Եթե մեր ուսումնասիրության ժամը փոխվում է, հայրիկը միշտ այդ մասին գրություն է թողնում սառնարանի դռան վրա։ Այդպիսով բոլորս էլ իմանում ենք, թե երբ է լինելու ուսումնասիրությունը»։ Որքա՜ն գովելի է, որ քրիստոնյաները այսպիսի ջանքեր են գործադրում ընտանեկան ուսումնասիրությունը կանոնավորաբար անցկացնելու համար։ Երեխաներիդ «խրատով եւ Տիրոջ ուսմունքովը» դաստիարակելով՝ դու ցույց ես տալիս քո սերը և՛ նրանց, և՛ մեր երկնային Հոր հանդեպ (Եփես. 6։4)։