Ինչպե՞ս կարող են ընտանիքի անդամները միմյանց հետ համագործակցել, որպեսզի ամբողջական մասնակցություն ունենան Աստվածաշնչի ուսումնասիրությանը
1 Ճշմարտությունն ընտանեկան կյանքին իրական իմաստ ու նպատակ է տալիս, սակայն Եհովային ծառայելու մեջ ձեռք բերված հաջողությունն ինքն իրեն առաջ չի գալիս։ Հոգևորապես ամուր ընտանիք ստեղծելու համար ժամանակ և ջանք է պահանջվում։ Այս մարզում խիստ անհրաժեշտ է ընտանիքի անդամների սերտ համագործակցությունը։ Երեք մասից բաղկացած հոդվածների շարքի այս առաջին մասը կանդրադառնա այն հարցին, թե ընտանիքի անդամներն ինչ կերպերով կարող են համագործակցել միմյանց հետ, որպեսզի օգտավետ ուսումնասիրություն անցկացնելը սովորություն դառնա նրանց համար։
2 Աստվածաշնչի ամենօրյա ընթերցանությամբ։ Առակաց 24։5–ը նշում է, որ «գիտուն մարդը իր ոյժը կ’աւելացնէ»։ Աստծո Խոսքի կանոնավոր ընթերցանությունից ստացած գիտությունը անհատին ներքին ուժ է տալիս, որի օգնությամբ նա դիմակայում է իր հոգեվոր վիճակը վնասելուն ուղղված Սատանայի հարձակումներին (Սաղ. 1։1, 2)։ Ընտանիքիդ բոլոր անդամների հետ միասին Աստվածաշնչի ամենօրյա ընթերցանություն անցկացնո՞ւմ ես։ Աստվածապետական ծառայության դպրոցի ծրագրում նախատեսված է «Աստվածաշնչի ընթերցանության լրացուցիչ ցուցակ» տարվա բոլոր շաբաթների համար։ Այդ ծրագրին հետևելու համար ընտանիքի անդամներից օրական պահանջվում է ընդամենը տասը րոպե։ Հարմար ժամանակ ընտրիր Աստծո Խոսքի ընթերցանության և «Աստուածաշունչը Քննենք Ամէն Օր» գրքույկից օրվա խոսքը քննարկելու համար, օրինակ՝ նախաճաշին, ընթրիքից հետո կամ քնելուց առաջ։ Սա քո ընտանիքի օրակարգի մեկ մասը դարձրու։
3 Ամեն շաբաթ համատեղ ուսումնասիրելով։ Աստվածաշնչի ընտանեկան ուսումնասիրությունը շաբաթվա ընթացքում ընտանիքի բոլոր անդամների համար պետք է ամենանշանակալից բանը լինի։ Յուրաքանչյուր անդամ պետք է աջակցի ուսումնասիրությանը իր եռանդուն մասնակցությամբ։ Ուսումնասիրվելիք նյութը, օրը, ժամը և ուսումնասիրության տևողությունը ընտրելիս՝ ընտանիքի գլուխը պետք է հաշվի առնի ընտանեկան կարիքները։ Շաբաթական ծրագրում ընտանեկան ուսումնասիրությունը առաջնահերթ տեղում դասիր։ Թույլ մի տուր, որ ավելի քիչ կարևորություն ունեցող գործերը խոչընդոտեն դրան (Փիլիպ. 1։10, 11)։
4 Մի ընտանիքում հորն աշխատանքի բերումով հաճախ էին զանգահարում։ Այդ պատճառով ընտանեկան ուսումնասիրության ժամանակ նա անջատում էր հեռախոսը։ Իսկ եթե հաճախորդները գալիս էին տուն, նրանց հրավիրում էին միանալ ուսումնասիրությանը կամ առաջարկում էին սպասել, մինչև որ այն կավարտվեր։ Հայրը թույլ չէր տալիս, որ որևէ բան խոչընդոտեր ընտանեկան ուսումնասիրությանը։ Նման կեցվածքը խորը տպավորություն գործեց երեխաների վրա, իսկ աշխատանքը դրանից չտուժեց։
5 Որքա՜ն հաճելի է, երբ հոգևոր միջոցառումների ժամանակ ընտանիքի անդամները համագործակցում են։ Աստվածաշնչի ընտանեկան ուսումնասիրությանը ամբողջական մասնակցություն ունենալու գործում մեր ցուցաբերած հավատարմությունը Եհովայի օրհնությունը կբերի (Սաղ. 1։3)։