Ամուսնական կողակցի ընտրություն. առաջնորդություն Աստծուց

«Իմաստուն կ’անեմ քեզ, եւ կ’սովորեցնեմ քեզ այն ճանապարհը, որ նորանում պիտի գնաս. կ’խրատեմ քեզ՝ իմ աչքը քեզ վերայ կ’լինի» (Սաղմոս 32։8)։

1. Ի՞նչ գործոններ են անհրաժեշտ հաջող ամուսնության համար։

ՕԴԱՅԻՆ ակրոբատը բաց է թողնում ճոճաձողը, երկուտակվում է և ճարպկորեն օդում գլուխկոնծի տալիս։ Արագորեն ուղղելով մարմինը՝ նա տարածում է ձեռքերը ու բռնում մյուս ակրոբատից, որը գլխիվայր կախված է դիմացի ճոճաձողից։ Գեղասահորդների թեթևասահ զույգը չմշկում է սահադաշտում։ Հանկարծ տղամարդ–​գեղասահորդը բարձրացնում է իր զուգընկերուհուն և օդ նետում։ Նա պտտվում է օդում և, նրբագեղորեն վայրէջք կատարելով, շարունակում է պտտվել իր զույգի հետ սառույցի վրա։ Երկու օրինակներում էլ այդ մարդիկ կարծես թե ոչ մի ջանք չգործադրեցին։ Բայց ո՞վ կհամարձակվեր այդպիսի ցատկեր կատարել առանց մարզվելու, առանց հմուտ օգնականի և, մասնավորապես, առանց ճիշտ ղեկավարության կամ հրահանգների։ Նմանապես, կարող է թվալ, թե հաջող ամուսնությունը ինքնաբերաբար է լինում։ Մինչդեռ, սա նույնպես կախված է լավ ընկերոջից, համաձայնեցված գործողություններից և հատկապես իմաստուն խորհրդատու ունենալուց։ Անկասկած, ճիշտ առաջնորդություն ունենալը էական է։

2. ա) Ո՞վ է հիմնադրել ամուսնությունը և ի՞նչ նպատակով։ բ) Ինչպե՞ս են որոշ ամուսնություններ կատարվել։

² Բնական է, երբ չամուսնացած երիտասարդները մտածում են ամուսնական կողակից՝ կյանքի ընկեր ունենալու մասին։ Ամուսնությունը Եհովա Աստված է հիմնադրել, և, այդ օրվանից սկսած, տղամարդու և կնոջ միջև ամուսնական հարաբերությունները նորմալ կենսաձև են համարվում։ Բայց առաջին մարդը՝ Ադամը, ինքը չընտրեց իր կնոջը, այլ Եհովան հոգատարությամբ տվեց նրան (Ծննդոց 2։18–24)։ Առաջին զույգը պետք է բազմանար, և երկիրը, վերջիվերջո, լցվելու էր մարդկանցով։ Այդ ամուսնությունից հետո սովորաբար ծնողներն էին իրենց զավակներին ամուսնացնում՝ երբեմն վերջիններիս համաձայնությունը ստանալուց հետո (Ծննդոց 21։21; 24։2–4, 58; 38։6; Յեսու 15։16, 17)։ Չնայած այս սովորույթը մինչև օրս շարունակում է ապրել որոշ երկրներում և մշակույթներում՝ այսօր շատերը իրենք են ամուսնական կողակից ընտրում։

3. Ինչպե՞ս ընտրել ամուսնական կողակից։

³ Ինչպե՞ս ընտրել ամուսնական կողակից։ Ոմանք ուշադրություն են դարձնում արտաքինին՝ այն, ինչ հաճելի ու ցանկալի է իրենց աչքին։ Մյուսներին հետաքրքրում է նյութականը. փնտրում են այնպիսի մեկին, որը հոգ կտանի և կբավարարի իրենց կարիքներն ու ցանկությունները։ Բայց արդյո՞ք միայն դրանք են անհրաժեշտ երջանիկ և բավականություն պատճառող ամուսնության համար։ «Սուտ է վայելչութիւնը, եւ ունայն՝ գեղեցկութիւնը,— ասվում է Առակաց 31։30–ում.— այն կինը որ վախենում է Տէրիցը՝ նա կ’գովուի»։ Այս խոսքերում մի կարևոր միտք է պարփակված, այն է՝ կողակից ընտրելիս հարկավոր է հաշվի առնել Եհովային։

Սիրառատ առաջնորդություն՝ Աստծուց

4. Ինչո՞վ է Աստված մեզ օգնում ամուսնական կողակից ընտրելու հարցում։

⁴ Մեր երկնային սիրառատ Հայրը՝ Եհովան, մեզ է տվել իր գրավոր Խոսքը, որպեսզի ցանկացած հարցում առաջնորդություն ունենանք։ Նա ասում է. «Ես եմ քո Աստուածը, որ քեզ սովորեցնում եմ օգտակար եղողը, որ քեզ առաջնորդում եմ քո գնալու ճանապարհումը» (Եսայիա 48։17)։ Ուստի, զարմանալի չէ, որ Աստվածաշնչում ամուսնական կողակից ընտրելու վերաբերյալ ժամանակի փորձությունն անցած սկզբունքներ կան։ Եհովան ցանկանում է, որ մեր ամուսնությունը տևական և երջանիկ լինի։ Դրա համար էլ նա հոգ է տարել, որ հասկանանք և կիրառենք այդ սկզբունքները։ Արդյոք դա՞ չէ, որ սպասում ենք մեր սիրառատ Ստեղծիչից (Սաղմոս 19։8)։

5. Ի՞նչ է անհրաժեշտ երջանիկ ամուսնության համար։

⁵ Ամուսնությունը հիմնելիս Եհովան ցանկանում էր, որ այդ կապը ամուր լիներ (Մարկոս 10։6–12; Ա Կորնթացիս 7։10, 11)։ Դա է պատճառը, որ նա ‘ատում է ապահարզանը’, որը թույլ է տալիս միայն «պոռնկութեան» դեպքում (Մաղաքիա 2։13–16; Մատթէոս 19։9)։ Հետևաբար, ամուսնական կողակից ընտրելն այն ամենալուրջ հարցերից է, որին չպետք է թեթևամտորեն վերաբերվել։ Կյանքում քիչ են այն հարցերը, որոնց շուրջ կայացրած որոշումները կարող են վճռորոշ նշանակություն ունենալ մեր կյանքում՝ մեզ երջանիկ կամ դժբախտ դարձնելու։ Մինչ ճիշտ ընտրությունը հարստացնում և հաճելի է դարձնում կյանքը, սխալ ընտրությունը կարող է անսահման վիշտ պատճառել (Առակաց 21։19; 26։21)։ Մշտապես երջանիկ լինելու համար շատ կարևոր է իմաստուն ընտրություն կատարել ու միշտ պատրաստ լինել պարտականություններ վերցնելու, որովհետև Աստված այնպես է հաստատել ամուսնությունը, որ այն բարգավաճի ներդաշնակության և համագործակցության մթնոլորտում (Մատթէոս 19։6)։

6. Ինչո՞ւ հատկապես երիտասարդները կողակից ընտրելիս պետք է զգույշ լինեն, և նրանք ինչպե՞ս կարող են ամենաիմաստուն որոշումը կայացնել։

⁶ Երիտասարդները կողակից ընտրելիս առանձնապես պետք է զգույշ լինեն, որ ֆիզիկական գրավչությունն ու ուժգին ցանկությունները չմթագնեն իրենց ողջամտությունը։ Իսկապես, զուտ այսպիսի ազդակների վրա հիմնված հարաբերություններում շուտով կարող է տեղ գտնել արհամարհանքը և նույնիսկ՝ ատելությունը (Բ Թագաւորաց 13։15)։ Մյուս կողմից՝ սերը կարող է տևական լինել, եթե ինչպես մեզ, այնպես էլ մեր կողակցին ենք լավ ճանաչում։ Մենք նաև պետք է գիտակցենք, որ այն, ինչ սկզբում մեր սրտին ամենացանկալին էր, հիմա կարող է ամենևին էլ այդպիսին չլինել (Երեմիա 17։9)։ Ահա թե ինչու Աստծո առաջնորդությունը, որ գտնում ենք Աստվածաշնչում, այդքան կարևոր է։ Այդ առաջնորդությամբ մենք կարող ենք ամենաիմաստուն որոշումները կայացնել։ Եհովան սաղմոսերգուի բերանով ասում է. «Իմաստուն կ’անեմ քեզ, եւ կ’սովորեցնեմ քեզ այն ճանապարհը, որ նորանում պիտի գնաս. կ’խրատեմ քեզ՝ իմ աչքը քեզ վերայ կ’լինի» (Սաղմոս 32։8; Եբրայեցիս 4։12)։ Թեև ամուսնությունը բավարարում է սիրո և ընկերակցության մեր բնածին պահանջը, այդուհանդերձ, կլինեն խնդիրներ, որոնք լուծելու համար պահանջվում է հասունություն և խորաթափանցություն։

7. Ինչո՞ւ ոմանք չեն ընդունում աստվածաշնչյան խորհուրդը կողակից ընտրելու վերաբերյալ, և դա ի՞նչ արդյունքների կարող է հանգեցնել։

⁷ Մենք իմաստություն հանդես կբերենք, եթե ականջ դնենք, թե ամուսնության Հիմնադիրը ինչ է ասում կողակից ընտրելու մասին։ Այնուհանդերձ, հնարավոր է չցանկանանք ընդունել ծնողների կամ քրիստոնյա երեցների տված աստվածաշնչյան խորհուրդը։ Մեզ կարող է թվալ, թե նրանք մինչև վերջ չեն հասկանում մեզ, իսկ ուժգին ցանկությունները կարող են դրդել՝ սրտներիս ուզածն անելու։ Սակայն կյանքը գուցե ստիպի, որ զղջանք հօգուտ մեզ տրված խորհուրդն անտեսելու համար (Առակաց 23։19; 28։26)։ Արդյունքում՝ հնարավոր է, որ մեր ամուսնական կյանքը զուրկ լինի սիրուց, ունենանք երեխաներ, որոնց պահելն այնքան էլ հեշտ չէ կամ նույնիսկ անհավատ կողակից ունենանք։ Որքա՜ն ցավալի կլիներ, եթե ամուսնությունը, որ կարող էր մեզ անսահման երջանկություն պարգևել, բազում ցավերի աղբյուր դառնա։

Աստծուն նվիրված լինելը՝ վճռորոշ գործոն

8. Ինչպե՞ս է Աստծուն նվիրված լինելը նպաստում տևական ու երջանիկ ամուսնությանը։

⁸ Ճիշտ է, որ փոխադարձ գրավչությունը նպաստում է ամուսնության ամուր լինելուն։ Սակայն ամուսինների ընդհանուր արժեքներն ավելի կարևոր են ամուսնական միության տևական և երջանիկ լինելու համար։ Եթե ամուսինները նվիրված են Եհովային, ապա նրանց միությունն այնպիսի ամրություն է ունենում, որն այլ կերպ հնարավոր չէ ձեռք բերել (Ժողովող 4։12)։ Երբ քրիստոնյա ամուսինները իրենց կյանքում առաջին տեղում են դնում Եհովայի երկրպագությունը, նրանք միացած են լինում հոգևորապես, մտավորապես և բարոյապես։ Նրանք միասին ուսումնասիրում են Աստծո Խոսքը, միասին են աղոթում, և դա նրանց սրտերը մեկ է դարձնում։ Միասին են գնում քրիստոնեական հանդիպումներին, միասին՝ ծառայում։ Այս ամենը նպաստում է նրանց հոգևոր կապի ամրացմանը, ինչը իր հերթին ավելի է մտերմացնում մեկմեկու։ Եվ ամենակարևորն այն է, որ դա Եհովայի հավանությանն է արժանանում։

9. Ի՞նչ արեց Աբրահամը Իսահակին կին գտնելու համար, և ի՞նչ արդյունքով։

⁹ Հավատարիմ նահապետ Աբրահամը Աստծուն նվիրված մարդ էր։ Ուստի, երբ ժամանակը եկավ, որ իր որդու՝ Իսահակի համար կին ընտրեր, նա դրանում էլ ցանկացավ հաճեցնել Աստծուն։ Իր տան վստահելի ծառային նա ասաց. «Ես քեզ երդում եմ տալիս Եհովայով երկնքի Աստուծովը եւ երկրի Աստուծովը, որ իմ որդու համար կին չ’առնես Քանանացիների աղջիկներիցը, որոնց մէջ ես բնակվում եմ։ Այլ իմ երկիրն եւ իմ ազգականների մօտ գնաս, եւ իմ որդի Իսահակի համար կին առնես։ Եհովան .... իր հրեշտակը կ’ուղարկէ քո առաջին, եւ դու այն տեղից իմ որդու համար կին կ’առնես»։ Ռեբեկան հրաշալի կին եղավ, և Իսահակը քնքշորեն սիրեց նրան (Ծննդոց 24։3, 4, 7, 14–21, 67)։

10. Սուրբգրային ի՞նչ պարտականություններ են դրված ամուսինների և կանանց վրա։

¹⁰ Եթե չամուսնացած քրիստոնյաներ ենք, ապա Աստծուն նվիրված լինելը կօգնի մեզ զարգացնել այն հատկությունները, որոնք համապատասխանում են ամուսնության վերաբերյալ սուրբգրային չափանիշներին։ Պողոս առաքյալը ամուսինների և կանանց հետևյալ պարտականություններն է նշում. «Կանայք իրենց մարդկանց թող հնազանդ լինեն, ինչպէս կը հնազանդուեն Տիրոջը.... Մարդի՛կ, սիրեցէ՛ք ձեր կանանց, ինչպէս որ Քրիստոս սիրեց եկեղեցին եւ իր անձը մատնեց նրա համար.... մարդիկ պարտաւոր են սիրել իրենց կանանց իբրեւ իրենց մարմինները.... իւրաքանչիւր ոք իր կնոջն այնպէս սիրի, ինչպէս իր անձը, եւ կինը երկնչի իր մարդուց [«պէտք է յարգէ իր ամուսինը», ՆԿ–ի ՆԱԹ]» (Եփեսացիս 5։22–33)։ Ինչպես տեսնում ենք, Պողոսի այս ներշնչյալ խոսքերը շեշտում են սիրո և հարգանքի կարևորությունը։ Այս խորհուրդն ընդունողները ցույց են տալիս, որ իրենք աստվածահաճո վախ ունեն Եհովայի հանդեպ։ Նաև այս խորհրդից երևում է, որ հարկավոր է պատրաստակամորեն ընդունել կյանքի թե՛ ուրախությունները, թե՛ տխրությունները։ Այն քրիստոնյաները, ովքեր մտադիր են ամուսնանալ, պետք է կարողանան հանձն առնել այդ պատասխանատվությունը։

Ե՞րբ ամուսնանալ

11. ա) Ամուսնանալու ժամանակի մասին ի՞նչ խորհուրդ է տրվում Գրություններում։ բ) Ո՞ր օրինակով է երևում Ա Կորընթացիս 7։36–ում նշված աստվածաշնչյան խորհրդին հետևելու իմաստնությունը։

¹¹ Շատ կարևոր է իմանալ, թե երբ ենք պատրաստ ամուսնանալու։ Ճիշտ է, Գրությունները որոշակի տարիք չեն սահմանում, և յուրաքանչյուր մարդ ինքն է որոշում՝ երբ ամուսնանալ, սակայն այնտեղ պարզորոշ ցույց է տրվում, որ ավելի լավ է սպասել, քանի դեռ գտնվում ենք «երիտասարդության ծաղկուն շրջանում» (ՆԱ), երբ սեռական ցանկությունը կարող է մթագնել առողջ դատողությունը (Ա Կորնթացիս 7։36)։ «Երբ տեսնում էի, թե ինչպես են ընկերներս ժամադրվում, ամուսնանում՝ շատերը դեռ պատանեկան տարիներին, երբեմն դժվար էր լինում այս խորհուրդը կիրառել,— պատմում է Միշելը։— Բայց ես գիտակցում էի, որ այդ խորհուրդը Եհովայից է բխում, և նա պատվիրում է մեզ միայն այն, ինչ որ օգտակար է մեզ համար։ Չշտապելով ամուսնանալ՝ ես հնարավորություն ունեցա կենտրոնանալ Եհովայի հետ իմ փոխհարաբերությունների վրա և կյանքի որոշակի փորձ ձեռք բերել, ինչը, ամենայն հավանականությամբ, հնարավոր չէր լինի պատանեկության տարիներին։ Մի քանի տարի անց ես ավելի լավ էի պատրաստված պատասխանատվություններ վերցնելու, ինչպես նաև՝ ամուսնական կյանքի խնդիրները դիմագրավելու»։

12. Ինչո՞ւ խելամիտ կլիներ երիտասարդ հասակում չշտապել ամուսնանալ։

¹² Նրանք, ովքեր, լինելով դեռ շատ երիտասարդ, շտապում են ամուսնանալ, հաճախ հայտնաբերում են, որ իրենց կարիքներն ու ցանկությունները իրենց հասունանալուն զուգընթաց փոխվում են։ Եվ այդ ժամանակ նրանք սկսում են հասկանալ, որ այն, ինչ սկզբում ցանկալի էր, այլևս կարևոր չէ իրենց համար։ 16 տարեկան քրիստոնյա մի քույր որոշեց ամուսնանալ։ Նրա մայրն ու տատը այդ տարիքում էին ամուսնացել։ Երբ իր ընտրած տղան մերժեց նրա հետ ամուսնանալ այդ ժամանակ, նա մեկ ուրիշին դիմեց, ով կհամաձայնվեր իր հետ ամուսնանալ այդ տարիքում։ Ավելի ուշ նա չարաչար զղջաց իր հապշտապ որոշման համար։

13. Վաղաժամ ամուսնացողները հաճախ ինչի՞ պակաս են ունենում։

¹³ Եթե ամուսնանալու մտադրություն ունենք, ապա կարևոր է հասուն ձևով դատել խնդրո առարկա հարցերի վերաբերյալ։ Վաղաժամ ամուսնությունը կարող է առաջ բերել բազմաթիվ պրոբլեմներ, որոնք երիտասարդ ամուսինները, հավանաբար, պատրաստ չեն լուծել։ Նրանք գուցե չունեն փորձ և հասունություն, որոնք անհրաժեշտ են ամուսնական խնդիրներից գլուխ հանելու և երեխաներ դաստիարակելու համար։ Մենք կարող ենք ամուսնանալ միայն այն դեպքում, երբ ֆիզիկապես, մտավորապես և հոգևորապես պատրաստ ենք երկարատև փոխհարաբերություններ ունենալու։

14. Ի՞նչ է անհրաժեշտ ամուսնության մեջ լարված իրավիճակները լուծելու համար։

¹⁴ Պողոսը գրեց, որ ամուսնացողները «մարմնի նեղութիւն են ունենալու» (Ա Կորնթացիս 7։28)։ Ամուսինների միջև խնդիրներ կլինեն, քանի որ նրանք երկու ուրույն անձնավորություններ են և իրարից տարբեր տեսակետներ ունեն։ Մարդկային անկատարության պատճառով գուցե դժվար լինի կատարել ամուսնությանը վերաբերող մեր սուրբգրային պարտականությունները (Ա Կորնթացիս 11։3; Կողոսացիս 3։18, 19; Տիտոս 2։4, 5; Ա Պետրոս 3։1, 2, 7)։ Լարված իրավիճակները սիրալիր կերպով լուծելու համար Աստծո առաջնորդությունն է անհրաժեշտ, իսկ նրան փնտրելու և հետևելու համար հասունություն և հոգևոր կայունություն է հարկավոր։

15. Ի՞նչ դեր կարող են խաղալ ծնողները իրենց երեխաներին ամուսնությանը նախապատրաստելու մեջ։ Բացատրեք օրինակով։

¹⁵ Օգնելով իրենց երեխաներին հասկանալ, թե ինչքան կարևոր է հետևել Աստծո առաջնորդությանը՝ ծնողները կկարողանան նրանց նախապատրաստել ամուսնությանը։ Հմտորեն օգտվելով Գրություններից և քրիստոնեական հրատարակություններից՝ ծնողները կարող են օգնել իրենց զավակներին՝ որոշելու, թե իրենք կամ իրենց հավանական կողակիցները պատրաստ են արդյոք ամուսնական պատասխանատվություններ վերցնելու։a Տասնութ տարեկան Բլոսոմին թվում էր, թե ինքը սիրահարված է իրենց ժողովից մի երիտասարդի, որը լիաժամ ռահվիրա էր։ Նրանք մտադիր էին ամուսնանալ իրար հետ։ Սակայն ծնողները, գիտակցելով, որ իրենց աղջիկը դեռ շատ երիտասարդ է, խնդրեցին նրան մեկ տարի սպասել։ Հետագայում Բլոսոմը գրեց. «Անչափ ուրախ եմ, որ հետևեցի այդ իմաստուն խորհրդին։ Մեկ տարվա ընթացքում ես որոշակի հասունություն ձեռք բերեցի և սկսեցի նկատել, որ այդ երիտասարդը չուներ այն հատկությունները, որոնց շնորհիվ նա լավ ամուսին կլիներ։ Նա, ի վերջո, թողեց կազմակերպությունը, իսկ ես, փաստորեն, խուսափեցի դժբախտությունից։ Ի՜նչ լավ է իմաստուն ծնողներ ունենալը, որոնց կարելի է ապավինել»։

‘Ամուսնանալ միայն Տիրոջով’

16. ա) ‘Տիրոջով ամուսնանալու’ խրատին հետևելու մեջ ինչպե՞ս է հնարավոր, որ քրիստոնյաները փորձության ենթարկվեն։ բ) Երբ գայթակղություն է առաջանում ամուսնանալ անհավատի հետ, ինչի՞ մասին քրիստոնյան պետք է խորհի։

¹⁶ Եհովան հստակ առաջնորդություն է տվել քրիստոնյաներին. ‘Ամուսնանալ միայն Տիրոջով’ (Ա Կորնթացիս 7։39)։ Հնարավոր է, որ քրիստոնյա ծնողներն ու իրենց զավակները այս առումով փորձության ենթարկվեն։ Ինչպե՞ս։ Գուցե երիտասարդները ամուսնանալու ցանկություն ունեն, բայց ժողովում համապատասխան զույգ չեն գտնում։ Թերևս այդպիսի խնդիր կա։ Որոշակի վայրում, հնարավոր է, տղամարդիկ ավելի քիչ են, քան կանայք, կամ գուցե տվյալ շրջանում հարմար թեկնածու չկա։ Երիտասարդը, որը ժողովի նվիրված անդամ չէ, կարող է հետաքրքրություն ցուցաբերել երիտասարդ քրոջ հանդեպ (կամ հակառակը). նման պարագայում Եհովայի սահմանած չափանիշների հետ փոխզիջման գնալու ճնշում է առաջանում։ Այդպիսի հանգամանքներում լավ կլիներ խորհել այն մասին, թե ինչպես վարվեց Աբրահամը։ Աստծո հետ իր փոխհարաբերությունները նա պահպանեց նաև նրանով, որ հոգ տարավ, որպեսզի իր որդի Իսահակը ամուսնանա Եհովայի ճշմարիտ երկրպագուի հետ։ Նույնը արեց Իսահակը իր որդու՝ Հակոբի առնչությամբ։ Դա նրանց բոլորից ջանքեր խլեց, բայց դա հաճելի էր Աստծուն և, արդյունքում, նրանք օրհնվեցին (Ծննդոց 28։1–4)։

17. Ինչո՞ւ է անհավատի հետ ամուսնանալը, ըստ էության, դժբախտություն բերում, և ո՞րն է ‘Տիրոջով ամուսնանալու’ գլխավոր պատճառը։

¹⁷ Սակավ են այն դեպքերը, երբ անհավատ կողակիցները վերջիվերջո դառնում են քրիստոնյա։ Այնուհանդերձ, անհավատ մարդու հետ ամուսնանալը հաճախ դժբախտ հետևանքներ է ունենում։ Ովքեր անհավասար լծակիցներ են, նրանք չունեն նույն հավատալիքները, սկզբունքները և նպատակները (Բ Կորնթացիս 6։14)։ Այդ պատճառով հնարավոր է, որ ամուսիններն ավելի քիչ հաղորդակցվեն իրար հետ, ավելի պակաս ուրախ լինեն։ Օրինակ՝ մի քրիստոնյա կին իր խոր ցավն է արտահայտում, որ ժողովի թարմացուցիչ հանդիպումից հետո, գնալով տուն, չի կարող անհավատ ամուսնու հետ հոգևոր հարցեր քննարկել։ Անտարակույս, հարկավոր է ‘Տիրոջով ամուսնանալ’ հատկապես այն պատճառով, որ մենք ցանկանում ենք հավատարիմ մնալ Եհովային։ Երբ հնազանդվում ենք Աստծո Խոսքին, մեր սրտերը չեն դատապարտում մեզ, քանզի անում ենք «նրան հաճելի բաները» (Ա Յովհաննէս 3։21, 22)։

18. Երբ ցանկանում ենք ամուսնանալ, ո՞ր կարևոր հանգամանքներին է հարկավոր ուշադրություն դարձնել և ինչո՞ւ։

¹⁸ Երբ մտածում ենք ամուսնանալու մասին, ապա հարկավոր է գլխավորապես ուշադրություն դարձնել թեկնածուի արժանիքներին ու հոգևորությանը։ Աստծուն սիրող և նրան սրտանց նվիրված մարդու քրիստոնեական հատկությունները շատ ավելի արժեքավոր են, քան արտաքին գրավչությունը։ Նրանք, ովքեր գնահատում և կատարում են հոգևորապես ուժեղ ամուսիններ լինելու իրենց պարտականությունը, վայելում են Աստծո հավանությունը։ Եթե ամուսինները նվիրված են Ստեղծիչին և ամբողջությամբ ընդունում են նրա առաջնորդությունը, ապա նրանց ամուսնական կապը հնարավորին չափ ամուր կլինի։ Այսկերպ ամուսինները պատվում են Եհովային, սկսում են իրենց ամուսնությունը հոգևորապես ամուր գետնի վրա, ինչն էլ կնպաստի նրանց ամրակուռ միությանը։

[ծանոթագրություն]

Ինչպե՞ս կպատասխանեք

• Ամուսնական կողակից ընտրելու մեջ ինչո՞ւ է անհրաժեշտ Աստծո առաջնորդությունը։

• Ինչպե՞ս է ամուսնական կապը ամրանում նրանով, որ կողակիցները նվիրված են Աստծուն։

• Ինչպե՞ս կարող են ծնողները նախապատրաստել իրենց երեխաներին ամուսնությանը։

• Ինչո՞ւ է կարևոր ‘ամուսնանալ միայն Տիրոջով’։

[նկարներ 17–րդ էջի վրա]

Դուք կարող եք երջանիկ լինել, եթե կողակից ընտրելիս հաշվի առնեք Աստծո խորհուրդը

[նկարներ 18–րդ էջի վրա]

‘Միայն Տիրոջով ամուսնանալը’ մեծ օրհնություններ է բերում