Երեցնե՛ր, պատրաստեք եղբայրներին պարտականություններ կրելու

ԵՀՈՎԱՅԻ վկաների՝ ամբողջ աշխարհում գործող ժողովներում եղբայրների կենսական կարիք է զգացվում. եղբայրներ, ովքեր կկարողանային ժողովում պատասխանատվություններ ստանձնել։ Դա պայմանավորված է երեք հիմնական պատճառներով։

Առաջին՝ Եհովան կատարում է իր հետևյալ խոստումը. «Ամենափոքրը հազար պիտի դառնայ» (Եսայիա 60։22)։ Աստծո ողորմության շնորհիվ վերջին երեք տարիների ընթացքում գրեթե մեկ միլիոն նոր աշակերտներ են մկրտվել որպես Եհովայի վկաներ։ Որպեսզի նրանք կարողանան հասնել քրիստոնեական հասունության, պատասխանատու եղբայրների օգնությունն է անհրաժեշտ (Եբրայեցիս 6։1)։

Երկրորդ՝ որոշ եղբայրներ, ովքեր տասնյակ տարիներ ծառայել են որպես երեցներ, ծերության կամ հիվանդության պատճառով ստիպված են թեթևացնել պարտականությունների իրենց բեռը, որ կրում են ժողովում։

Երրորդ՝ եռանդուն քրիստոնյա երեցներից ոմանք այսօր ծառայում են Հիվանդանոցների հետ կապի կոմիտեներում, Տարածաշրջանային շինարարական կոմիտեներում կամ էլ Համաժողովների սրահների կոմիտեներում։ Հավասարակշռվածություն ցուցաբերելով՝ նրանք որոշ դեպքերում ստիպված են հրաժարվել իրենց ինչ–ինչ պարտականություններից, որոնք կրում են տեղի ժողովում։

Ինչպե՞ս բավարարել որակելի եղբայրների հրատապ պահանջը։ Ահա՛ բանալին՝ հարկավոր է պատրաստել նրանց։ Աստվածաշունչը խրախուսում է քրիստոնյա վերակացուներին պատրաստել ‘հավատարիմ մարդկանց, որ կարող լինեն ուրիշներին էլ ուսուցանել’ (Բ Տիմոթէոս 2։2)։ Ըստ մի բառարանի՝ «պատրաստել» բայը նշանակում է «սովորեցնել, անհրաժեշտ գիտելիքներ՝ հմտություններ տալ որևէ նպատակի համար»։ Եկեք տեսնենք, թե ինչպես կարող են երեցները սովորեցնել ընդունակ եղբայրներին։

Հետևեք Եհովայի օրինակին

Անկասկած, Հիսուսն իր ծառայության մեջ գիտակ էր և հմուտ։ Եվ դա զարմանալի չէ, չէ՞ որ նա կրթվել էր անձամբ Եհովա Աստծուց։ Իսկ ո՞ր գործոնները այդ ուսուցումն արդյունավետ դարձրին։ Յովհաննէս 5։20–ի համաձայն՝ Հիսուսը երեք գործոններ նշեց. «Հայրը [1] սիրում է Որդուն, եւ [2] այն ամէնը, ինչ ինքն է անում, ցոյց է տալիս նրան. եւ [3] նրան ցոյց կը տայ սրանից շատ աւելի մեծ գործեր»։ Մենք իր ողջ խորությամբ կպատկերացնենք այն, թե ինչ է իր մեջ ընդգրկում պատրաստելը, եթե վերլուծենք այս երեք գործոնները։

Առաջին՝ ուշադրություն դարձրեք, թե Հիսուսը նախևառաջ ինչ ասաց. «Հայրը սիրում է Որդուն»։ Արարչագործության հենց սկզբից Եհովայի և իր Որդու միջև ջերմ կապեր էին հաստատվել։ Առակաց 8։30–ի խոսքերն ավելի վառ լույս են սփռում նրանց հարաբերությունների վրա. «Այն ժամանակ ես [Հիսուս Քրիստոսը] նորա [Եհովա Աստծո] կշտին ճարտարապետ էի, եւ նորա ուրախութիւնն էի ամեն օր՝ զուարճանալով նորա առաջին ամեն ժամանակ»։ Անկասկած, Հիսուսը վստահ էր, որ Եհովայի ‘ուրախությունն էր ամեն օր’։ Եվ աշխատելով Հոր կողքին՝ նա չէր թաքցնում իր ուրախությունը։ Ի՜նչ լավ է, երբ քրիստոնյա երեցների և նրանց միջև, ում երեցները սովորեցնում են, մտերիմ, ջերմ փոխհարաբերություններ են տիրում։

Երկրորդ՝ Հիսուսն ասաց, որ Հայրը «այն ամէնը, ինչ ինքն է անում, ցոյց է տալիս նրան»։ Այս խոսքերը հաստատում են Առակաց 8։30–ում արձանագրվածը, այսինքն, որ Տիեզերքի արարման ժամանակ Հիսուսը «նորա կշտին» էր, Եհովայի մոտ (Ծննդոց 1։26)։ Երեցները կարող են հետևել այս հիանալի օրինակին՝ ուս ուսի տված աշխատելով ծառայողական օգնականների հետ և նրանց ցույց տալով, թե ինչպես հարկ եղած ձևով կատարեն իրենց պարտականությունները ժողովում։ Սակայն ուսուցման կարիք են զգում ոչ միայն նրանք, ովքեր վերջերս են նշանակվել որպես ծառայողական օգնականներ, այլ նաև նրանք, ովքեր արդեն երկար տարիներ ձգտում են ժողովում ստանձնել ավելի մեծ պատասխանատվություններ, բայց դեռ չեն նշանակվել որպես երեցներ (Ա Տիմոթէոս 3։1)։ Վերջիններս այդպիսի եղբայրներին պետք է կոնկրետ խորհուրդ տան, որպեսզի նրանք իմանան, թե որ ոլորտում արժե կատարելագործվել։

Ենթադրենք՝ ծառայողական օգնականը վստահելի է, ճշտապահ և բարեխղճորեն կատարում է իր պարտականությունները։ Նա թերևս լավ ուսուցիչ է և ժողովում գերազանց կատարում է տարբեր առաջադրանքներ։ Բայց այդ ամենի հետ մեկտեղ՝ նա գուցե չի նկատում, որ հավատակիցների հետ վարվելիս սովորաբար կտրուկ է։ Երեցը պետք է հայտնի լինի իր «հեզությամբ, որ հատուկ է իմաստությանը» (Յակոբոս 3։13, ՆԱ)։ Երեցը բարի գործ կանի, եթե սիրալիր ձևով զրուցի ծառայողական օգնականի հետ՝ հստակորեն նկարագրելով խնդիրը, կոնկրետ օրինակներ բերելով և գործնական խորհուրդ տալով, թե ինչպես բարելավվել տվյալ հարցում։ Եթե երեցի խոսքերը «աղով համեմուած» լինեն, նրա խորհուրդը, ամենայն հավանականությամբ, հեշտ կընդունվի (Կողոսացիս 4։6)։ Իհարկե, երեցներին ավելի հեշտ կլինի իրենց օգնությունն իրականացնել, եթե ծառայողական օգնականն անկեղծ է և հակված՝ խորհուրդներ ընդունելու (Սաղմոս 141։5)։

Որոշ ժողովներում երեցները միշտ ուշադրություն են նվիրում ծառայողական օգնականներին։ Օրինակ՝ նրանք ընդունակ ծառայողական օգնականներին հրավիրում են միանալ իրենց՝ այցելելու հիվանդներին կամ ծերերին։ Այդպես ծառայողական օգնականները հովվական այցելություններ կատարելու փորձ են ձեռք բերում։ Անշուշտ, ծառայողական օգնականն ինքը շատ բան կարող է անել իր հոգևոր աճի համար։ Տեսեք ներքևի՝ «Ինչ կարող են անել ծառայողական օգնականները» շրջանակը։

Երրորդ գործոնը, որը Հիսուս Քրիստոսի ուսուցումն այդքան արդյունավետ դարձրեց, այն է, որ Եհովան պատրաստել էր նրան առաջիկա ծառայությանը։ Հիսուսն ասաց, որ Հայրը «նրան ցոյց կը տայ սրանից շատ աւելի մեծ գործեր»։ Այն փորձը, որ Քրիստոսը ձեռք բերեց երկրի վրա ապրելիս, օգնեց նրան զարգացնելու այնպիսի հատկություններ, որոնք անհրաժեշտ կլինեին իր ապագա հանձնարարությունների համար (Եբրայեցիս 4։15; 5։8, 9)։ Օրինակ՝ շուտով Հիսուսը կստանա անչափ կարևոր հանձնարարություն՝ հարություն տալ և հետո դատել միլիարդավոր մահացածների (Յովհաննէս 5։21, 22)։

Պատրաստելով ծառայողական օգնականներին՝ անհրաժեշտ է, որ երեցները հիշեն ապագա կարիքների մասին։ Թեպետ այժմ գուցե թվում է, որ երեցների և ծառայողական օգնականների թիվը բավարար է, սակայն ինչպիսի՞ն կլինի պարագան, եթե նոր ժողով կազմավորվի... Իսկ եթե մի քանի՞սը։ Անցած երեք տարիների ընթացքում ամբողջ աշխարհում ավելի քան 6 000 նոր ժողովներ է կազմավորվել։ Որքա՜ն նոր երեցների ու ծառայողական օգնականների կարիք է զգացվում, որոնք կհոգային այս նոր ժողովների կարիքները։

Երեցնե՛ր, հետևո՞ւմ եք Եհովայի օրինակին՝ զարգացնելով ջերմ, մտերիմ հարաբերություններ նրանց հետ, ում ուսուցանում եք։ Ցույց տալի՞ս եք նրանց, թե ինչպես պետք է կատարեն իրենց գործը։ Հիշո՞ւմ եք ժողովի ապագա կարիքների մասին։ Օգտակար է հետևել Հիսուսին սովորեցնելու Եհովայի օրինակին. չէ՞ որ այդ դեպքում Աստված առատորեն կօրհնի շատերին։

Մի վախեցեք կիսել ձեր պարտականությունները

Պատահում է, որ փորձառու երեցները, ովքեր սովոր են կատարել բազում կարևոր հանձնարարություններ, հոժարությամբ չեն կիսում իրենց պարտականությունները մյուսների հետ։ Գուցե նրանք արդեն փորձել են այդ անել, սակայն դա գոհացուցիչ արդյունքների չի հանգեցրել։ Այդպիսով՝ երեցները կարող են զարգացնել մոտավորապես այսպիսի տրամադրվածություն. «Եթե ուզում ես, որ ինչ–​որ բան լավ արվի, ինքդ արա»։ Բայց այսպիսի կարծիքը ներդաշնա՞կ է Եհովայի կամքի հետ։ Չէ՞ որ Աստվածաշնչում ասվում է, որ քիչ փորձ ունեցողները սովորում են ավելի փորձառուներից (Բ Տիմոթէոս 2։2)։

Պողոս առաքյալը հուսահատվեց, երբ իր զուգընկերներից մեկը՝ Մարկոս կոչված Հովհաննեսը, Պամփյուլիայում ծառայելիս թողեց իրեն և տուն վերադարձավ (Գործք 15։38, 39)։ Սակայն այդ ձախողումից հետո Պողոսը չդադարեց օգնել մյուսներին փորձ ձեռք բերել ծառայության մեջ։ Նա ընտրեց մեկ այլ երիտասարդ քրիստոնյայի՝ Տիմոթեոսին և պատրաստեց նրան միսիոներական ծառայությանa (Գործք 16։1–3)։ Բերիայում միսիոներներն այնպիսի դաժան հակառակության բախվեցին, որ Պողոսի այնտեղ մնալն այլևս իմաստ չուներ։ Այդ պատճառով նա նորաստեղծ ժողովի հոգսը թողեց հասուն քրիստոնյա երեց Շիղայի և Տիմոթեոսի ուսերին (Գործք 17։13–15)։ Անկասկած՝ Տիմոթեոսը շատ բան սովորեց Շիղայից։ Ավելի ուշ, երբ Տիմոթեոսը պատրաստ էր վերցնել նոր պարտականություններ, Պողոսը նրան ուղարկեց Թեսաղոնիկե՝ այնտեղի ժողովին ոգևորելու (Ա Թեսաղոնիկեցիս 3։1–3)։

Պողոսի և Տիմոթեոսի փոխհարաբերությունները զուտ պաշտոնական ու սառը չէին։ Նրանց միջև ջերմ մտերմություն կար։ Կորնթացիներին ուղղված իր նամակում Պողոսը հիշատակեց Տիմոթեոսին (որին պատրաստվում էր ուղարկել այնտեղ) որպես ‘իր սիրելի և հավատարիմ որդին ի Տեր’։ Պողոսը գրեց. ‘[Տիմոթեոսը] կհիշեցնի ձեզ իմ ճանապարհները ի Քրիստոս Հիսուս’ (Ա Կորնթացիս 4։17)։ Տիմոթեոսը հաճույքով սովորում էր Պողոսից. արդյունքում նա որակելի դարձավ իր պարտականությունները կատարելու համար։ Շատ երիտասարդ եղբայրներ դարձել են ընդունակ ծառայողական օգնականներ, երեցներ և նույնիսկ շրջանային վերակացուներ, քանի որ փորձ են ձեռք բերել՝ սովորելով հոգատար երեցներից, ովքեր անհրաժեշտ ուշադրություն են նվիրել երիտասարդներին, ինչպես Պողոսը՝ Տիմոթեոսին։

Երեցնե՛ր, պատրաստե՛ք եղբայրներին

Կասկած չկա, որ այսօր կատարվում է Եսայիա 60։22–ում արձանագրված մարգարեությունը։ Ամենափոքրը Եհովան «զօրաւոր ազգ» է դարձնում։ Որպեսզի այդ ազգը «զորավոր» մնա, այն պետք է լավ կազմակերպված լինի։ Երեցնե՛ր, ինչո՞ւ չմտածեք այն մասին, թե ինչպես ուսուցանել Եհովային նվիրված եղբայրներին, ովքեր պատրաստ են վերցնելու լրացուցիչ պատասխանատվություններ։ Համոզվեք, որ յուրաքանչյուր ծառայողական օգնական պարզորոշ գիտի, թե ինչում է նրան հարկավոր բարելավվել, որպեսզի աճի հոգևորապես։ Իսկ դո՛ւք, մկրտված եղբայրներ, որքան հնարավոր է շատ օգուտներ քաղեք ձեր հանդեպ ցուցաբերած անհատական ուշադրությունից։ Բաց մի թողեք և ոչ մի հնարավորություն՝ զարգացնելու ձեր ունակությունները, գիտությունն ու փորձը։ Եհովան, անշուշտ, կօրհնի նման ծրագիրը, որ սիրով իրականացվում է հօգուտ եղբայրների (Եսայիա 61։5)։

[ծանոթագրություն]

[շրջանակ 30-րդ էջի վրա]

Ինչ կարող են անել ծառայողական օգնականները

Թեպետ երեցներին անհրաժեշտ է ուսուցանել ծառայողական օգնականներին, վերջիններս, իրենց հերթին, շատ բան կարող են անել հոգևորապես աճելու համար։

—Ծառայողական օգնականները իրենց պարտականությունները կատարելու մեջ պետք է լինեն ջանասեր և հուսալի։ Նրանք նաև պետք է սովորեն կանոնավորաբար և ջանադրաբար ուսումնասիրել Աստվածաշունչը։ Նրանց աճը մեծ մասամբ կախված է նրանից, թե ինչպես են Գրությունները քննում և կյանքում կիրառում իմացածը։

—Երբ ծառայողական օգնականը պատրաստվում է քրիստոնեական հանդիպման ժամանակ ելույթ ունենալ, կարիք չկա քաշվելու փորձառու երեցից խորհուրդ հարցնելուց, թե ինչպես նյութը մատուցել։

—Ծառայողական օգնականը կարող է խնդրել երեցին ուշադրությամբ հետևել, թե նա ինչպես է մատուցում աստվածաշնչյան ելույթը, և իրեն խորհուրդ տալ։

Ծառայողական օգնականներին հարկավոր է երեցներից հարցնել, թե ինչում է հարկավոր բարելավվել, և կիրառել նրանց խորհուրդները։ Դրա շնորհիվ նրանց հաջողությունը ‘հայտնի կլինի բոլորին’ (Ա Տիմոթէոս 4։15)։