Ծառայության կատարելագործման դպրոց. մեծ և արդյունավետ դուռ

¹ Երեմիա մարգարեի միջոցով Եհովան կանխագուշակել էր. «Նորանց [իմ ժողովրդի] վերայ հովիւներ պիտի կանգնեցնեմ, որ նորանց հովուեն, եւ նորանք այլ եւս պիտի չ’վախենան եւ չ’զարհուրեն, եւ պիտի չ’պակասեն» (Երեմ. 23։4)։ Այսօր այդպիսի հովվական աշխատանք կատարվում է բոլոր ազգերի ժողովուրդների մեջ։ Այդ գործը անում են ժողովների տասնյակ հազարավոր երեցներ։ Բացի այդ, ցողակաթիլների չափ շատ երիտասարդ տղամարդիկ հոժարակամորեն իրենց ներկայացրել են Եհովային ծառայելու (Սաղ. 110։3)։ Ի՜նչ մեծ օրհնություն են այս խոնարհ եղբայրները Աստծո ծառաների ժողովների համար։ Քանի որ հոգևոր բերքահավաքը շարունակվում է, դեռ հարկ եղած որակումներ ունեցող տղամարդկանց կարիք է զգացվում, որոնք պատրաստակամորեն կծառայեն իրենց եղբայրներին։

² Ամուրի երեցներին և ծառայող օգնականներին կրթություն տալու համար գոյություն ունի մի հիանալի դպրոց՝ Ծառայության կատարելագործման դպրոցը, որը օգնում է նրանց ավելի մեծ պատասխանատվություններ վերցնել։ 1987 թ.–ից՝ դպրոցի հիմնադրումից ի վեր անցկացվել են 999 դասարաններ, որոնցում կրթություն են ստացել ավելի քան 22 000 ուսանողներ մոտավորապես 140 երկրներից։ Այս եղբայրների համար դպրոցը «մեծ եւ արդիւնաւոր դուռ է» եղել (Ա Կորնթ. 16։9)։

³ Դպրոցի նպատակը։ Ծառայության կատարելագործման դպրոցի նպատակն է ուսուցանել և պատրաստել համապատասխան որակումներ ունեցող տղամարդկանց, որպեսզի նրանք կարողանան իրենց ուսերին վերցնել պատասխանատվություններ, որտեղ էլ որ դրա կարիքը զգացվի կազմակերպության մեջ։ Դպրոցը նրանց ավելի ունակ է դարձնում ավետարանչական գործում առաջնորդություն վերցնելու, հոտը հովվելու և ժողովում ուսուցանելու համար։ Շրջանավարտներից ոմանք նշանակվում են որպես հատուկ ռահվիրաներ կամ շրջագայող վերակացուներ իրենց երկրներում կամ էլ արտերկրում։ Ուրիշներ էլ նշանակում են ստանում ծառայելու իրենց ժողովներում կամ մասնաճյուղի վերահսկողության տակ գտնվող այնպիսի տարածքներում, որտեղ քարոզիչների ավելի մեծ կարիք կա։

⁴ Ութշաբաթյա դասընթացի ժամանակ ուսանողները Աստվածաշնչի խորը ուսումնասիրություն են կատարում։ Նրանք ամենայն մանրամասնությամբ քննում են աստվածաշնչյան բազմաթիվ ուսուցումներ, հովվական գործին առնչվող պարտականություններ, ինչպես նաև առաջնորդող սկզբունքներ՝ քրիստոնեական ապրելակերպին վերաբերող խնդիրները լուծելու համար։ Նրանք նաև իմանում են, թե վերահսկողական, իրավական և կազմակերպչական հարցերի մասին ինչ է սովորեցնում Աստվածաշունչը։ Նրանք առանձնահատուկ կրթություն են ստանում հռետորական արվեստը բարելավելու համար, նաև նրանց անհատական օգնություն է ցույց տրվում, որպեսզի հոգևորապես ավելի արագ առաջադիմեն։

⁵ Պահանջներ։Ինչ խոսք, այս դպրոցում սովորելու ցանկություն ունեցողների համար բարձր պահանջներ են դրված։ Թեկնածուն պետք է երեց լինի կամ ամենաքիչը երկու տարի անընդմեջ ծառայած լինի որպես ծառայող օգնական։ Նա պետք է լինի ամուրի՝ 23–50 տարեկան։ Թեկնածուն պետք է կարողանա գրել, կարդալ և խոսել այն լեզվով, որով անցկացվում է դպրոցը, բացի այդ, պետք է ֆիզիկապես առողջ լինի, որպեսզի հատուկ հոգածության կամ բուժման կարիք չունենա։ Նախընտրությունը տրվում է ընդհանուր ռահվիրաներին։

⁶ Այդ կամավորները պետք է պատրաստակամ և ունակ լինեն ծառայելու ցանկացած տեղ, որտեղ իրենց կարիքը կա։ Նրանք պետք է այնպիսի ոգի դրսևորեն, ինչպիսին ուներ Եսայիա մարգարեն, որը հոժարակամորեն ներկայացրեց իրեն հատուկ հանձնարարություն կատարելու համար՝ ասելով. «Ահա ես, ինձ ուղարկիր» (Ես. 6։8)։ Նա նաև իր ողջ կյանքի ընթացքում խոնարհություն դրսևորեց։ Նրանք, ովքեր Ծառայության կատարելագործման դպրոցի համար դիմում են լրացնում, պետք է իրենց եղբայրների հանդեպ սեր ու նրանց ծառայելու ցանկություն ունենան և ոչ թե ձգտեն բարձր դիրքի։ Այսպիսի հիանալի կրթություն ստանալուց հետո շրջանավարտներից սպասվում է, որ իրենց սովորածը կիրառեն հօգուտ մյուսների (Ղուկ. 12։48)։

⁷ Օգուտները։ Այս խորացված ուսուցման ութ շաբաթների ընթացքում շրջանավարտները ‘սնվում են հավատի խոսքերով և բարի վարդապետությամբ’ (Ա Տիմոթ. 4։6)։ Դա նրանց տալիս է հարկ եղած որակումները, որպեսզի նրանք օգնեն ու քաջալերեն մյուսներին այն ժողովներում և շրջաններում, որտեղ նշանակված են։ Բազմաթիվ վայրերում, ուր նշանակվել են Ծառայության կատարելագործման դպրոցի շրջանավարտներ, նկատվել է, որ քարոզչական գործը ավելի է ընդարձակվել, ավելացել է ռահվիրաների թիվը հատկապես երիտասարդների շրջանում, և անհատական ուշադրություն է ցուցաբերվել այն անհատների հանդեպ, ովքեր նորերս են միացել Աստծո ժողովրդին։

⁸ 23–50 տարեկան ամուրի երեց կամ ծառայող օգնակա՞ն ես։ Ի՞նչ ես մտածում Ծառայության կատարելագործման դպրոցի համար դիմում լրացնելու մասին։ Երիտասարդ եղբա՞յր ես. մտածո՞ւմ ես Եհովայի ծառայության մեջ քո ապագա նպատակների մասին։ Չարժե՞ արդյոք ջանք թափել պարզ, շեղումներից զերծ կյանքով ապրել, որպեսզի կարողանաս ներս մտնել այս ‘մեծ և արդյունավոր դռնով’։ Դա քեզ մեծ ուրախություն և բավականություն կպարգևի։ Ինչ խոսք, Ծառայության կատարելագործման դպրոցը օրհնություններ է բերել ոչ միայն շրջանավարտներին, այլև Աստծո ծառաների՝ ողջ աշխարհով մեկ սփռված ժողովներին։

[3–րդ էջի վրայի շրջանակը]

Ինչ օգուտներ են նրանք ստացել կրթությունից

«Այդ ուսուցումը իսկապես բարձրացրեց ծառայությանս որակը, նաև օգնեց, որ իմաստությամբ կատարեմ հովվական գործը՝ գործածելով Գրությունները»։

«Դպրոցի շնորհիվ ավելի վստահ եմ զգում ժողովում ունեցած տարբեր պարտականությունները կատարելիս»։

«Այն փոփոխություն մտցրեց իմ կյանքի գրեթե բոլոր ոլորտներում, նաև փոխեց աստվածապետության և Աստծո կազմակերպության վերաբերյալ իմ տեսակետը»։

«Իմ ստացած կրթությունը օգնեց ինձ հասկանալ, թե որքան կարևոր է պատրաստ լինել ծառայելու այնտեղ, որտեղ ավելի մեծ պահանջ կա»։