Աստծու զորության մասին վկայում են աստղերը

«Վեր բարձրացրէք ձեր աչքերը եւ նայեցէք, ո՞վ է ստեղծել սորանց. նորանց զօրքերը թիւով հանողը, որ նորանց ամենին կանչում է անունով՝ մեծ իշխանութեամբը եւ սաստիկ զօրութեամբը. մէկը չի կորչիլ» (ԵՍԱՅԻԱ 40։26)։

ԱՐԵԳԱԿԸ միջին չափի աստղ է։ Այդուհանդերձ, նրա զանգվածը 330 000 անգամ մեծ է Երկրի զանգվածից։ Երկրին մոտ գտնվող աստղերի մեծ մասը արևից փոքր է։ Սակայն այլ աստղեր, օրինակ՝ Կարապի V382–ը, առնվազն 27 անգամ ավելի մեծ զանգված ունեն, քան Արեգակը։

Որքա՞ն էներգիա է արձակում արևը։ Պատկերացրեք, թե որքան թեժ պետք է լինի կրակը, որ 15 կիլոմետր հեռավորության վրա դուք զգաք դրանից եկող ջերմությունը։ Արևի միջին հեռավորությունը երկրագնդից մոտ 150 միլիոն կիլոմետր է։ Սակայն շոգ եղանակին նրա ջերմությունից նույնիսկ կարող են բշտիկներ առաջանալ մաշկի վրա։ Ուշագրավ է, որ Արեգակի էներգիայի միայն մոտ մեկ միլիարդերորդ մասն է հասնում երկիր։ Մինչդեռ Արեգակից ստացվող էներգիայի այդ քանակությունը բավական է մեր մոլորակի վրա կյանքը պահպանելու համար։

Իրականում, ըստ գիտնականների հաշվարկների՝ Արեգակից դուրս եկող ողջ էներգիան բավական է Երկրի մեծության մոտ 31 տրիլիոն մոլորակների էներգիայով ապահովելու համար։ Էներգիայի այս ահռելի հոսքը պատկերացնելու համար այսպիսի օրինակ բերենք. եթե կարողանայինք մեկ վայրկյանով հավաքել Արեգակի ամբողջ էներգիան, ապա հնարավոր կլիներ Միացյալ Նահանգներին «հաջորդ 9 000 000 տարիներին ապահովել էներգիայով, եթե այդ էներգիան գործածվեր այն չափով, որ չափով գործածվում է այժմ» («Space Weather Prediction Center» (SWPC) վեբ կայք)։

Արևի էներգիան դուրս է գալիս միջուկից, որը նման է միջուկային մի ռեակտորի, որում ատոմները բախվում են իրար և էներգիա արձակում։ Արևն այնքան մեծ է, և նրա միջուկն այնքան խիտ է, որ միլիոնավոր տարիներ են պահանջվում, որ միջուկում ստեղծվող էներգիան դուրս գա արևի մակերես։ «Եթե այսօր Արեգակը դադարեր էներգիա արձակելուց, ապա միայն 50 000 000 տարի հետո Երկրի վրա կզգացվեր դա» (SWPC վեբ կայք)։

Իսկ այժմ քննենք հետևյալ փաստը. երբ պարզկա գիշերով նայում եք երկնքին, տեսնում եք հազարավոր աստղեր։ Դրանցից յուրաքանչյուրը հսկայական էներգիա է արձակում, այնքան, որքան որ արձակում է արևը։ Իսկ ըստ գիտնականների հաշվարկների՝ տիեզերքում կան հարյուր միլիարդավոր աստղեր։

Որտեղի՞ց են առաջացել աստղերը։ Այսօր գիտնականներից շատերը կարծում են, որ տիեզերքը առաջ է եկել պատահականորեն մոտ 14 միլիարդ տարի առաջ, և դրա համար եղել են ինչ–որ պատճառներ, որոնք դեռ հայտնի չեն իրենց։ Աստվածաշունչը հստակորեն ասում է. «Սկզբումն Աստուած ստեղծեց երկինքը եւ երկիրը» (Ծննդոց 1։1)։ Անկասկած, նրան, ով ստեղծել է էներգիա արտադրող հսկայական մեքենաները, որոնց կոչում ենք աստղեր, կարելի է համարել «սաստիկ զորություն» ունեցող անձնավորություն (Եսայիա 40։26)։

Ինչպես է Աստված օգտագործում իր զորությունը

Եհովա Աստված օգտագործում է իր ուժը, որպեսզի զորացնի նրանց, ովքեր կատարում են իր կամքը։ Օրինակ՝ Պողոս առաքյալը իր ուժերը ներդրեց մարդկանց Աստծու մասին սովորեցնելու գործում։ Նա գերմարդ չէր, սակայն կարողացավ շատ բարի գործեր անել՝ չնայած ուժգին հակառակությանը։ Ինչպե՞ս։ Նա հասկանում էր, որ «սովորականին գերազանցող զորություն» է ստանում Աստծուց (2 Կորնթացիներ 4։7–9)։

Եհովա Աստված իր զորությունն օգտագործել է նաև կործանելու համար նրանց, ովքեր գիտակցաբար ոտնահարում են իր բարոյական չափանիշները։ Հիսուս Քրիստոսը խոսեց Սոդոմի և Գոմորի կործանման, ինչպես նաև Նոյի օրերի Ջրհեղեղի մասին՝ ցույց տալով, որ Եհովան ընտրողաբար է օգտագործում իր կործանելու զորությունը։ Նա մարգարեացավ, որ շուտով Եհովան կրկին իր զորությունը կօգտագործի կործանելու համար նրանց, ովքեր արհամարհում են Աստծու չափանիշները (Մատթեոս 24։3, 37–39; Ղուկաս 17։26–30)։

Այս ամենը ի՞նչ ազդեցություն է թողնում ձեզ վրա

Երբ խորհրդածեք Աստծու ունեցած զորության շուրջ, ինչի մասին վկայում են աստղերը, գուցե ունենաք այն նույն զգացումները, որ ուներ Դավիթ թագավորը։ Նա գրեց. «Երբոր տեսնում եմ քո երկինքը, քո մատների գործը՝ լուսինն ու աստղերը, որ դու հաստատեցիր, ինչ է մարդը որ դու յիշում ես նորան, եւ մարդի որդին, որ դու խնամք ես տանում նորա համար» (Սաղմոս 8։3, 4)։

Իսկապես, խոնարհության դրսևորում կլինի գիտակցել, որ մենք անչափ փոքր ենք՝ անծայրածիր տիեզերքի հետ համեմատած։ Սակայն մենք չպետք է վախենանք Աստծու զորությունից։ Եհովայի կողմից ներշնչված՝ Եսայիա մարգարեն գրեց այս մխիթարական խոսքերը. «Նա [Աստված] է յոգնածին ոյժ տուողը. եւ նա կարողութիւն չ’ունեցողին զօրութիւն է շատացնում։ Եւ երիտասարդներն կ’յոգնեն եւ կ’վաստակեն, եւ ընտիրները թուլութիւնով կ’թուլանան, բայց Տիրոջն ապաւինողները կ’նորոգուին ոյժով, թեւերով վեր կ’սլանան արծիւների պէս, կ’վազեն եւ չեն վաստակիլ, կ’գնան եւ չեն յոգնիլ» (Եսայիա 40։29–31)։

Եթե ցանկանում եք կատարել Աստծու կամքը, կարող եք վստահ լինել, որ նա ձեզ օգնելու համար իր սուրբ ոգին կտա։ Սակայն դուք պետք է խնդրեք այն (Ղուկաս 11։13)։ Աստծու աջակցությամբ դուք կարող եք տոկալ ցանկացած փորձության և ուժ ստանալ անելու համար այն, ինչը որ ճիշտ է (Փիլիպպեցիներ 4։13)։

[մեջբերում 7–րդ էջի վրա]

Աստծու աջակցությամբ դուք կարող եք ուժ ստանալ անելու համար այն, ինչը որ ճիշտ է

[նկարներ 7–րդ էջի վրա]

Ժամացույցի սլաքի ուղղությամբ վերևի ձախ անկյունից՝ Ջրհոս համաստեղություն, Բազումք աստղակույտ, Օրիոնի միգամածություն, Անդրոմեդա համաստեղություն

[նկարներ 7–րդ էջի վրա]

Արեգակի զանգվածը 330 000 անգամ մեծ է Երկրի զանգվածից

[նկարներ 7–րդ էջի վրա. թույլտվությամբ]

Pleiades: NASA, ESA and AURA/Caltech; all others above: National Optical Astronomy Observatories