Ինչպես է Կառավարիչ մարմինը գործում
ԵՀՈՎԱՅԻ ՎԿԱՆԵՐԻ Կառավարիչ մարմինը բաղկացած է Աստծուն նվիրված տղամարդկանցից, ովքեր օծյալներ են։ Նրանք ներկայացնում են հավատարիմ և իմաստուն ծառա դասակարգին, որի պարտականությունն է հոգևոր կերակուր մատակարարել, ինչպես նաև առաջնորդել ու խթանել Թագավորության քարոզչության գործը ողջ երկրագնդով մեկ (Մատթ. 24։14, 45–47)։
Կառավարիչ մարմնի հանդիպումները անցկացվում են ամեն շաբաթ՝ սովորաբար չորեքշաբթի օրը։ Դա հնարավորություն է տալիս այդ եղբայրներին միասնական լինելու և իրար հետ համագործակցելու (Սաղ. 133։1)։ Կառավարիչ մարմնի անդամները ծառայում են նաև տարբեր կոմիտեներում։ Յուրաքանչյուր կոմիտե պատասխանատու է Թագավորության շահերին առնչվող բնագավառներից մեկի համար։ Ստորև ներկայացվում է այդ կոմիտեների գործունեությունը։
◼ ԿՈՈՐԴԻՆԱՏՈՐՆԵՐԻ ԿՈՄԻՏԵ։ Այս կոմիտեն բաղկացած է Կառավարիչ մարմնի մյուս կոմիտեների կոորդինատորներից և քարտուղարից։ Վերջինս նույնպես Կառավարիչ մարմնի անդամ է։ Այն ապահովում է բոլոր կոմիտեների արդյունավետ և անխափան գործունեությունը։ Բացի այդ, այս կոմիտեն միջոցներ է ձեռնարկում Եհովայի վկաներին առնչվող արտակարգ իրավիճակների ժամանակ, երբ տեղի են ունենում աղետներ և այլ արտառոց դեպքեր, ինչպես նաև հալածանքներ։
◼ ԿԱԴՐԵՐԻ ԿՈՄԻՏԵ։ Այս կոմիտեի եղբայրներին վստահված է ամբողջ աշխարհի Բեթելի ընտանիքների անդամների անձնական և հոգևոր բարօրության, ինչպես նաև նրանց աջակցելու համար նախատեսված տարբեր միջոցառումների կազմակերպումը։ Այս կոմիտեն է զբաղվում Բեթելի ընտանիքների նոր անդամների ընտրությամբ ու հրավերով, ինչպես նաև լուծում է զանազան հարցեր՝ կապված նրանց՝ Բեթելի ծառայության հետ։
◼ ՀՐԱՏԱՐԱԿՉԱԿԱՆ ԿՈՄԻՏԵ։ Այս կոմիտեն վերահսկում է Աստվածաշնչի վրա հիմնված գրականության տպագրությունը, հրատարակությունը և առաքումը ամբողջ աշխարհում։ Նրա վերահսկողության տակ են մտնում տպագրատները և այն սեփականությունը, որը ձեռք է բերվում և շահագործվում է Եհովայի վկաների՝ իրավաբանական անձ հանդիսացող միավորումների կողմից։ Այս կոմիտեն իրականացնում է Թագավորության համաշխարհային գործի համար նվիրաբերված ֆինանսական միջոցների առավել արդյունավետ օգտագործումը։
◼ ԾԱՌԱՅՈՂԱԿԱՆ ԿՈՄԻՏԵ։ Այս կոմիտեի անդամները վերահսկում են քարոզչական գործունեությունը և զբաղվում են ժողովներին, ռահվիրաներին, երեցներին ու շրջագայող վերակացուներին առնչվող հարցերով։ Այն վերահսկում է նաև «Մեր թագավորական ծառայությունը» թերթիկի պատրաստումը, որոշում է, թե ովքեր կգան սովորելու «Գաղաադ» և Ծառայության կատարելագործման դպրոցներում, ինչպես նաև տալիս է շրջանավարտների նշանակումները։
◼ ՈՒՍՈՒՄՆԱԿԱՆ ԿՈՄԻՏԵ։ Այս կոմիտեն պատասխանատու է համաժողովների և ժողովների հանդիպումների ծրագրերի համար։ Այն Բեթելի ընտանիքների համար պատրաստում է հոգևոր ծրագրեր, կազմակերպում է տարբեր դպրոցներ, օրինակ՝ «Գաղաադ» դպրոցը և Ռահվիրայական ծառայության դպրոցը, ինչպես նաև պատրաստում է ձայնագրություններ և տեսանյութեր։
◼ ԳՐԱԿԱՆ ԿՈՄԻՏԵ։ Այս կոմիտեն հոգ է տանում, որ հոգևոր կերակուրը տպագրվի և հասնի մեր հավատակիցներին, ինչպես նաև ընթերցողների լայն շրջանին։ Կոմիտեն պատասխանում է աստվածաշնչային հարցերին, հավանություն է տալիս դրամաների սցենարներին ու ելույթների պլաններին։ Նաև վերահսկում է ամբողջ աշխարհում իրականացվող թարգմանչական գործը։
Պողոս առաքյալը օծյալների ժողովը նմանեցրեց մարմնի և նշեց, որ յուրաքանչյուր անդամի կատարած դերը շատ կարևոր է։ Նա շեշտեց նաև փոխկախվածության, միմյանց սիրելու և իրար հետ համագործակցելու կարևորությունը (Հռոմ. 12։4, 5; 1 Կորնթ. 12։12–31)։ Գլուխը՝ Հիսուս Քրիստոսը, մարմնի անդամներին տալիս է այն ամենը, ինչ անհրաժեշտ է լավ համագործակցության և հոգևորապես սնվելու համար (Եփես. 4։15, 16; Կող. 2։19)։ Այսպիսով՝ Կառավարիչ մարմինը Եհովայի սուրբ ոգու առաջնորդության ներքո կազմակերպված ձևով կատարում է իր պատասխանատվությունը։