Առաջնորդվիր սուրբ ոգով և ապրիր նվիրմանդ համաձայն
«Շարունակե՛ք ընթանալ ոգով և մարմնական ոչ մի ցանկություն չեք կատարի» (ԳԱՂ. 5։16)։
1. Ի՞նչ մկրտություն տեղի ունեցավ Պենտեկոստեին։
ՄԵՐ թվարկության 33 թ. Պենտեկոստեին հրաշք տեղի ունեցավ։ Հիսուսի հետևորդները սկսեցին խոսել տարբեր լեզուներով։ Բանն այն է, որ նրանք մկրտվել էին սուրբ ոգով և ստացել էին ոգու պարգևներից մեկը (1 Կորնթ. 12։4–10)։ Այդ ժամանակ Պետրոս առաքյալը իր խոսքն ուղղեց հավաքվածներին։ Տեսնելով այդ հրաշքն ու լսելով Պետրոսի խոսքերը՝ մարդիկ «մինչև իրենց սրտի խորքը ցնցվեցին»։ Արդյունքում նրանք հետևեցին առաքյալի հորդորին՝ զղջացին ու մկրտվեցին։ Աստվածաշնչում կարդում ենք. «Ովքեր սրտանց ընդունեցին նրա խոսքը, մկրտվեցին, և այդ օրը մոտ երեք հազար հոգի ավելացավ» (Գործ. 2։22, 36–41)։ Նրանք, Հիսուսի խոսքերի համաձայն, մկրտվեցին Հոր, Որդու և սուրբ ոգու անունով (Մատթ. 28։19)։
2, 3. ա) Ի՞նչ տարբերություն կա սուրբ ոգով մկրտվելու և սուրբ ոգու անունով մկրտվելու միջև։ բ) Ինչո՞ւ է ջրի մկրտությունը կարևոր քայլ բոլոր ճշմարիտ քրիստոնյաների համար։
2 Կա՞ արդյոք տարբերություն սուրբ ոգով մկրտվելու և սուրբ ոգու անունով մկրտվելու միջև։ Անշո՛ւշտ։ Սուրբ ոգով մկրտվածները «նորից են ծնվում»՝ դառնալով Աստծու օծյալ որդիներ (Հովհ. 3։3)։ Օծվելով՝ նրանք ստանում են երկնային թագավորներ ու քահանաներ լինելու հեռանկարը։ Այդ քրիստոնյաները Հիսուսի հոգևոր մարմնի մաս են կազմում (1 Կորնթ. 12։13; Գաղ. 3։27; Հայտն. 20։6)։ Պենտեկոստեին և դրանից հետո հենց այդպիսի մկրտություն տեղի ունեցավ, որի միջոցով Եհովան սկսեց հավաքել Քրիստոսի ժառանգակիցներին (Հռոմ. 8։15–17)։ Իսկ ի՞նչ կարելի է ասել սուրբ ոգու անունով մկրտվելու մասին, մի բան, որ արվում է Եհովայի ժամանակակից ծառաների համաժողովների ընթացքում։
3 Ջրի մկրտությունը կարևոր է բոլոր ճշմարիտ քրիստոնյաների համար։ Այդ քայլը պետք է կատարեն թե՛ երկնային հույս ունեցողները և թե՛ այն մարդիկ, ովքեր հույս ունեն հավիտյան ապրելու երկրի վրա։ Այդպես նրանք ցույց են տալիս, որ անվերապահորեն նվիրվել են Եհովային։ Անկախ նրանից, թե ինչ հույս է փայփայում անհատը, Աստծուն ընդունելի լինելու համար պետք է մկրտվի Հոր, Որդու և սուրբ ոգու անունով։ Դրանից հետո նա պետք է «շարունակի ընթանալ ոգով», ինչը կօգնի նրան ապրելու իր նվիրման համաձայն (կարդա՛ Գաղատացիներ 5։16)։ Իսկ դու վարվո՞ւմ ես այդպես։
«Ընթանանք ոգով»
4. Ի՞նչ է նշանակում «ընթանալ ոգով»։
4 «Ընթանալ ոգով» նշանակում է թույլ տալ, որ Աստծու գործուն ուժը ներգործի քեզ վրա ամեն օր։ Գաղատացիներ 5–րդ գլուխը հստակ ցույց է տալիս սուրբ ոգով առաջնորդվելու և մարմնի ցանկություններին հետևելու տարբերությունը (կարդա՛ Գաղատացիներ 5։17, 18)։
5. Ինչի՞ց կխուսափենք, եթե հետևենք սուրբ ոգու առաջնորդությանը։
5 Հետևելով սուրբ ոգու առաջնորդությանը՝ կկարողանաս խուսափել մարմնի գործերից, որոնցից են՝ «պոռնկությունը, անմաքրությունը, անառակ վարքը, կռապաշտությունը, ոգեհարցությունը, թշնամությունները, երկպառակությունները, խանդը, զայրույթի պոռթկումները, վեճերը, բաժանումները, աղանդավորությունը, նախանձը, հարբեցողությունները, խրախճանքները» (Գաղ. 5։19–21)։ Այլ կերպ ասած՝ «ոգով կսպանես մարմնի գործերը» (Հռոմ. 8։5, 13)։ Դրա շնորհիվ չես տրվի մարմնի ցանկություններին։ Փոխարենը՝ քո միտքը զբաղված կմնա «ոգու բաներով»։
6. Ի՞նչ է անհրաժեշտ ոգու պտուղը դրսևորելու համար։ Բացատրիր օրինակով։
6 Աստծու ուժի օգնությամբ կարող ես զարգացնել աստվածահաճո հատկություններ՝ «ոգու պտուղը» (Գաղ. 5։22, 23)։ Այդուհանդերձ, միայն սուրբ ոգու ազդեցությունը բավական չէ։ Հարկավոր է, որ ինքդ էլ ջանքեր թափես։ Դա ավելի լավ հասկանալու համար քննենք հետևյալ օրինակը։ Հողագործը ցանում է սերմը և ակնկալում է, որ բերք կստանա։ Թեպետ արևն ու ջուրը կարևոր դեր են խաղում այս հարցում, սակայն հողագործը ոչինչ էլ չի հավաքի, եթե անձամբ ջանքեր չթափի (Առակ. 10։4)։ Արևի ջերմությունը կարելի է համեմատել սուրբ ոգու ներգործության հետ, իսկ հողը՝ սրտի։ Ուստի ոգին կօգնի քեզ լավ «պտուղ» բերել այն դեպքում, եթե լավ մշակես «սիրտդ»։ Հարցրու ինքդ քեզ. «Քայլեր ձեռնարկո՞ւմ եմ սուրբ ոգու պտուղը զարգացնելու համար»։
7. Ինչո՞ւ է Աստվածաշունչ ընթերցելն ու դրա շուրջ խորհրդածելը կարևոր՝ ոգու պտուղը զարգացնելու համար։
7 Լավ բերք ստանալու համար հողագործը պետք է նաև ջրի իր ցանածը։ Նմանապես և մենք, սուրբ ոգու պտուղը զարգացնելու համար պետք է սնենք մեր սիրտը ճշմարտության «ջրերով», որոնք գտնվում են Աստվածաշնչում և քրիստոնեական ժողովներում (Ես. 55։1)։ Ինչո՞ւ ենք այդպես ասում։ Որովհետև Աստվածաշունչը սուրբ ոգուց է ներշնչված, և մենք բազմիցս առիթ ենք ունեցել մարդկանց հայտնելու այդ մասին (2 Տիմոթ. 3։16)։ Իսկ ժողովների միջոցով հավատարիմ և իմաստուն ծառան օգնում է մեզ հասկանալու «ճշմարտության ջրերը» (Մատթ. 24։45–47)։ Ուստի որպեսզի այդ ոգին առաջնորդի մեզ, պետք է ոչ միայն ընթերցենք Աստծու Խոսքը, այլ նաև խորհենք կարդացածի շուրջ։ Եթե դու այդպես ես վարվում, ուրեմն ցույց ես տալիս, որ հետևում ես մարգարեների օրինակին, որոնք «ջանադիր փնտրտուքներ և մանրամասն հետազոտություններ» էին անում։ Ուշագրավ է նաև այն, որ նույնիսկ հրեշտակներն էին հետաքրքրված հոգևոր ճշմարտություններով, որոնք վերաբերում են խոստացյալ Սերնդին և քրիստոնեական ժողովին (կարդա՛ 1 Պետրոս 1։10–12)։
Ինչպե՞ս առաջնորդվել ոգով
8. Ինչո՞ւ է կարևոր Եհովայից խնդրել իր սուրբ ոգին։
8 Բավական չէ միայն ընթերցել Աստվածաշունչն ու խորհրդածել դրա շուրջ։ Դու պետք է շարունակաբար աղոթես Եհովային օգնության ու առաջնորդության համար։ Նա կարող է «անսահմանորեն ավելին անել, քան այն բոլոր բաները, որ խնդրում ենք կամ հասկանում» (Եփես. 3։20; Ղուկ. 11։13)։ Իսկ ինչպես կպատասխանես, եթե մեկը հարցնի. «Ինչո՞ւ պետք է անդադար աղոթեմ Աստծուն, եթե նա «նախքան [իմ] խնդրելը արդեն գիտի, թե [ինձ] ինչ է հարկավոր»» (Մատթ. 6։8)։ Պատճառներից մեկն այն է, որ երբ խնդրում ենք սուրբ ոգին, ցույց ենք տալիս, որ ապավինում ենք Աստծուն։ Նույնն է պարագան այն դեպքում, երբ որևէ մեկը խնդրում է քեզ օգնել իրեն։ Անշուշտ, դու կանես հնարավոր ամեն բան՝ նրա խնդրանքը կատարելու համար, քանի որ վերջինս ցույց է տվել իր վստահությունը քո հանդեպ՝ դիմելով հենց քեզ (համեմատի՛ր Առակաց 3։27)։ Նմանապես, Եհովան ուրախությամբ տալիս է սուրբ ոգին, երբ խնդրում ենք իրենից։ Ուստի կարող ենք վստահ լինել, որ նա անպայման կպատասխանի մեզ (Առակ. 15։8)։
9. Ժողովներին հաճախելն ինչպե՞ս է օգնում առաջնորդվելու սուրբ ոգով։
9 Սուրբ ոգով առաջնորդվելու համար մեզ կօգնեն նաև ժողովներն ու համաժողովները։ Ուստի կարևոր է ոչ միայն ներկա լինել, այլ նաև ուշադիր հետևել ծրագրին։ Այդպես վարվելով՝ կհասկանաս «Աստծու խորունկ բաները» (1 Կորնթ. 2։10)։ Մեծ օգուտներ կքաղես նաև, եթե կանոնավորաբար մեկնաբանություններ տաս։ Փորձիր հիշել, թե վերջին չորս հանդիպումների ժամանակ քանի անգամ ես մեկնաբանություն տվել։ Եթե նկատում ես, որ կարող ես ավելի շատ մեկնաբանություններ պատրաստել, ապա նպատակ դիր առաջիկա հանդիպումների ժամանակ հենց այդպես էլ վարվելու։ Եհովան կտեսնի քո պատրաստակամությունը և, անշուշտ, կտա իր սուրբ ոգին։ Արդյունքում դու ավելի շատ օգուտներ կստանաս այդ հանդիպումներից։
10. Ո՞ր հրավերին պետք է արձագանքենք ոգով ընթանալու համար։
10 Սուրբ ոգով ընթանալու համար դու նաև պետք է արձագանքես այն հրավերին, որն արձանագրված է Հայտնություն 22։17–ում. «Ոգին ու հարսը ասում են՝ ե՛կ։ Եվ նա, ով լսում է, թող ասի՝ ե՛կ։ Եվ նա, ով ծարավ է, թող գա. և նա, ով ցանկանում է, թող վերցնի կյանքի ջուրը ձրի»։ Ոգին, որ գործում է հարս դասակարգի միջոցով, հրավիրում է վերցնել կյանքի ջուրը։ Եթե դու ընդունել ես այս հրավերը, վճռե՞լ ես ասելու՝ ե՛կ։ Ի՜նչ մեծ առանձնաշնորհում է մասնակցել այս փրկարար գործին։
11, 12. Ինչպե՞ս է սուրբ ոգին օգնում քարոզչական գործում։
11 Այսօր այս անչափ կարևոր գործը կատարվում է սուրբ ոգու առաջնորդությամբ։ Աստվածաշնչից տեղեկանում ենք, թե ինչպես է առաջին դարում սուրբ ոգին օգնել միսիոներներին քարոզելու նոր տարածքներում։ Օրինակ՝ Պողոսին ու իր համագործակիցներին «սուրբ ոգին արգելեց խոսքը խոսել Ասիայում», ինչպես նաև Բյութանիայում։ Մենք հստակ չգիտենք, թե ինչպես դա եղավ, սակայն մի բան պարզ է. ոգին առաջնորդեց Պողոսին դեպի Եվրոպա։ Առաքյալը տեսիլք տեսավ, թե ինչպես է մակեդոնացի մի մարդ աղաչում, որ իրեն օգնեն (Գործ. 16։6–10)։
12 Մեր օրերում այս համաշխարհային գործը նույնպես ղեկավարվում է Եհովայի ոգու միջոցով։ Ճիշտ է, այսօր Աստված չի տալիս տեսիլքներ, սակայն նա առաջնորդում է օծյալներին իր ոգու միջոցով։ Այդ ոգին մղում է եղբայրներին ու քույրերին անելու իրենց լավագույնը քարոզչական և աշակերտներ պատրաստելու գործում։ Անկասկած, դու նույնպես մասնակցում ես այս կարևոր գործին։ Ուրախությունդ ավելի մեծ կլինի, եթե շատ ժամանակ տրամադրես քարոզչությանը։
13. Ինչպե՞ս կարող ենք հնազանդվել սուրբ ոգու առաջնորդությանը։ Բացատրիր օրինակով։
13 Եթե կիրառես այն խորհուրդները, որոնք տրվում են Աստծու ժողովրդին, ցույց կտաս, որ հնազանդվում ես սուրբ ոգու առաջնորդությանը։ Քննենք Միհոկոյի օրինակը (Ճապոնիա)։ Երբ նա դեռ նոր էր սկսել իր ռահվիրայական ծառայությունը, չէր կարողանում հմտորեն վերայցելություններ կատարել։ Քույրը դժվարանում էր հետաքրքրություն արթնացնել տանտիրոջ մեջ։ Այդ ընթացքում «Մեր թագավորական ծառայությունը» թերթիկում լույս տեսան վերայցելություններ կատարելու վերաբերյալ մի շարք գործնական խորհուրդներ։ Իսկ երբ լույս ընծայվեց «Ինչպես կյանքից բավականություն ստանալ» գրքույկը, որը շատ օգտակար էր հատկապես ճապոներեն խոսող մարդկանց համար, Միհոկոն կիրառեց թերթիկում տրվող խորհուրդները՝ գրքույկը գործածելու և վերայցելություններ կատարելու վերաբերյալ։ Դրա շնորհիվ նա Աստվածաշնչի ուսումնասիրություններ սկսեց տարբեր մարդկանց հետ։ Քույրը պատմում է. «Ես 12 ուսումնասիրություն ունեի և նույնիսկ ստիպված էի ոմանց խնդրել, որ մի փոքր սպասեն»։ Այո՛, եթե ոգով ընթանաս՝ կիրառելով տրվող խորհուրդները, անշուշտ, առատորեն կհնձես։
Ապավինիր Աստծու ոգուն
14, 15. ա) Ինչպե՞ս է հնարավոր, որ անկատար մարդը ապրի իր նվիրման համաձայն։ բ) Ինչպե՞ս կարող ես լավ ընկերներ գտնել։
14 Որպես նվիրված ծառա՝ դու մասնակցում ես քարոզչությանը (Հռոմ. 10։14)։ Սակայն երբեմն գուցե մտածես, որ չես կարողանում լիարժեքորեն կատարել այդ պարտականությունը։ Ինչպես օծյալների, այնպես էլ մեր «որակյալ լինելը» Աստված է որոշում, և ոչ թե մենք (կարդա՛ 2 Կորնթացիներ 3։5)։ Ուստի եթե շարունակես քո լավագույնը անել և ապավինել Աստծու ոգուն, ցույց կտաս, որ ապրում ես նվիրմանդ համաձայն։
15 Ինչ խոսք, անկատար մարդու համար հեշտ չէ նվիրված լինել կատարյալ Աստծուն՝ Եհովային։ Դժվարություններից մեկը գուցե լինի այն, որ նախկին ընկերներդ տարակուսանքի մեջ ընկնեն՝ տեսնելով նոր ապրելակերպդ և սկսեն «քո մասին վիրավորական խոսքեր արտահայտել» (1 Պետ. 4։4)։ Սակայն մի՛ մոռացիր, որ այժմ դու նոր ընկերներ ունես՝ Եհովան և Հիսուս Քրիստոսը (կարդա՛ Հակոբոս 2։21–23)։ Անչափ կարևոր է նաև, որ դու փորձես ճանաչել քո ժողովի բոլոր քույրերին ու եղբայրներին, որոնք համաշխարհային «եղբայրության» մաս են կազմում (1 Պետ. 2։17; Առակ. 17։17)։ Անշուշտ, Աստված իր ոգու միջոցով կօգնի քեզ ընկերներ ձեռք բերելու, որոնք կշարունակեն դրական ազդեցություն թողնել քեզ վրա։
16. Ինչո՞ւ կարող ես Պողոսի պես «հաճույք գտնել թուլությունների մեջ»։
16 Հավանաբար ժողովում ունես այնպիսի ընկերներ, որոնք պատրաստ են քեզ օգնելու։ Այդուհանդերձ, լինում են պահեր, երբ դժվարանում ես հաղթահարել առօրյա խնդիրներդ։ Դու այնքան ես շփոթվում, որ քեզ թվում է՝ մի թունելի մեջ ես, որի վերջը չի երևում։ Այդ պահին աղոթի՛ր Եհովային և խնդրի՛ր նրա սուրբ ոգին։ Պողոսը գրեց. «Երբ ես թույլ եմ, այդ ժամանակ եմ զորավոր» (կարդա՛ 2 Կորնթացիներ 4։7–10; 12։10)։ Առաքյալը գիտեր, որ սուրբ ոգին կարող է օգնել հաղթահարելու ցանկացած մարդկային թուլություն։ Այո՛, Աստծու գործուն ուժը կզորացնի քեզ։ Պողոսը նաև նշեց, որ ինքը «հաճույք էր գտնում թուլությունների մեջ»։ Երբ նա տկար էր, զգում էր, թե ինչպես է սուրբ ոգին ներգործում իր վրա (Հռոմ. 15։13)։
17. Ինչպե՞ս է սուրբ ոգին օգնում շարժվելու ճիշտ ուղղությամբ։
17 Նվիրմանդ համաձայն հավիտյան ապրելու համար քեզ անհրաժեշտ է Աստծու ոգին։ Ենթադրենք՝ դու առագաստանավի նավապետ ես և դուրս ես եկել բաց ծով։ Ապահով տեղ հասնելու համար պիտի ընթանաս համընթաց քամու և ոչ թե հանդիպակաց քամու ուղղությամբ։ Համընթաց քամին՝ սուրբ ոգին է, որով առաջնորդվելով՝ կկարողանաս Եհովային հավիտյան ծառայել։ Սակայն պիտի խուսափես հանդիպակաց քամուց՝ այս աշխարհի ոգուց, որը կարող է քեզ այս ու այն կողմ տանել։ (1 Կորնթ. 2։12)։ Ուստի առաջնորդվիր սուրբ ոգով, որը Աստծու խոսքի և կազմակերպության միջոցով քեզ կտանի ճիշտ ուղղությամբ։
18. Ի՞նչ ես վճռել անել այժմ և ինչո՞ւ։
18 Եթե Աստվածաշունչ ես ուսումնասիրում Եհովայի վկաների հետ, վայելում ես նրանց ջերմ ընկերակցությունը, սակայն դեռ չես նվիրվել ու մկրտվել, հարցրու ինքդ քեզ. «Ինչո՞ւ եմ վարանում»։ Քանի որ արդեն գիտես, թե ինչ դեր է խաղում սուրբ ոգին Եհովայի կամքի իրականացման մեջ, և բարձր ես գնահատում այն, մի՛ վարանիր կատարելու այդ կարևոր քայլը՝ մկրտությունը։ Աստված առատապես կօրհնի քեզ և կտա իր ոգին։ Իսկ եթե տարիներ կամ տասնամյակներ առաջ ես մկրտվել, անշուշտ, զգացել ես թե ինչպես է սուրբ ոգին զորացրել քեզ։ Այդպես կարող է լինել հավիտյան։ Ուստի վճռի՛ր շարունակ ընթանալ Աստծու ոգով։
Հիշո՞ւմ ես
• Ի՞նչ է նշանակում «ընթանալ ոգով»։
• Ինչը՞ կօգնի քեզ «շարունակ ընթանալ ոգով»։
• Ինչպե՞ս կարող ես ապրել նվիրմանդ համաձայն։
[Նկար 15–րդ էջի վրա]
«Սիրտը» մշակելու համար ջանքեր են անհրաժեշտ
[Նկար 16–րդ և 17–րդ էջերի վրա]
Առաջնորդվո՞ւմ ես Աստծու ոգով