Ինչո՞ւ են ամուսնալուծություններն այսքան շատ

«Փարիսեցիները եկան [Հիսուսի] մոտ և ցանկանալով փորձել նրան՝ հարցրին. «Օրենքով թույլատրելի՞ է, որ մարդը ցանկացած պատճառով բաժանվի իր կնոջից»» (Մատթեոս 19։3)։

ՀԻՍՈՒՍԻ օրերում որոշ մարդիկ կասկածի էին ենթարկում այն, որ ամուսնությունը կարող է կամ պետք է հարատև լինի։ Հիսուսը նրանց ասաց. «Չե՞ք կարդացել, որ նա, ով սկզբից ստեղծեց, տղամարդ և կին ստեղծեց նրանց ու ասաց. «Այդ պատճառով տղամարդը կթողնի իր հորն ու մորը և կմիանա իր կնոջը, և երկուսը մեկ մարմին կլինեն»։ Այնպես որ նրանք այլևս երկու չեն, այլ մեկ մարմին են։ Ուրեմն ինչ որ Աստված միավորեց մեկ լծի տակ, թող մարդը չբաժանի»a (Մատթեոս 19։4–6)։ Ակնհայտ է՝ Աստված նպատակադրել էր, որ ամուսնությունը հարատև լինի։

Այսօր շատ երկրներում ամուսնությունների մոտ 40 տոկոսը կամ ավելին ավարտվում է ամուսնալուծությամբ։ Արդյոք ամուսնության վերաբերյալ աստվածաշնչյան խորհուրդը հնացե՞լ է։ Գուցե ամուսնալուծությունների պատճառն այն է, որ ամուսնական կառույցն ինքնին թերի՞ է։

Քննեք այս օրինակը. երկու ամուսնական զույգ գնում են նույն մակնիշի ավտոմեքենա։ Մի զույգը լավ վիճակում է պահում մեքենան և զգուշորեն է վարում։ Դրա համար մեքենան չի փչանում։ Իսկ մյուս զույգը ժամանակ չի տրամադրում, ուժ չի ներդնում մեքենայի մասին հոգալու համար և անզգուշորեն է վարում։ Այդ մեքենան փչանում է ու դառնում անպիտան։ Ինչո՞ւ։ Պատճառը մեքենա՞ն է, թե՞ տերերն են։ Իհարկե, հիմնականում տերերն են մեղավոր։

Նմանապես, ամուսնությունների քայքայման պատճառը ամուսնական կառույցի թերի լինելը չէ։ Միլիոնավոր հաջող ամուսնություններ կարող են հակառակը ապացուցել։ Այդ ամուսնությունները երջանկություն են բերում և կայունություն են մտցնում անհատների կյանքում, ընտանիքներում ու հասարակության մեջ։ Սակայն որպեսզի ամուսնությունը հարատև լինի, հարկավոր է հոգածություն դրսևորել և ուշադիր լինել այդ կառույցի հանդեպ, ինչպես մեքենայի պարագայում։

Անկախ նրանից՝ մի քանի օր է, ինչ ամուսնացել եք, թե տասնամյակներ, ամուսնությունը պահպանելու և ամրացնելու վերաբերյալ աստվածաշնչյան խորհուրդները իսկապես գործնական են ձեզ համար։ Նկատի առեք մի քանի օրինակներ հաջորդ էջերում։

[ծանոթագրություն]