Տարբերակներ ընտանեկան երկրպագության և անձնական ուսումնասիրության համար

ԵՀՈՎԱՅԻ ՎԿԱՆԵՐԻ ժողովի հանդիպումների գրաֆիկում 2009​թ.-ին փոփոխություն տեղի ունեցավ։ Երկու առանձին հանդիպումներ միացվեցին իրար։ Արդյունքում շաբաթվա մեջ մեկ ազատ երեկո ավելացավ, և բոլորը հորդոր ստացան այն օգտագործել ընտանեկան երկրպագություն կամ անձնական ուսումնասիրություն անցկացնելու համար։ Օգտվո՞ւմ ես քո առաջ բացված այդ հնարավորությունից։ Լիարժեք օգուտներ քաղո՞ւմ ես դրանից։

Ոմանք ուզում են իմանալ, թե ինչ նյութ պետք է ընտրեն ընտանեկան երկրպագության ժամանակ ուսումնասիրելու համար։ Կառավարիչ մարմինը չի ցանկանում ընդհանուր կարգ հաստատել բոլոր ընտանիքների համար, քանի որ հանգամանքները տարբեր են և յուրաքանչյուր ընտանիքի գլուխ կամ յուրաքանչյուր քրիստոնյա ինքը պետք է որոշի, թե ինչպես լավագույնս օգտվի այդ հնարավորությունից։

Ճիշտ է, ոմանք այդ ժամանակը օգտագործում են ժողովի հանդիպումներին պատրաստվելու համար։ Սակայն ընտանեկան երկրպագությունը չպետք է սահմանափակվի դրանով։ Ոմանք էլ կարդում, քննարկում և նույնիսկ բեմականացնում են Աստվածաշնչի որոշ հատվածներ, ինչը հատկապես օգտակար է փոքրերի համար։ Պարտադիր չէ, իսկ երբեմն էլ նույնիսկ ցանկալի չէ միշտ կիրառել հարց ու պատասխանի մեթոդը, ինչպես արվում է ժողովների ժամանակ։ Անկաշկանդ ու հանգիստ մթնոլորտը հաճախ ավելի լավ է նպաստում քննարկմանն ու մտքերի փոխանակմանը։ Նման մթնոլորտը խթանում է ստեղծագործ մտածողությունը, որն էլ օգնում է, որ քննարկված նյութը երկար հիշվի, իսկ երեկոն հաճելի լինի բոլորի համար։

Երեք երեխաներ ունեցող մի հայր գրում է. «Այն, ինչ անում ենք երկրպագության ժամանակ, մեծ մասամբ հիմնված է Աստվածաշնչի ընթերցանության վրա։ Յուրաքանչյուրս նախապես կարդում է Աստվածաշնչից նախատեսված հատվածը։ Երեխաները ընտրում են որոշ մտքեր և դրանց վերաբերյալ փնտրտուքներ են անում, հետո ներկայացնում են իրենց գտածը։ Միշելը [7 տարեկան] հաճախ մի նկար է նկարում կամ գրում է մի քանի նախադասություն թեմայի վերաբերյալ։ Իսկ Դեյվիդն ու Կեյթլինը [13 և 15 տարեկան] երբեմն գրում են այդ հատվածում ներկայացվող պատմությունը՝ ներկայացնելով այն ականատեսի տեսանկյունից։ Օրինակ՝ երբ մենք կարդում էինք այն մասին, թե ինչպես է Հովսեփը մեկնում փարավոնի ծառաների՝ գինեմատույցի և հացագործի երազները, Կեյթլինը գրել էր շարադրություն՝ ներկայացնելով այդ պատմությունը մի բանտարկյալի տեսանկյունից, որն ասես ականատես է եղել այդ դեպքերին» (Ծննդ., գլ. 40)։

Բնական է, որ իրավիճակները տարբեր են։ Այն, ինչ արդյունավետ է մեկի կամ մի ընտանիքի համար, գուցե այդքան էլ օգտակար չլինի մյուսին։ Հաջորդ էջում ներկայացվում են մի քանի տարբերակներ, որոնք գուցե նպաստեն ձեր ընտանեկան երկրպագությունը կամ անձնական ուսումնասիրությունը ավելի օգտակար դարձնելուն։ Սակայն ինքներդ էլ կարող եք հետաքրքիր տարբերակներ մտածել։

[շրջանակ/նկար 7-րդ էջի վրա]

Ընտանիքների համար, որտեղ պատանիներ կան

• Կարդացեք և քննարկեք «Երիտասարդների հարցերը. գործնական խորհուրդներ» գիրքը։

• Աստվածաշնչյան պատմություններն ընթերցելիս պատկերացրեք ձեզ այնտեղ (տե՛ս «Դիտարան», 1996​թ., մայիսի 15, էջ 14, պարբ. 17, 18, անգլ., ռուս.)։

• Խոսեք հոգևոր նպատակների մասին, որոնց կարելի է հասնել կարճ ժամանակում կամ ապագայում։

• Դիտեք և քննարկեք աստվածաշնչյան թեմաներով տեսաֆիլմեր։

• Քննարկեք նաև «Դիտարանի»՝ «Պատանի ընթերցողների համար» խորագրի հոդվածները։

Ամուսնական զույգերի համար, որոնք երեխա չունեն

• Քննարկեք «Ընտանեկան երջանկության գաղտնիքը» գրքի՝ 1, 3, 11–16 գլուխները։

• Իրար պատմեք այն հետազոտությունների մասին, որ արել եք Աստվածաշնչի ընթերցանության ժամանակ հանդիպած հետաքրքիր մտքերի վերաբերյալ։

• Պատրաստվեք Աստվածաշնչի ուսումնասիրության կամ «Դիտարանի» ուսումնասիրության հանդիպմանը։

• Խոսեք այն մասին, թե ինչպես կարող եք ընդլայնել ձեր ծառայությունը։

Ամուրի քրիստոնյաների կամ նրանց համար, որոնց ընտանիքի անդամները Վկաներ չեն

• Ուսումնասիրիր բոլոր հրատարակությունները, որ ստանում ես մարզային համաժողովի ժամանակ

• Կարդա այս տարվա, ինչպես նաև անցած տարիների «Տարեգրքերը»։

• Հետազոտություններ արա այն հարցերի վերաբերյալ, որոնք հաճախ տալիս են ձեր տարածքում ապրող մարդիկ։

• Մատուցումներ պատրաստիր ծառայության ժամանակ կիրառելու համար։

Ընտանիքների համար, որտեղ կան փոքր երեխաներ

• Բեմականացրեք աստվածաշնչյան պատմությունները

• Երեխաների հիշողության զարգացմանը նպաստող խաղեր խաղացեք, ինչպիսին «Արթնացե՛ք»-ի 30 և 31 էջերի խաղերն են (անգլ., ռուս.)։

• Օգնեք երեխային գործի դնելու իր երևակայությունը (տե՛ս «Արժե՛ ջանքեր ներդնել» հոդվածը 2011​թ. փետրվարի 15-ի «Դիտարանում», էջ 11)։

• Միասին քննարկեք «Դիտարանի»՝ «Սովորեցրեք ձեր երեխաներին» խորագրի հոդվածները։