Ինչպե՞ս են ոգեղեն արարածները ազդում մեզ վրա

Այս հոդվածում քննարկվում են այնպիսի հարցեր, որոնք գուցե քեզ հետաքրքրել են, և ցույց է տրվում, թե քո Աստվածաշնչում որտեղ կարող ես գտնել դրանց պատասխանները։ Նաև, եթե ցանկանում ես, այս հարցերի շուրջ կարող ես զրուցել Եհովայի վկաների հետ։

1. Ովքե՞ր են հրեշտակները։

Հրեշտակները ոգեղեն արարածներ են, որոնք ապրում են երկնքում։ Ոգեղենը կյանքի բարձր տեսակ է։ Ճշմարիտ Աստված, որը նույնպես ոգեղեն անձնավորություն է, նախքան երկիրն արարելը ստեղծել է հրեշտակներին (Հոբ 38։4, 7; Մատթեոս 18։10)։ Նա շրջապատված է միլիոնավոր հավատարիմ հրեշտակներով (կարդա՛ Սաղմոս 103։20, 21; Դանիել 7։9, 10)։

2. Հրեշտակները օգնո՞ւմ են մարդկանց։

Հրեշտակները օգնեցին Ղովտ անունով մի արդար մարդու։ Նա ապրում էր մի քաղաքում, որն Աստված որոշել էր կործանել, քանի որ նրա բնակիչները չար էին։ Երկու հրեշտակ նախազգուշացրին Ղովտին ու նրա ընտանիքին, որ փախչեն քաղաքից։ Ոմանք այդ նախազգուշացումը որպես կատակ ընդունեցին, ուշադրություն չդարձրին ու կործանվեցին։ Սակայն Ղովտն ու իր աղջիկները փրկվեցին, քանի որ ականջ դրեցին հրեշտակների միջոցով տրված Աստծու նախազգուշացմանը (կարդա՛ Ծննդոց 19։1, 13–17, 26)։

Աստվածաշնչից իմանում ենք, որ հրեշտակները այսօր օգնում են մարդկանց՝ առաջնորդելով Աստծու Թագավորության մասին բարի լուրի քարոզչությունը, որ նրանք հավատարմորեն կատարում են (Մատթեոս 24։14)։ Բարի լուրը նաև նախազգուշացում է, որը տալիս է Աստված հրեշտակների միջոցով։ Ղովտին տրված նախազգուշացման պես՝ սա ևս կատակ չէ (կարդա՛ Հայտնություն 1։1; 14։6, 7)։

Աստված կարող է հրեշտակների միջոցով զորացնել մեզ, երբ բախվում ենք փորձությունների։ Այդպես նա զորացրեց Հիսուսին (կարդա՛ Ղուկաս 22։41–43)։

Շուտով Աստված հրեշտակներին կօգտագործի մեկ այլ նպատակով. նա կոչնչացնի չար մարդկանց, ովքեր տառապանք են պատճառում ուրիշներին։ Դա մեծ թեթևացում կբերի ողջ մարդկությանը (կարդա՛ 2 Թեսաղոնիկեցիներ 1։6–8)։

3. Ինչպե՞ս են դևերը ազդում մեզ վրա։

Ինչպես որ շատ մարդիկ չար գործեր են անում՝ չհնազանդվելով Աստծուն, այնպես էլ շատ հրեշտակներ երկնքում չհնազանդվեցին Աստծուն և ապստամբեցին նրա դեմ (2 Պետրոս 2։4)։ Անհնազանդ հրեշտակները կոչվում են դևեր։ Նրանց առաջնորդը Բանսարկու Սատանան է։ Սատանան ու նրա դևերը մոլորեցնում են ողջ մարդկությանը (կարդա՛ Հայտնություն 12։9)։

Սատանան օգտագործում է բիզնեսի անազնիվ աշխարհը, կառավարությունները և կեղծ կրոնը, որպեսզի մարդկանց հեռացնի Աստծուց։ Հետևաբար նա է պատասխանատու աշխարհում տիրող անարդարության, բռնության և տառապանքի համար (կարդա՛ 1 Հովհաննես 5։19)։

4. Ինչպե՞ս են դևերը մոլորեցնում մարդկանց։

Սատանան մոլորեցնում է շատերին՝ սովորեցնելով, թե մարդն ունի անմահ հոգի և մահից հետո այն կարող է հաղորդակցվել մեզ հետ։ Աստվածաշունչը, սակայն, հայտնում է, որ մահացածները ոչինչ չեն կարող անել (Ժողովող 9։5)։ Բայց դևերը հաճախ մոլորեցնում են մարդկանց՝ կրկնօրինակելով մահացածի ձայնը (Եսայիա 8։19)։ Նրանք խաբում են ոգեհարցների, բախտագուշակների և աստղագուշակների միջոցով։ Այդ պատճառով Աստծու Խոսքը նախազգուշացնում է հեռու մնալ ամեն տեսակ գուշակությունից։ Ուստի մենք պետք է ձերբազատվենք այն ամենից, ինչը կապ ունի դևերի և ոգեհարցության հետ (կարդա՛ 2 Օրենք 18։10, 11; Գործեր 19։19)։

Եթե սիրում ենք Եհովային, հարկ չկա վախենալու դևերից։ Երբ ուսումնասիրում ենք Աստծու Խոսքը և կիրառում այն, հակառակվում ենք Սատանային և մոտենում Աստծուն։ Եհովան դևերից շատ ավելի զորեղ է։ Նրա հավատարիմ հրեշտակները անհրաժեշտ պահին կարող են զորացնել մեզ (կարդա՛ Սաղմոս 34։7; Հակոբոս 4։7, 8)։

Ավելի շատ տեղեկություններ ստանալու համար տե՛ս «Ի՞նչ է սովորեցնում Աստվածաշունչը իրականում» գրքի 10-րդ գլուխը։ Հրատարակվել է Եհովայի վկաների կողմից։