Բարձր պահենք Եհովայի փառավոր անունը

¹ Մեր առաջին ծնողներին մեղքի մղելով՝ Սատանան անարգեց Աստծո անունը։ Այդ Բանսարկուն ներշնչեց նրանց այն միտքը, թե Եհովան խաբել է Ադամին (Ծննդ. 3։1—5)։ Քանի որ Աստծո անվան նշանակությունը կապված է իր խոսքերը կատարելու կարողության հետ, ապա կարող ենք ասել, որ Սատանայի այդ անհիմն հայտարարությունը ծայրաստիճան զրպարտություն էր։ Ժամանակի ընթացքում իր նպատակն ի կատար ածելով՝ Եհովան մաքրել է իր անունը նախատինքից և այն չքնաղ դարձրել (Ես. 63։12—14)։

² Մենք պատկանում ենք այն մարդկանց թվին, «որոնց վրայ դրուած է [Աստծո] անունը» (Գործք 15։14, 17)։ Սա մեզ հնարավորություն է տալիս ցույց տալու, թե ինչպես ենք վերաբերվում նրա անվան սրբացմանը։ Մենք ընդունում ենք, որ Եհովայի անունը իսկապես չքնաղ է, քանի որ այն ներկայացնում է ամեն բան, ինչը որ լավ է, բարի, սիրալիր, բարեգութ և արդար։ Աստծո փառավոր անվան մեծությունը ակնածանք է մեզ ներշնչում (Սաղ. 8։1; 99։3; 148։13)։ Այդ զգացումը ի՞նչ անելու պետք է մեզ մղի։

³ Սրբացնենք Աստծո անունը։ Աստծո անունն այնքան սուրբ է, որ հնարավոր չէ այն ավելի սուրբ դարձնել։ Սակայն մեր մաքուր վարքով և Թագավորության բարի լուրի քարոզչությամբ կարող ենք ցույց տալ, որ շատ բարձր ենք համարում այն։ Ուստի, եկեք բոլորս միասին բացականչենք. «Գովեցէք Տիրոջը, կանչեցէք նորա անունը, պատմեցէք ազգերի մէջ նորա գործերը. յիշեցէք որ բարձր է նորա անունը» (Ես. 12։4)։ Իսկ ինչպե՞ս կարող ենք դա անել։

⁴ Մենք կարող ենք օգտագործել ցանկացած հնարավորություն, որպեսզի հռչակենք Եհովայի անունը և այդ անվան հետ կապված ամեն բան։ Անկախ այն բանից, թե ինչպիսի ծառայություն ենք մատուցում՝ պաշտոնական կամ ոչ պաշտոնական, տնետուն կամ խանութից խանութ, փողոցում կամ հեռախոսով վկայություն տալիս՝ մեր կատարած աշխատանքը պատիվ է բերում Եհովային։ Հետաքրքրվող անհատների հանդիպելիս պետք է որոշակիորեն պայմանավորվենք, որպեսզի նորից այցելենք և նրանց Եհովայի մասին ավելին սովորեցնենք։ Դա նշանակում է, որ անպայման պետք է մտապահենք այդ պայմանավորվածությունները և մեր վերջնական նպատակը լինի այն, որ Աստվածաշնչի ուսումնասիրություններ սկսենք։ Ուրախալի է, որ ամեն տարի հարյուր հազարավոր մարդիկ մեզ են միանում, որպեսզի ճանաչեն, պատվեն և սրբացնեն Եհովայի փառավոր անունը։

⁵ Ամբողջ սրտով Աստծո անվան սրբացման գործին մասնակցելով՝ մենք հստակորեն ցույց ենք տալիս, թե Եդեմում Սատանայի բարձրացրած հարցի ո՛ր կողմում ենք կանգնած։ Սա ամենավեհ, ամենապատվական գործն է, որը մենք երբևէ կարող ենք կատարել։ Ուրեմն, եկեք բա՛րձր պահենք և եռանդորեն մեծարենք Եհովայի փառավոր անունը (Ա Մնաց. 29։13)։