Ի՞նչը կօգնի մեզ հաստատուն մնալ հավատի մեջ
1 Եհովայի կազմակերպության հետ համագործակցելուն պես մենք հոգևոր առաջընթաց ենք ապրել, ինչը մեզ համար ուրախության աղբյուր է դարձել։ Այնուամենայնիվ, որպեսզի կարողանանք ‘հավատի մեջ արմատավորված, կառուցված և հաստատ’ մնալ, անհրաժեշտ է շարունակ հոգևորապես հասունանալ (Կող. 2։6, 7)։ Սակայն, մինչ քրիստոնյաների մեծամասնությունը հոգևոր առաջադիմություններ է անում, ոմանք հոգևոր անկում են ապրում՝ ‘հավատի մեջ հաստատուն’ չմնալու պատճառով (Ա Կորնթ. 16։13)։ Մենք կարող ենք քայլեր ձեռք առնել, որպեսզի նույնը նաև մեզ հետ չպատահի։ Իսկ ինչպե՞ս։
2 Կանոնավոր հոգևոր գործունեություն։ Եհովայի կազմակերպության մեջ հոգևոր գործերի լավ գրաֆիկ կազմիր։ Կազմակերպությունը, առատորեն մատակարարելով հոգևոր կերակուրը, հոգ է տանում մեր կարիքների մասին։ Ժողովի հանդիպումները, շրջանային և նահանգային համաժողովները հորդորում են մեզ հոգևորապես է՛լ ավելի աճել և հաստատուն լինել. այդ միջոցառումներին միշտ ներկա գտնվելով՝ մենք օրհնություններ ենք ստանում (Եբր. 10։24, 25)։ Աստվածաշնչի, «Դիտարան» և «Արթնացե՛ք» պարբերագրերի, ինչպես նաև Աստծո Խոսքի խորացված գիտելիքները պարունակող գրքերի ընթերցանության կանոնավոր ծրագիր ունենալը կնպաստի մեր հոգևոր «արմատները» խորացնելուն և ամրացնելուն (Եբր. 5։14)։ Մեր առջև հոգևոր նպատակակետեր դնելը և դրանց հասնելու համար ջանքեր թափելը նույնպես տևական օգուտներ կբերի (Փիլիպ. 3։16)։
3 Աջակցություն հասուն քրիստոնյաների կողմից։ Աշխատիր ընդարձակել շփումդ ժողովի հասուն քրիստոնյաների հետ։ Ծանոթացիր երեցների հետ, քանի որ առաջին հերթին նրա՛նք կարող են զորացնել քեզ (Ա Թեսաղ. 2։11, 12)։ Սիրով լսիր խորհուրդները կամ առաջարկները, որ կարող են տալ նրանք (Եփես. 4։11—16)։ Ծառայողական օգնականները ևս պատրաստ են օգնելու իրենց հավատակիցներին, որպեսզի վերջիններս հաստատ մնան հավատի մեջ. ուստի դիմիր նրանց քաջալերություն ստանալու համար։
4 Իսկ ծառայության մեջ օգնության կարիք զգո՞ւմ ես։ Եթե այո, ապա այդ մասին հայտնիր երեցներին և օգնություն խնդրիր։ Գուցե դու էլ օգտվես «Ռահվիրաներն օգնում են մյուսներին» ծրագրից։ Նորե՞րս ես մկրտվել։ «Մեր ծառայությունը» (ռուս.) գիրքը ուսումնասիրելը և այնտեղ զետեղված մտքերը կիրառելը կնպաստեն հոգևոր հասունությանդ։ Ծնո՞ղ ես. եթե այո՛, ապա շարունակիր հոգևորապես զորացնել երեխաներիդ (Եփես. 6։4)։
5 ‘Հավատի մեջ արմատավորված և հաստատ’ լինելով՝ մենք ձեռք կբերենք Եհովայի հետ մտերիմ փոխհարաբերություններ և կվայելենք մեր եղբայրների ջերմ ընկերակցությունը։ Դա մեզ հնարավորություն կտա հակառակվել Սատանայի հարձակումներին և կամրացնի հավիտենական ապագայի մեր հույսը (Ա Պետ. 5։9, 10)։