Եղիր ուշադիր ունկնդիր
1 Ուշադրությամբ լսելու համար ինքնակառավարում է հարկավոր, ինչպես նաև՝ սովորելու և լսածից օգուտ քաղելու ցանկություն։ Ուստի, Հիսուսը շեշտեց ուշադրությամբ լսելու անհրաժեշտությունը, երբ ասաց. «Զգո՛յշ եղէք, թէ ինչպէս էք դուք լսում» (Ղուկ. 8։18, ՆԿ–ի ՆԱԹ)։
2 Այդ խորհուրդը անհրաժեշտ է կիրառել հատկապես ժողովի հանդիպումներին, շրջանային և նահանգային համաժողովներին ներկա գտնվելիս։ Այդ միջոցառումների ժամանակ է, որ հարկավոր է ուշադրությամբ լսել մատուցվածը (Եբր. 2։1)։ Ներքոհիշյալ կետերը կօգնեն քեզ ուշադիր ունկնդիր լինել քրիստոնեական հավաքույթների ընթացքում։
◼ Բարձր գնահատիր հանդիպումները։ Դրանք «հաւատարիմ.... տնտեսի» միջոցով «Տէրից ուսուած» լինելու գլխավոր միջոցն են (Ես. 54։13; Ղուկ. 12։42)։
◼ Նախօրոք պատրաստվիր։ Ուսումնասիրիր հանդիպմանը քննարկվելիք նյութը ու քեզ հետ ունեցիր Աստվածաշունչդ և ուսումնասիրվելիք գրականության քո անձնական օրինակը։
◼ Հանդիպման ընթացքում հատուկ ջանքեր գործադրիր կենտրոնանալու համար։ Խուսափիր կողքիդ նստածների հետ խոսելուց և ուշադրություն դարձնելուց այն բանի վրա, թե ինչ են անում ուրիշները։ Աշխատիր մտացրիվ չլինել՝ հանդիպումից հետո ծրագրած պլաններիդ կամ անձնական այլ գործերիդ մասին մտածելով։
◼ Վերլուծիր ներկայացվող նյութը։ Հարցրու ինքդ քեզ. «Ինչպե՞ս է սա ինձ վերաբերում։ Ե՞րբ կկիրառեմ դա»։
◼ Հակիրճ նոթագրիր գլխավոր կետերը և սուրբգրային համարները։ Դա օգնում է կենտրոնանալ քննարկվող նյութի վրա և հիշել հիմնական կետերը՝ հետագայում գործածելու համար։
3 Սովորեցրու երեխաներիդ ունկնդրել։ Երեխաները հոգևոր ուսուցում ստանալու կարիք ունեն (Բ Օրին. 31։12)։ Հնում Աստծո ժողովրդի մեջ «ամեն հասկանալու կարողութիւն ունեցողները» պետք է ուշադիր լինեին Օրենքն ընթերցվելիս (Նէեմ. 8։1–3)։ Եթե ծնողները մասնակցում են հանդիպումներին և ուշադրությամբ ունկնդրում, հավանաբար նրանց երեխաները ևս նմանապես կվարվեն։ Իմաստուն չէ խաղալիքներ կամ գունազարդման գրքեր բերելը՝ երեխային զբաղեցնելու համար։ Նրանց ունկնդրելուն խոչընդոտում է նաև անհարկի զուգարան գնալ–գալը։ Քանի դեռ «յիմարութիւնը կապուած է երեխայի սրտին», ծնողները պետք է հատկապես ջանքեր գործադրեն հետևելու համար, որ իրենց զավակները հանդիպումներին հանգիստ նստեն և լսեն (Առակ. 22։15)։
4 Ուշադիր ունկնդիրներ լինելով՝ մենք ցույց ենք տալիս, որ իսկապես իմաստուն ենք և ցանկանում ենք «ավելացն[ել] ուսումը» (Առակ. 1։5)։