Իրար քաջալերելու առանձնահատուկ հնարավորություն

¹ Եհովայի ժողովրդի հավատն ամեն օր փորձությունների է ենթարկվում։ Իմանալով, որ իրեն քիչ ժամանակ է մնացել՝ Բանսարկուն վերջին կատաղի հարձակումներն է գործում, որպեսզի կոտրի Եհովայի հանդեպ մեր ուղղամտությունը (Յայտն. 12։12)։ Անհրաժեշտ է շարունակել ‘զորանալ Տերով և նրա զորության կարողությունովը’, որպեսզի ‘կարող լինենք հակառակ կենալ չարության օրում, և ամենը կատարելով՝ հաստատ կանգնել’ (Եփես. 6։10, 13, ԱԹ)։

² Հավատակիցների հետ մեկտեղ հավաքվելը Եհովայի կողմից հաստատված մի միջոցառում է, որի միջոցով նա զորացնում է մեզ։ Պողոս առաքյալը հասկանում էր այս հանդիպումների կարևորությունը։ Նա շատ էր ցանկանում տեսնել իր քրիստոնյա եղբայրներին, որպեսզի իրարով քաջալերվեին ու ամրապնդվեին (Հռովմ. 1։11, 12, ԱՆԹ)։ Կառավարիչ մարմինը սիրով հոգ է տարել, որ շուտով անցկացվի «Թագավորության եռանդուն քարոզիչները» վերնագրով մարզային համաժողովը, որտեղ մենք հնարավորություն կունենանք մեր հավատակիցների հետ քաջալերվելու և Աստծո կամքը կատարելու համար անհրաժեշտ զորությունը ստանալու։

³ Ներկա եղեք, որ օգուտ քաղեք։ Նպատակ դրեք ներկա գտնվելու համաժողովի բոլոր երեք օրերին։ Մենք համաժողովից օգուտ կքաղենք, եթե այնտեղ լինենք մինչև առաջին երգի սկսելը և մնանք մինչև վերջին աղոթքը՝ սրտանց պատասխանելով՝ ամեն (Ես. 48։17, 18)։ Շատերին հարկավոր կլինի իրենց աշխատանքային գրաֆիկն այնպես կարգավորել, որ կարողանան բոլոր երեք օրերին էլ ներկա լինել։ Ճիշտ է, գուցե հեշտ չլինի գործատիրոջից ազատ օր խնդրել, բայց մենք ունենք Եհովայի հավաստիացումը, որ նա կօգնի մեզ կատարելու իր կամքը (Ա Յովհ. 5։14, 15)։ Եթե մինչև հիմա դեռ ոչինչ չենք ձեռնարկել, ապա ժամանակն է որոշակի միջոցներ ձեռք առնել՝ լուծելու տրանսպորտի և կացարանի հարցը՝ հույսը չդնելով պատահականության վրա։ Կարող ենք վստահ լինել, որ Եհովան կօրհնի համաժողովի բոլոր օրերին ներկա լինելու համար մեր ներդրած ջանքերը (Առակ. 10։22, Արևմտ. Աստ.)։

⁴ Անհամբերությամբ սպասեք համաժողովին։ Պատահե՞լ է, որ համաժողովից հեռանալիս բացականչեք. «Ի՜նչ լավ համաժողով էր»։ Ինչո՞ւ ենք այսպիսի զգացումներ ունենում։ Լինելով անկատար՝ մենք կարող ենք հոգնել ու թուլանալ, ուստիև հոգևոր քաջալերության կարիք ունենք (Ես. 40։30)։ Մի քույր բացատրում է. «Տիրող համակարգը սպառում է իմ ուժերը, իսկ համաժողովները օգնում են ուշադրությունս կենտրոնացնել հոգևորի շուրջ՝ տալով հոգևոր այն օժանդակությունը, որի անհրաժեշտությունն ունեմ։ Կարծես թե քաջալերությունը գալիս է հենց այն ժամանակ, երբ դրա կարիքն ամենից շատ եմ զգում»։ Հավանաբար դուք էլ նման զգացում ունեցած լինեք։

⁵ Հարկ եղած քաջալերությունը ստանում ենք մեր համաժողովների ոչ միայն ելույթների և հարցազրույցների, այլ նաև ծրագրի մյուս բաժինների միջոցով։ Մի եղբայր մեկնաբանում է. «Իրապես գնահատում եմ, երբ համաժողովներում բացատըրվում է Աստվածաշնչի սկզբունքների պարզ և գործնական կիրառումը։ Իսկ բեմականացումները ինչ խոսք որ անգնահատելի են։ Դրանց շնորհիվ իմանում ենք, թե ինչ օգուտներ կարելի է քաղել անցյալի և՛ լավ, և՛ վատ օրինակներից։ Նաև անհամբեր սպասում եմ, թե ինչ նոր գրականություններ են լինելու և տուն վերադառնալուց հետո դեռ երկար ժամանակ ուրախանում եմ դրանցով»։

⁶ Համաժողովները այս «վերջին օրերի» համար Եհովայի կողմից հաստատված կարևոր միջոցառումներ են (Բ Տիմոթ. 3։1)։ Դրանք օգնում են մեզ հետևել ներշնչյալ խորհրդին. «Արթո՛ւն կացէք, հաստատո՛ւն մնացէք հաւատի մէջ, քա՛ջ եղէք, զօրացէ՛ք» (Ա Կորնթ. 16։13)։ Ուրեմն՝ եկեք վճռական լինենք և ներկա գտնվենք «Թագավորության եռանդուն քարոզիչները» մարզային համաժողովի ծրագրի բոլոր մասերին ու իրար հետ քաջալերվենք։

[Շրջանակ 3–րդ էջի վրա]

Ծրագրեք բոլոր երեք օրերին էլ ներկա լինել

■ Աշխատանքի վայրում ազատ օր խնդրեք։

■ Կացարան պատվիրեք այն քաղաքում, որտեղ համաժողով է անցկացվելու։

■ Լուծեք տրանսպորտի հարցը՝ համաժողովի վայր մեկնելու համար։