Եհովայի վկաների 2003 թ. «Փառք տվեք Աստծուն» մարզային համաժողովը

¹ Իր հավատարիմ մարգարե Եսայիայի միջոցով Եհովան պատվիրել էր. «Ուշադիր եղիր դէպի ինձ, ով իմ ժողովուրդ, եւ ով իմ ազգ, ինձ ականջ դիր» (Ես. 51։4)։ Գնալով վատթարացող այս վերջին ժամանակներում համաձայն չե՞նք արդյոք, որ այսօր, ավելի քան երբևէ, կարևոր է ուշադրություն դարձնել Եհովայի պատվերներին։ Կարող ենք «ականջ» դնել Եհովային՝ հնազանդվելով նրա պատվերին՝ հավաքվել երկրպագության համար։ Որքա՜ն անհամբերությամբ ենք սպասում հավաքվելու համար նախատեսված այն հատուկ առիթին, որ մեզ են ընձեռում ամեն տարի անցկացվող մարզային համաժողովները։ 2003 թ.–ին Եհովայի վկաների Կառավարիչ մարմինը կրկին նախատեսել է անցկացնել բազմաթիվ մարզային համաժողովներ Ռուսաստանի մասնաճյուղի հսկողության տակ գտնվող տարածքում։

² Ինչպես արդեն նշվել է 2002թ. հուլիսի 1–​ի Դիտարանում, մի շարք ընտրված քաղաքներում կանցկացվեն նաև միջազգային համաժողովներ, որոնց կարող են այցելել պատվիրակներ՝ աշխարհի տարբեր ծայրերից։ Քանի որ միջազգային համաժողովներն անցկացվելու են սահմանափակ թվով քաղաքներում, ուստի դրանց կարող են ներկա գտնվել միայն այն ժողովները, որոնք հրավիրված են այդ համաժողովներին այցելելու համար։ Այնուհանդերձ, միջազգային այդ մթնոլորտը կզգացվի նաև բոլոր մարզային համաժողովներում. շատ վայրերում ներկաների թվում կլինեն միսիոներներ, և հնարավորություն կունենանք լսելու նրանց հետ կատարված որոշ դեպքեր։ Ի՞նչ կարող ենք ինքներս անել, որպեսզի լիարժեք օգուտներ քաղենք այն բոլոր պատրաստություններից, որ արդեն արվում են ամառվա համաժողովների համար։

³ Աշխատիր ներկա լինել բոլոր օրերին։ Հավատարիմ և իմաստուն ծառա դասակարգի կողմից տրվող կրթությունից ամբողջական օգուտներ քաղելու համար մենք կձգտենք ներկա գտնվել համաժողովի ամբողջ ծրագրին (Մատթ. 24։45)։ Քեզ հարկավո՞ր է աշխատանքից բացակայելու թույլտվություն խնդրել, որպեսզի ներկա գտնվես համաժողովի բոլոր օրերին։ Երուսաղեմի պարիսպները վերակառուցելու նպատակով Արտաշես թագավորից թույլտվություն խնդրելուց առաջ Նեեմիան «աղօթք ար[եց] երկնքի Աստուծուն» (Նէեմ. 2։4)։ Համաժողովի բոլոր երեք օրերին էլ ներկա լինելու համար դու նույնպես պետք է աղոթքով քաջություն խնդրես Եհովայից, որպեսզի կարողանաս քո գործատիրոջը խնդրել՝ բացակայելու աշխատանքից։ Իսկ ինչպե՞ս վարվել, եթե գործատերը դժկամում է և չի ցանկանում թույլ տալ։ Թերևս նա դրականորեն արձագանքի, եթե նրան բացատրենք, որ մեր համաժողովներում ստացած կրթությունը օգնում է մեզ լինելու ազնիվ, ջանասեր և վստահելի աշխատողներ։ Բացի այդ, եթե մեր ընտանիքի անդամներից ոմանք չեն կիսում մեր հավատալիքները, մեր կողմից հոգատարության դրսևորում կլինի, եթե հնարավորին չափ շուտ նրանց տեղեկացնենք համաժողովի հետ կապված մեր ծրագրերի մասին։

⁴ Կացարան գտնելու համար օգտվիր «Առաջարկվող կացարանների ցուցակից»։ Տեղի բնակարանային բաժինը անցած մի քանի ամիսների ընթացքում աշխատել է գտնել կացարաններ մարզային համաժողովի պատվիրակների համար։ Ձեր ժողովը շուտով կստանա «Առաջարկվող կացարանների ցուցակը», որը կփակցվի հայտարարությունների տախտակին այն բանից հետո, երբ սույն ներդիրը ներկայացվի Ծառայողական հանդիպմանը։ Սակայն եթե տվյալ շաբաթվա ընթացքում անցկացվում է երկօրյա շրջանային համաժողով, ապա միայն այդ դեպքում ժողովի Գրքի ուսումնասիրության վերակացուները կարող են իրենց խմբի համար ունենալ ցուցակի մեկ օրինակ։ Այնուամենայնիվ, նույնիսկ նման դեպքերում «Առաջարկվող կացարանների ցուցակի» օրինակներ չպետք է արվեն առանձին քարոզիչների համար։

⁵ Կացարան պատվիրելիս հետևիր 4–րդ էջի շրջանակում տրված ցուցումներին։ Այն քարոզիչների համար, ում ֆինանսական հնարավորությունները սուղ են, բնակարանային բաժինը հատուկ պայմանավորվում է հանրակացարանների և համապատասխան այլ կացարանների ղեկավարության հետ ավելի ցածր գների համար։ Ճիշտ է, այնտեղ մնալու համար շատ գումար չի պահանջվի, սակայն պետք է նշել, որ այդ կացարաններում բացակայում են բնակվելու և հանգստանալու բոլոր հարկ եղած հարմարությունները։

⁶ Հաշվի առնելով այդ ամենը՝ շատ ընտանիքներ և ժողովի առանձին անդամներ ողջ տարվա ընթացքում ամեն ամիս որոշակի գումար են հավաքում, որպեսզի կարողանան հյուրանոցում սենյակ պատվիրել համաժողովի օրերին։ Այդպիսով նրանք ի վիճակի են լինում ծածկել բոլոր ծախսերը կապված հյուրանոցի հետ, որտեղ նրանք կկարողանան համաժողովի յուրաքանչյուր օրվա վերջում լավ հանգստանալ։ Կացարաններում ապրելու պայմանները զգալի դեր են խաղում հոգևոր սնունդը լավ յուրացնելու մեր կարողության և եղբայրների ու քույրերի հետ շփումից հաճույք ստանալու հարցում։

⁷ Բնակարանային բաժինը աշխատում է գտնել կացարաններ, որոնք համապատասխանում են հայտերում նշված կարիքներին։ Այս հարցում շատ մեծ օգնություն են ցույց տալիս եղբայրներն ու քույրերը, ովքեր սիրով առաջարկում են իրենց բնակարանները համաժողովի պատվիրակների համար։ Եթե ապրում եք այն քաղաքում, որտեղ պետք է մարզային համաժողով անցկացվի և նախատեսել եք առաջարկել ձեր բնակարանը, ապա աշխատեք «Բնակարաններ» բլանկի վրա (СО-1), որը կստանաք ժողովի քարտուղարից, նշել մի շարք կարևոր մանրամասներ, ինչպես օրինակ՝ ունեք արդյոք սպիտակեղեն, կարող ես սնունդով ապահովել և այլն։

⁸ Օգնություն ցույց տալ հատուկ կարիքներ ունեցողներին։ Ձեր ժողովում կա՞ն արդյոք մարդիկ, ովքեր համաժողովին այցելելու համար օգնության կարիք են զգում։ Թեև տարեցների, վատառողջների, լիաժամ ծառայության մեջ գտնվողների հատուկ կարիքները հիմնականում հոգում են իրենց քրիստոնյա ազգականները, սակայն երեցներն ու մյուսները, տեղյակ լինելով այդպիսի անհատների հանգամանքների մասին, նույնպես կարող են, սիրուց մղված, առաջարկել իրենց աջակցությունը։

⁹ Ժողովի Ծառայողական կոմիտեն աչքի կանցկացնի բոլոր «Կացարանի հայտ՝ հատուկ կարիքներ ունեցողների համար» բլանկները, որոնք ներկայացվել են քարոզիչների կողմից։ Հետևելով այդ բլանկում տրված ցուցումներին՝ ծառայողական կոմիտեն պետք է որոշի, թե արդյոք հայտը ներկայացնողի կարիքներն իրոք այնպիսին են, որ հնարավոր չէ տեղում հոգալ։ Այս բլանկները միայն այն քարոզիչների համար են, ովքեր լավ համբավ ունեն ժողովում, ինչպես նաև կարգապահ երեխաներ։ Եթե բնակարանային բաժինը ունենա որոշ հարցեր՝ կապված հատուկ կարիքներ ունեցողների ներկայացրած հայտերի հետ, ապա կապ կհաստատի ժողովի քարտուղարի հետ։

¹⁰ Ուրիշ համաժողով այցելելը։ Եթե հանգամանքների բերումով պետք է այցելես ուրիշ համաժողով, և սենյակ ձեռք բերելու հարց է առաջանում, խնդրում ենք խորհրդակցիր ժողովի քարտուղարի հետ։ Նա քեզ կարող է տալ համաժողովի վարչության հասցեն, որը նշված է «Կացարանի հայտ՝ հատուկ կարիքներ ունեցողների համար» բլանկի ետևի մասում։ Համապատասխան հասցեով ուղարկիր քո հայտը՝ չմոռանալով դնել դատարկ ծրար՝ նամականիշով և քո հասցեով։ Եթե տվյալ քաղաքում մեկից ավելի համաժողովներ են անցկացվելու, անպայման նշիր այն համաժողովի ամսաթվերը, որը ցանկանում ես այցելել։ Այդ քաղաքի բնակարանային բաժինը քեզ կուղարկի ամենաթարմ «Առաջարկվող կացարանների ցուցակը»՝ նախատեսված տվյալ համաժողովի համար։

¹¹ Մենք «տեսարան» ենք մարդկանց առջև։ Նկատո՞ւմ են արդյոք մարդիկ տարբերություն Եհովայի վկաների և այս աշխարհի մարդկանց միջև։ Անկասկա՛ծ։ Տեսնենք, թե քաղաքներից մեկում ինչպես են արձագանքել հյուրանոցների ղեկավարները. «Մենք միշտ առնչվել ենք համաժողովների հետ, բայց ձեր համագործակցության ոգին և դրսևորած բարությունը գերազանցում են բոլորին»։ «Անցած շաբաթ մեզ մոտ հյուրընկալում էր մեկ այլ կրոնական խումբ։ Ձեր և նրանց միջև տարբերությունն ակնհայտ է»։ «Մենք միշտ կարող ենք վստահ լինել ձեր աջակցության և համագործակցության մեջ»։ Չե՞ն օգնում արդյոք այսպիսի խոսքերը ըմբռնելու, թե ինչպիսի դրական ազդեցություն է թողնում «վերին իմաստութիւնը» մեր անձնավորության վրա (Յակ. 3։17)։ Քանի որ «աշխարհքի տեսարան» ենք հանդիսանում, թող որ միշտ մեր վարքը արտացոլի Եհովա Աստծո բարձր դիրքն ու մեծափառությունը (Ա Կորնթ. 4։9)։

¹² Քանի որ այս «աշխարհի կերպարանքն անցնում է», մենք կարիք ունենք մարզային համաժողովների օգնությամբ շարունակ կենտրոնացած մնալ հոգևորի վրա (Ա Կորնթ. 7։31)։ Ճիշտ է, ջանքեր կպահանջվեն, որպեսզի այսօրվանից իսկ ծրագրենք ներկա լինելու բոլոր օրերին, սակայն արժե՛ դա անել։ Այս տարվա «Փառք տվեք Աստծուն» մարզային համաժողովի նպատակն է օգնել մեզ ամուր մնալ, մինչ սպասում ենք Եհովայի դատաստանի իրականացմանը Սատանայի աշխարհի դեմ։ Թող որ ոչ մի բան խոչընդոտ չհանդիսանա մեզ համար՝ ստանալու Եհովայի կողմից պատրաստված կրթությունը (Ես. 51։4, 5)։

[Շրջանակ 4–րդ էջի վրա]

Ինչպես համար պատվիրել հյուրանոցում

1. Հյուրանոցներ զանգահարեք աշխատանքային ժամերին, որքան հնարավոր է շուտ՝ օգտվելով «Առաջարկվող կացարանների ցուցակում» տրված հեռախոսահամարներից։

2. Հյուրանոցի աշխատողներին հայտնեք, որ դուք այցելելու եք Եհովայի վկաների համաժողովը։

3. Տեղեկացրեք, թե որ օրերին եք ապրելու հյուրանոցում։

4. Համոզվեք, որ կացարանի համար վճարը համապատասխանում է «Առաջարկվող կացարանների ցուցակում» նշված գնին։ Մի՛ համաձայնվեք ավելի բարձր գին վճարել։

Խնդրում ենք

◼ Օգտվել միայն այն հյուրանոցներից, որոնք նշված են «Առաջարկվող կացարանների ցուցակում»։

◼ Պատվիրեք միայն այն կացարանը, որից իրոք օգտվելու եք։

◼ Մի փոխեք ձեր սկզբնական պատվերը։

◼ Հիշե՛ք, որ բոլոր ծախսերը դուք պետք է ծածկեք։

◼ Փորձեք կողմնորոշվել այն գներով, որոնք նշված են «Առաջարկվող կացարանների ցուցակում»։

Ինչպես հայտ ներկայացնել հատուկ կարիքներ ունեցողների համար

1. Կացարանի համար հայտեր մի ներկայացրեք զուտ նամակով, հեռախոսով կամ այլ նման ձևով։

2. Խնամքով լրացրեք «Կացարանի հայտ հատուկ կարիքներ ունեցողների համար» բլանկը։

3. Հայտը անմիջապես լրացրեք, երբ ժողովում հայտարարեն նամակի և «Առաջարկվող կացարանների ցուցակի» ստանալու մասին։

4. Պատրաստ եղեք համագործակցել ձեր ընտրած կացարանի տիրոջ հետ, հետևել օրվա սահմանված ծրագրին, պահպանել մաքրությունը և այլն։