Սովորեցնենք հեզ անհատներին քայլել Աստծու ճանապարհով
1. Ի՞նչ է մտնում աշակերտ պատրաստելու գործի մեջ։
1 Քրիստոսի՝ առաջին դարի աշակերտներին անվանում էին «այն ճանապարհին» հետևող մարդիկ (Գործք 9։2)։ Ճշմարիտ քրիստոնեությունը անդրադառնում է անհատի կյանքի բոլոր բնագավառների վրա (Առակ. 3։5, 6)։ Ուստի Աստվածաշնչի ուսումնասիրություններ անցկացնելը ավելին է նշանակում, քան պարզապես աստվածաշնչային ուսմունքների վերաբերյալ ճշգրիտ գիտելիքներ տալը։ Մենք պետք է նաև օգնենք Աստվածաշունչն ուսումնասիրողներին քայլել Եհովայի ճանապարհով (Սաղ. 25։8, 9)։
2. Ի՞նչը կարող է մղել Աստվածաշունչը ուսումնասիրողին պահել Աստծու պատվիրանները։
2 Սեր Եհովայի և Հիսուսի հանդեպ։ Որքա՜ն դժվար է անկատար մարդկանց համար իրենց մտածելակերպը, տեսակետները, խոսքը և վարքը ներդաշնակեցնել Աստծու կամքին (Հռովմ. 7։21–23; Եփես. 4։22–24)։ Սակայն Աստծու և նրա Որդու հանդեպ սերը մղում է հեզ անհատներին հանձն առնել այդ դժվար գործը (Յովհ. 14։15; Ա Յովհ. 5։3)։ Ինչպե՞ս կարող ենք օգնել Աստվածաշունչ ուսումնասիրողներին, որ այդպիսի սեր զարգացնեն։
3. Ինչպե՞ս կարող ենք օգնել ուսումնասիրողին սեր զարգացնել Եհովայի և Հիսուսի հանդեպ։
3 Օգնիր ուսումնասիրողին հասկանալ, թե ինչպիսի անձնավորություն է Եհովան։ Մի եղբայր ասում է. «Մարդիկ չեն կարող սիրել մեկին, ում չեն ճանաչում, ուստի ուսումնասիրության հենց սկզբից ես Աստվածաշնչի օգնությամբ նրանց սովորեցնում եմ Աստծու անունը և առիթներ եմ փնտրում, որպեսզի Եհովայի հատկությունների մասին խոսեմ նրանց հետ»։ Դա անելու համար կարելի է մարդկանց ուշադրությունը հրավիրել Հիսուսի օրինակի վրա (Յովհ. 1։14; 14։9)։ Բացի այդ, օգնիր ուսումնասիրողին խորհել Աստծու և նրա Որդու հրաշալի հատկությունների շուրջ՝ օգտվելով «Աստվածաշունչը սովորեցնում է» գրքի յուրաքանչյուր գլխի վերջում տրված կրկնության շրջանակից։
4. ա) Ինչո՞ւ է շատ ուսումնասիրողների համար քարոզելը դժվար։ բ) Ինչպե՞ս կարող ենք օգնել ուսումնասիրողներին իրենց առաջին քայլերը կատարել քրիստոնեական ծառայության մեջ։
4 Սովորեցրու անձնական օրինակով։ Որպես ուսուցիչներ և մարդկանց դեպի Աստծու կազմակերպությունը առաջնորդողներ՝ մենք մեր գործերով ցույց ենք տալիս, թե ինչ է նշանակում քայլել Աստծու ճանապարհով (Ա Կորնթ. 11։1)։ Օրինակ՝ Աստվածաշունչն ուսումնասիրողների մեծամասնության համար անսովոր բան է մոտենալ անծանոթ մարդկանց և խոսել իրենց հավատալիքների մասին։ Հետևաբար, մեզանից գուցե համբերություն և հմտություն պահանջվի, որ օգնենք նրանց սեր, հավատ և համարձակություն զարգացնել իրենց մեջ, ինչն անհրաժեշտ է քարոզչական ծառայությանն ու աշակերտներ պատրաստելու գործին մասնակցելու համար (Բ Կորնթ. 4։13; Ա Թեսաղ. 2։2)։ Ուսումնասիրողներին օգնելու ցանկությունը կմղի մեզ նրանց կողքին լինել, երբ նրանք իրենց առաջին քայլերն են կատարում քրիստոնեական ծառայության մեջ։
5. Ինչպե՞ս կարող է քո լավ օրինակը օգնել ուսումնասիրողին հասկանալու, թե ինչ է նշանակում պահել Աստծու պատվիրանները։
5 Քո օրինակը տեսնելով՝ Աստվածաշունչն ուսումնասիրողները կարող են նաև արժեքավոր դասեր սովորել քրիստոնեական կյանքի այլ կարևոր բնագավառների վերաբերյալ։ Երբ այցելում ես հիվանդ անհատներին կամ ժողովի հանդիպումների ժամանակ ջերմորեն ողջունում ես մյուսներին, ուսումնասիրողները տեսնում են, թե ինչպես կարելի է սեր դրսևորել գործերով (Յովհ. 15։12)։ Երբ մասնակցում ես Թագավորության սրահի մաքրությանը կամ օգնում ես մյուսներին, դրանով դու սովորեցնում ես ուսումնասիրողներին ծառայել ուրիշներին (Յովհ. 13։12–15)։ Երբ նրանք տեսնում են, որ դու պարզ կյանքով ես ապրում, հասկանում են, թե ինչ է նշանակում «առաջ Աստուծոյ արքայութիւնը» փնտրել (Մատթ. 6։33)։
6. Ի՞նչ արդյունքներ է բերում այն, որ օգնում ենք հեզ անհատներին ծառայել Եհովային։
6 Մարդկանց Աստծու Խոսքը սովորեցնելը և աշակերտներ պատրաստելը մեծ ջանքեր է պահանջում։ Սակայն որքա՜ն ենք ուրախանում, երբ տեսնում ենք, որ հեզ անհատները «ճշմարտութեան մէջ են գնում» (Գ Յովհ. 4)։