Մեր ծառայությունը կարեկցանքի արտահայտություն է

¹ Հիսուսը տեսնում էր, որ իր պատգամը լսող հազարավոր մարդիկ «յոգնած եւ ցիրուցան եղած էին, ինչպէս ոչխարներ որ հովիւ չ’ունին» (Մատթ. 9։36)։ Այդ մարդկանց հանդեպ քնքշություն ու սեր դրսևորելով՝ նա սովորեցրեց նրանց Եհովայի ուղիների մասին, մխիթարեց ու կարեկցանք ցույց տալով՝ հոգաց նրանց հոգևոր կարիքները։ Խորհրդածելով Հիսուսի դրսևորած վարքի շուրջ՝ մենք սովորում ենք մտածել և զգալ Հիսուսի պես, և արդյունքում մեր ծառայության մեջ ակնհայտ է լինում կարեկցանքը։

² Մի պահ խորհենք այն մասին, թե ինչպես էր Հիսուսը արձագանքում, երբ հուսահատված՝ մարդիկ օգնություն ստանալու ակնկալիքով մոտենում էին իրեն (Ղուկ. 5։12, 13; 8։43–48)։ Նա ուշադրություն էր ցույց տալիս նրանց հանդեպ, ովքեր առանձնահատուկ կարիքներ ունեին (Մարկ. 7։31–35)։ Հիսուսը գիտեր մարդկանց զգացումները և հոգատարություն էր ցուցաբերում նրանց հանդեպ։ Նա մարդկանց արտաքինից այն կողմ էր նայում (Ղուկ. 7։36–40)։ Այո՛, Հիսուսը կատարելապես արտացոլում էր մեր Աստծու քնքուշ սերը։

³ Գթասրտությունից մղված։ Հիսուսն իր ծառայությունը չէր կատարում՝ զուտ պարտքի զգացումից ելնելով։ Նա գթասրտություն էր ցուցաբերում մարդկանց հանդեպ (Մարկ. 6։34)։ Նմանապես այսօր մենք պարզապես չենք տարածում բարի լուրը, այլ փորձում ենք փրկել մարդկանց կյանքը։ Ձգտիր հասկանալ, թե ինչու են մարդիկ որոշակի ձևով արձագանքում։ Ինչո՞ւ են նրանք անհանգստացած կամ հոգսերով տարված։ Գուցե նրանք իրենց արհամարհված կամ խաբվա՞ծ են զգում հոգևոր կեղծ հովիվների կողմից։ Եթե մարդկանց հանդեպ անկեղծ հետաքրքրություն ցույց տանք, դա թերևս մղի նրանց լսելու բարի լուրը (Բ Կորնթ. 6։4, 6)։

⁴ Կարեկցանք ցույց տալով՝ մենք հասնում ենք մարդկանց սրտին։ Ներկայացնենք օրինակով. մի կին ողբերգական մահով կորցրել էր իր երեք–ամսյա աղջկան։ Երբ երկու Վկաներ այցելեցին այդ կնոջը, նա նրանց ներս հրավիրեց՝ մտադրված լինելով հերքել նրանց բերած պատճառներն այն հարցի վերաբերյալ, թե ինչու է Աստված թույլատրում տառապանքը։ Սակայն հետագայում այդ կինն ասաց. «Նրանք ինձ մեծ կարեկցանքով լսեցին, և մեր զրույցն այնպիսի թեթևացում բերեց ինձ, որ համաձայնեցի, որ մեկ անգամ էլ այցելեն ինձ»։ Ձգտո՞ւմ ես կարեկցանք ցույց տալ յուրաքանչյուր անհատի նկատմամբ, որին հանդիպում ես ծառայության ժամանակ։

⁵ Կարեկցանք զարգացնելով՝ մենք կկարողանանք իսկական մխիթարություն ցույց տալ մարդկանց հանդեպ։ Այդ հատկությունը զարգացնելով՝ մենք փառաբանում ենք Եհովային, որը «գըթութիւնների Հայրն» է (Բ Կորնթ. 1։3)։