Պատրա՞ստ ես բնական աղետներին
1. Ինչո՞ւ խելամիտ կլինի պատրաստ լինել բնական աղետներին։
1 Ամեն տարի ամբողջ աշխարհում երկրաշարժերը, ցունամիները, մուսոնային անձրևները, փոթորիկները, տոռնադոները և ջրհեղեղները վնասներ են հասցնում միլիոնավոր մարդկանց, այդ թվում նաև մեր եղբայրներից ու քույրերից շատերին։ Քանի որ բնական աղետները վրա են հասնում անսպասելիորեն և մեզանից յուրաքանչյուրին էլ կարող են վնաս հասցնել, խելամիտ կլինի նախօրոք պատրաստ լինել դրանց (Առակ. 21։5)։
2. Ինչո՞ւ պետք է երեցներին հայտնենք մեր հասցեի և հեռախոսահամարի վերջին տվյալները։
2 Ինչ կարելի է նախօրոք ձեռնարկել։ Երբեմն իշխանությունները կարողանում են զգուշացնել սպասվող աղետների մասին։ Նման նախազգուշացումներին ուշադրություն դարձնելը կարևոր է (Առակ. 22։3)։ Այդպիսի իրավիճակներում երեցները կփորձեն կապ հաստատել ժողովի բոլոր անդամների հետ, որպեսզի օգնեն նրանց հարկ եղած միջոցները ձեռնարկել։ Աղետից հետո երեցները նույնպես կջանան կապ հաստատել ժողովի հետ համագործակցող բոլոր անհատների հետ՝ պարզելու համար, թե արդյոք նրանք ապահով վիճակում են և թե ինչ օգնության կարիք ունեն։ Թանկարժեք ժամանակի կորուստ կլինի, եթե երեցները քարոզիչների հետ կապ հաստատելու համար չունենան նրանց թարմ տվյալները։ Ուստի անչափ կարևոր է, որ քարոզիչները քարտուղարին և իրենց Գրքի ուսումնասիրության վերակացուին միշտ հայտնեն իրենց հասցեի և հեռախոսահամարի վերջին տվյալները։
3. Ինչպե՞ս կարող ենք համագործակցել երեցների հետ, եթե ապրում ենք աղետի ենթակա գոտում։
3 Եթե ժողովը գտնվում է աղետի ենթակա գոտում, երեցները կարող են խնդրել քարոզիչներին, որ հայտնեն իրենց որևէ հարազատի կամ ընկերոջ անունը և հեռախոսահամարը, ովքեր չեն ապրում մերձակայքում, և որոնց հետ հնարավոր կլինի կապ հաստատել արտակարգ իրավիճակներում։ Դրա շնորհիվ երեցները կկարողանան իմանալ, թե որտեղ են գտնվում էվակուացված անհատները։ Երեցները կարող են նաև կազմել պլան, որում նշված կլինի, թե ինչ պետք է անի ժողովը արտակարգ իրավիճակներում։ Այդ պլանում պետք է նշված լինեն անհրաժեշտ իրերի ցուցակը, որ յուրաքանչյուրը պետք է պատրաստ ունենա, էվակուացիայի կազմակերպման պլանը և այն միջոցները, որ նախատեսված են հատուկ կարիքներ ունեցողներին օգնելու համար։ Այս հարցերում շատ կարևոր է համագործակցությունը (Եբր. 13։17)։
4. Ի՞նչ պետք է անենք, եթե մեր բնակավայրում աղետ տեղի ունենա։
4 Ինչ կարելի է անել աղետից հետո։ Ի՞նչ պետք է անես, եթե ձեր բնակավայրում աղետ տեղի ունենա։ Նախևառաջ պետք է հոգ տանես ընտանիքիդ առաջնահերթ կարիքների մասին։ Եթե ի վիճակի ես, օգնիր նաև մյուս տուժածներին։ Որքան հնարավոր է շուտ կապ հաստատիր ձեր Գրքի ուսումնասիրության վերակացուի կամ մեկ ուրիշ երեցի հետ։ Դա պետք է անել նույնիսկ այն դեպքում, եթե ապահով վիճակում ես և օգնության կարիք չունես։ Իսկ եթե ունես, ապա համոզված եղիր, որ քո եղբայրները ամեն ջանք թափում են քեզ օգնություն ցույց տալու համար (Ա Կորնթ. 13։4, 7)։ Հիշիր, որ Եհովան տեսնում է քո իրավիճակը. վստահ եղիր, որ նա կաջակցի քեզ (Սաղ. 37։39; 62։8)։ Ամեն առիթ օգտագործիր մյուսներին հոգևոր և էմոցիոնալ առումով օգնություն ցույց տալու համար (Բ Կորնթ. 1։3, 4)։ Ձգտիր հնարավորին չափ շուտ վերսկսել քո աստվածապետական գործունեությունը (Մատթ. 6։33)։
5. Ինչպե՞ս պետք է մենք՝ քրիստոնյաներս, վերաբերվենք հնարավոր աղետներին։
5 Չնայած բնական աղետներն այսօր գնալով ավելի մեծ անհանգստություն են առաջ բերում ամբողջ աշխարհում, մենք կարող ենք վստահությամբ նայել ապագային։ Շուտով բոլոր աղետները անցյալի գիրկը կանցնեն (Յայտն. 21։4)։ Իսկ մինչ այդ, մենք կարող ենք ողջամտության սահմաններում քայլեր ձեռնարկել, որ պատրաստ լինենք դիմագրավելու նեղություններն ու դժվարությունները և շարունակենք եռանդով քարոզել բարի լուրը։