Քարոզչության գործը տոկունություն է պահանջում
1 Պողոս առաքյալը 30 տարուց ավելի քարոզում էր բարի լուրը։ Դա իրեն մեծ բավականություն էր պատճառում։ Հայտնի է, որ ցանկացած արժեքավոր գործ զերծ չի լինում տարբեր դժվարություններից։ Նույնը կարելի է ասել և Պողոսի ծառայության մասին (2 Կորնթ. 11։23–29)։ Այսուհանդերձ առաքյալը չէր հանձնվում (2 Կորնթ. 4։1)։ Նա ապավինում էր Եհովայի զորությանը և տոկունությամբ շարունակում էր իր ծառայությունը (Փիլիպ. 4։13)։ Պողոսը տոկունության լավ օրինակ թողեց, ուստի կարող էր ասել. «Ընդօրինակե՛ք ինձ, ինչպես որ ես էլ՝ Քրիստոսին» (1 Կորնթ. 11։1)։
2 Ինչպես տոկալ այսօր։ Ամեն օր մեր եղբայրներից և քույրերից շատերը ենթարկվում են ծաղրանքի, բախվում են հակառակության կամ անտարբերության ընտանիքի անդամների, աշխատակիցների կամ համադասարանցիների կողմից (Մատթ. 10։35; Հովհ. 15։20)։ Թերևս դու նույնպես։ Բացի դրանից, հնարավոր է՝ ունես առողջական խնդիրներ, անհանգստություններ կամ ստիպված ես օրեցօր պայքարել գայթակղությունների դեմ։ Այդ ամենը փորձում է քո հավատն ու տոկունությունը։ Ի՞նչը կարող է օգնել մեզ։ Օրինակ՝ Աստծու վաղեմի ծառաների, ինչպես նաև մեր օրերի քրիստոնյաների կյանքը։ Քննելով, թե ինչպես են նրանք հաղթահարել տարբեր դժվարություններ՝ մենք կլցվենք զորությամբ և կկարողանանք տոկալ (1 Պետ. 5։9)։
3 Տոկունությամբ ծառայելու համար նաև հարկավոր է «հագնել Աստծու ամբողջ սպառազինությունը» (Եփես. 6։10–13, 15)։ Աղոթքը նույնպես անչափ կարևոր դեր է խաղում։ Ի պատասխան՝ Աստված կտա իր սուրբ ոգին, որպեսզի կարողանանք տոկալ փորձությունների ներքո (2 Կորնթ. 6։4–7)։ Մեր հոգևոր պատերազմում հաղթանակած դուրս գալու համար նաև հարկավոր է ականջ դնել Աստծու «վկայություններին [հիշեցումներին, ՆԱ]» (Սաղ. 119։24, 85–88)։ Երեխայի պես, որը կրկին ու կրկին կարդում է իր սիրառատ հայրիկի նամակը՝ մենք օրեցօր ընթերցում ենք մեր սիրասուն Հոր նամակը՝ Աստվածաշունչը։ Դրա շնորհիվ մեր փոխհարաբերությունները նրա հետ ամրանում են։ Կանոնավորաբար անձնական ուսումնասիրություն կատարելով՝ մենք ձեռք ենք բերում իմաստություն, որն օգնում է հաղթահարելու տարբեր փորձություններ։ Բացի դրանից, մենք իմանում ենք Եհովայի տեսակետը տարբեր հարցերի վերաբերյալ։ Դա իր հերթին օգնում է ճիշտ որոշումներ կայացնել և պահել անարատությունը (Առակ. 2։10, 11)։
4 Տոկունությունը օրհնություններ է բերում։ Տոկունությամբ ծառայելով՝ մենք, Պողոս առաքյալի նման, ուրախացնում ենք Եհովայի սիրտը, նաև օրհնություններ ենք ստանում և՛ մենք, և՛ ուրիշները (Առակ. 27։11)։ Ուստի եկե՛ք վճռենք շարունակել մեր ծառայությունը ու դրանով փաստել, որ անսասան հավատ ունենք, որն «ավելի մեծ արժեք ունի, քան ոսկին, որ կործանվում է՝ չնայած կրակով ստուգված լինելուն» (1 Պետ. 1։6, 7)։