««Հիմնովին վկայություն տանք» Աստծու Թագավորության մասին»
1. Ի՞նչ ենք քննարկելու Աստվածաշնչի ուսումնասիրության հանդիպման ժամանակ՝ սկսած մարտի 14-ով սկսվող շաբաթից։
1 Սկսած 2011թ. մարտի 14-ից՝ Աստվածաշնչի ուսումնասիրության հանդիպման ժամանակ քննարկելու ենք ««Հիմնովին վկայություն տանք» Աստծու Թագավորության մասին» գիրքը։ Այս հրատարակությունը «Գործեր» գիրքն այնպես է ներկայացնում, որ ընթերցողը կարողանա մեծ ոգևորություն ապրել՝ հետևելով արագորեն իրար հաջորդող դեպքերի զարգացմանը։ Այս ձեռնարկում համար առ համար չի բացատրվում «Առաքյալների Գործերը»։ Այն օգնում է մեզ օգտակար դասեր քաղելու գրքում նկարագրված դեպքերից և կիրառելու դրանք մեր կյանքում (Հռոմ. 15։4)։
2. Նշիր «Վկայություն տանք» գրքի մի քանի առանձնահատկություններ։
2 Գրքի առանձնահատկությունները։ Այս գրքի 2-րդ էջի ներածության մեջ կարող ենք գտնել Կառավարիչ մարմնի կողմից գրված մի ջերմ նամակ, որտեղ ասվում է, թե ինչպես կարող ենք օգուտներ քաղել այս հրատարակությունից։ 2-րդ գլխից սկսած՝ յուրաքանչյուր գլխի սկզբում նշվում է տվյալ գլխի հակիրճ բովանդակությունը և «Գործեր» գրքի քննարկվելիք համարները։ Մի շարք գլուխներում կան շրջանակներ, որոնք լրացուցիչ տեղեկություններ են պարունակում որոշ անձանց, վայրերի, ինչպես նաև իրադարձությունների վերաբերյալ։ Ձեռնարկն ունի լայն լուսանցքներ, որտեղ կարելի է նշումներ անել։ Գիրքը հարուստ է գունագեղ նկարներով, որոնցում պատկերված են աստվածաշնչյան դրվագներ։ Այս նկարազարդ էջերը գրավում են ընթերցողին ու մասնակից դարձնում անցյալում տեղի ունեցած հիշարժան իրադարձություններին։ Իսկ գրքի վերջում կա նկարների ցանկ, որը բացատրում է, թե ինչ է պատկերված տարբեր նկարներում։ Առջևի և հետևի կազմերի ներսի կողմից կան քարտեզներ, որոնք օգնում են մեզ պատկերացնելու, թե առաջին դարի քրիստոնյաները ինչ ճանապարհներ են կտրել-անցել, որպեսզի քարոզեն բարի լուրը «մինչև աշխարհի ծայրերը» (Գործ. 1։8)։
3. Ի՞նչ կարևոր հարցերի պատասխաններ կստանանք՝ ուսումնասիրելով «Գործեր» գիրքը։
3 Կարևոր հարցերի պատասխանները։ «Գործեր» գրքի ուսումնասիրությունը կօգնի մեզ գտնելու ծառայության հետ կապված կարևոր հարցերի հստակ պատասխանները։ Օրինակ՝ ո՞ր գործն է ցույց տալիս, թե ովքեր են Հիսուս Քրիստոսի ճշմարիտ հետևորդները։ Ո՞վ է առաջնորդում այս համաշխարհային քարոզչական գործը և ինչպե՞ս։ Ի՞նչ հնարավորություններ է ստեղծում հալածանքն ու հակառակությունը քարոզիչների համար։ Ի՞նչ դեր է խաղում սուրբ ոգին մեր ծառայության մեջ։
4. Ինչպե՞ս կարող ենք լիարժեք օգուտներ քաղել՝ ուսումնասիրելով այս հրատարակությունը։
4 Մենք լիարժեք օգուտներ կքաղենք, եթե նախօրոք պատրաստվենք ժողովի հանդիպմանը և մեկնաբանություններ տանք։ Ներկա եղիր յուրաքանչյուր հանդիպմանը և մտածիր, թե ինչպես կարող ես կիրառել սովորածդ ծառայության մեջ։ Թող որ այս հրաշալի գրքի ուսումնասիրությունը մղի քեզ հիմնովին վկայություն տալու Աստծու Թագավորության մասին (Գործ. 28։23)։