Հարցերի արկղ

◼ Ի՞նչ պետք է սովորեն երեխաները հոգևորապես հասունանալու համար։

Քրիստոնյա ծնողները շատ ջանքեր են թափում իրենց երեխաներին «Եհովայի խրատով» դաստիարակելու համար (Եփես. 6։4)։ Օրինակ՝ շատ ծնողներ ամեն առավոտ երեխաների հետ քննարկում են օրվա խոսքը։ Իսկ ընտանեկան երկրպագության և այլ առիթների ժամանակ ընտանիքով դիտում ու քննարկում են որևէ տեսաֆիլմ, զրուցում են «Երիտասարդները հարցնում են» խորագրից որևէ նյութի մասին, Աստվածաշունչը դերերով են կարդում կամ բեմադրում են որոշ հատվածներ։ Բայց որպեսզի երեխաները «ձգտեն հասունության», նրանց հարկավոր է սովորեցնել աստվածաշնչյան խոր ճշմարտություններ (Եբր. 6։1)։

Վերհիշենք, թե ինչ ենք սովորեցնում մեր տարածքում ապրող մարդկանց։ Թե՛ առաջին այցելության, թե՛ վերայցելության ժամանակ ջանում ենք Աստվածաշնչի ուսումնասիրություն սկսել «Ի՞նչ է սովորեցնում Աստվածաշունչը իրականում» գրքով։ Այս գիրքն ավարտելուց հետո ուսումնասիրությունը շարունակում ենք «Մնա Աստծու սիրո մեջ» գրքով։ Ինչո՞ւ։ «Աստվածաշունչը սովորեցնում է» գիրքը օգնում է ուսումնասիրողին ձեռք բերելու աստվածաշնչյան հիմնական գիտելիքներ, իսկ «Աստծու սերը» գիրքը նրան սովորեցնում է աստվածաշնչյան սկզբունքները կիրառել ամենօրյա կյանքում։ Այս երկու հրատարակությունները օգնում են նորերին «արմատանալու» Քրիստոսի մեջ և «հավատի մեջ հաստատվելու» (Կող. 2։6, 7)։ Արդյոք այս գրքերը օգտակար չե՞ն լինի նաև մեր երեխաների համար։ Նրանք նույնպես պետք է սովորեն փրկանքի, Թագավորության և այն մասին, թե ինչ վիճակում են մահացածները։ Երեխաները նույնպես պետք է իմանան, թե ինչու է Աստված թույլատրում տառապանքը և թե ինչպես բնորոշել վերջին օրերը։ Նրանք պետք է համոզված լինեն, որ Եհովայի վկաներն են սովորեցնում ճշմարտությունը։ Երեխաները նաև պետք է հասկանան աստվածաշնչային սկզբունքները և թե ինչպես մարզել «իրենց ըմբռնողականությունը» (Եբր. 5։14)։ Ինչ խոսք, ծնողները պետք է հաշվի առնեն երեխայի տարիքը և թե որքանով կարող են հասկանալ տվյալ նյութը։ Այնուամենայնիվ շատ երեխաներ ընդունակ են սովորելու Աստվածաշնչի խոր ճշմարտությունները վաղ հասակից (Ղուկ. 2։42, 46, 47)։