Ձայնագրություններ. ինչպես օգտագործել դրանք

1. Բացի տպագրված հրատարակություններից, ուրիշ ի՞նչ օգտակար միջոց ունենք։

¹ Շատերը հաճույքով են օգտվում jw.org կայքից, որպեսզի «հաճելի խոսքեր» և «ճշմարտության ճշգրիտ խոսքեր» կարդան (Ժող. 12:10)։ Իսկ օգտվո՞ւմ ես ձայնագրություններից։ Դրանց շնորհիվ հնարավոր է լսել մեր կայքում տեղադրված նյութի մեծ մասը։ Ինչպե՞ս կարող ենք օգտագործել ձայնագրությունները։

2. Ինչպե՞ս կարող ենք օգտագործել ձայնագրությունները անձնական կամ ընտանեկան ուսումնասիրության համար։

² Անձնական կամ ընտանեկան ուսումնասիրության համար։ Ճանապարհ գնալիս կամ առօրյա գործեր անելիս Աստվածաշնչի, ամսագրերի կամ որևէ հրատարակության ձայնագրություն լսելով ավելի լավ կօգտագործենք մեր ժամանակը (Եփես. 5:15, 16)։ Մենք բազմազանություն կմտցնենք ընտանեկան երկրպագության մեջ, եթե լսենք նյութի ընթերցանությունը և հետևենք մեր տպագիր օրինակով։ Անձնական ուսումնասիրության ժամանակ ձայնագրությունները օգտագործելը հատկապես օգտակար է, եթե ցանկանում ենք բարելավել մեր ընթերցանությունը կամ եթե լեզու ենք սովորում։

3. Մեր տարածքում ո՞ւմ համար կարող են օգտակար լինել ձայնագրությունները։

³ Ծառայության համար։ Մեր տարածքում ապրող մարդիկ, որոնք ասում են, որ կարդալու համար ժամանակ չունեն, գուցե հաճույքով լսեն ձայնագրությունները։ Կամ գուցե հանդիպենք ուրիշ լեզվով խոսող մարդկանց, որոնք թերևս արձագանքեն Թագավորության լուրին, եթե լսեն այն իրենց «մայրենի լեզվով» (Գործ. 2:6–8)։ Որոշ մշակույթներում ընդունված է տեղեկություն փոխանցել բանավոր կերպով։ Օրինակ՝ հմոնգ ցեղը իր պատմությունը պահպանում է հաջորդ սերունդներին բերանացի փոխանցելով։ Աֆրիկյան մշակույթներից շատերում էլ սիրում են սովորել պատմելու միջոցով։

4. Մեր տարածքում ապրող մարդկանց օգնելու համար ի՞նչ հարցեր պետք է տանք ինքներս մեզ։

⁴ Ձեր ժողովի տարածքում արդյունավետ կլինի՞ բնակչի լեզվով ձայնագրություն հնչեցնելը։ Հնարավո՞ր է՝ ինչ-որ մեկի համար օգտակար լինի, եթե հրատարակության ձայնագրությունը ուղարկենք էլ. փոստով։ Կարո՞ղ ենք ձայնագրությունը արտագրել սեղմապնակի վրա և թերևս տպագրված օրինակի հետ տալ հետաքրքրվող անհատին։ Ամեն մի էլեկտրոնային գիրք, գրքույկ, ամսագիր կամ թերթիկ, որ տալիս ենք ծառայության ժամանակ, պետք է նշել հաշվետվության մեջ։ Ձայնագրությունները նախատեսված են այն բանի համար, որ օգտագործենք անձնական ուսումնասիրության ժամանակ և ցանենք Թագավորության ճշմարտության սերմերը (1 Կորնթ. 3:6)։