ԱՊՐԵՆՔ ՈՐՊԵՍ ՔՐԻՍՏՈՆՅԱ
Ինչպե՞ս դառնալ Աստծու Խոսքի ջանասեր ուսումնասիրող
Կցանկանայի՞ր փորձությունների ներքո հավատարիմ մնալ Աստծուն, ինչպես Դանիելը։ Նա ջանասիրաբար ուսումնասիրում էր Աստծու Խոսքը, այդ թվում խորիմաստ մարգարեությունները (Դն 9։2)։ Աստվածաշունչը ջանասիրաբար ուսումնասիրելը կարող է օգնել, որ հավատարիմ մնաս։ Ինչպե՞ս։ Դրա շնորհիվ կամրանա քո հավատն այն բանի հանդեպ, որ Եհովայի խոստումները կիրականանան (Հս 23։14)։ Նաև կմեծանա քո սերը Եհովայի հանդեպ, ինչն էլ կմղի, որ անես այն, ինչ ճիշտ է (Սղ 97։10)։ Բայց ինչի՞ց կարելի է սկսել։ Նկատի առ հետևյալ առաջարկները։
Ի՞նչ ուսումնասիրեմ։ Ուսումնասիրության լավ գրաֆիկ ունենալը ներառում է ժողովի հանդիպումներին պատրաստվելը։ Աստվածաշնչի շաբաթական ընթերցանությունը շատ ավելի մեծ օգուտներ կբերի և գոհունակություն կպարգևի, եթե ժամանակ տրամադրես և փնտրտուքներ անես այն մտքերի վերաբերյալ, որոնք չես հասկացել։ Այս ամենից բացի՝ ոմանք նաև որոշում են ավելին իմանալ աստվածաշնչյան մարգարեությունների, Աստծու սուրբ ոգու պտղի տարբեր երեսակների, Պողոսի միսիոներական շրջագայությունների կամ էլ Աստծու ստեղծագործությունների մասին։ Եթե օրվա ընթացքում Աստվածաշնչից որևէ հարց է անցնում մտքովդ, գրի առ այն և քո հերթական ուսումնասիրության ժամանակ փնտրտուք արա այդ թեմայով։
Որտեղի՞ց գտնեմ ավելի շատ տեղեկություն։ Որոշ տարբերակների մասին խոսվում է «Փնտրտուքների գործիքներ՝ հոգևոր գանձեր գտնելու համար» տեսանյութում։ Փնտրտուքներ անելու քո հմտությունները ստուգելու համար փորձիր գտնել, թե որ աշխարհակալ ուժերին են ներկայացնում «Դանիել» 7-րդ գլխում նկարագրվող գազանները։
Որքա՞ն ժամանակ տրամադրեմ ուսումնասիրությանը։ Կանոնավոր ուսումնասիրությունը հոգևոր լավ առողջություն ունենալու գրավականն է։ Անհրաժեշտության դեպքում սկզբում կարող ես համեմատաբար կարճ ժամանակ տրամադրել ուսումնասիրությանը, բայց հետո աստիճանաբար ավելացնել ժամանակը։ Աստծու Խոսքն ուսումնասիրելը նման է թաքնված գանձեր գտնելու նպատակով հողը փորելուն. որքան շատ գանձ ես գտնում, այնքան փորելու ցանկությունդ մեծանում է (Առ 2։3–6)։ Նմանապես՝ որքան շատ գանձեր գտնես Աստծու Խոսքից, այնքան ավելի կմեծանա այն ուսումնասիրելու փափագդ, և Աստվածաշնչի կանոնավոր ուսումնասիրությունը միշտ կլինի քո գրաֆիկի անբաժանելի մասը (1Պտ 2։2)։
«ԴԱՆԻԵԼ» 7-ՐԴ ԳԼԽՈՒՄ ՆԿԱՐԱԳՐՎՈՂ ԳԱԶԱՆՆԵՐԸ Ո՞Ր ԱՇԽԱՐՀԱԿԱԼ ՈՒԺԵՐՆ ԵՆ ՆԵՐԿԱՅԱՑՆՈՒՄ
ՀԱՎԵԼՅԱԼ ՀԱՐՑ
Ինչպե՞ս է կատարվել Դանիել 7։8, 24-ում գրվածը։
ՀԱՋՈՐԴ ՈՒՍՈՒՄՆԱՍԻՐՈՒԹՅԱՆ ԹԵՄԱՆ
Ո՞ւմ են ներկայացնում «Հայտնություն» 13-րդ գլխի գազանները։