Նոր հանդիպում՝ Մեր քրիստոնեական կյանքը և ծառայությունը

2015 ԹՎԱԿԱՆԻ հոկտեմբերի 3-ին տեղի ունեցած Դիտարանի, Աստվածաշնչի և թերթիկի ընկերության (Փենսիլվանիա) տարեկան հանդիպման ժամանակ Կառավարիչ մարմնի անդամ Էնթոնի Մորիսը հայտարարեց, որ Աստվածապետական ծառայության դպրոցը, Ծառայողական հանդիպումը և Աստվածաշնչի ուսումնասիրության հանդիպումը փոխարինվելու էին նոր հանդիպումով, որը կոչվելու էր Մեր քրիստոնեական կյանքը և ծառայությունը։ Եղբայր Մորիսը բացատրեց նաև, որ «Մեր թագավորական ծառայությունը» թերթիկի փոխարեն՝ հրատարակվելու էր նոր քառագույն ձեռնարկ, որը բաղկացած էր լինելու ութ էջից և լույս էր տեսնելու ամեն ամիս։ Այն կոչվելու էր «Մեր քրիստոնեական կյանքը և ծառայությունը հանդիպման ձեռնարկ»։ Այս ձեռնարկում նշված էին լինելու յուրաքանչյուր շաբաթվա հանդիպման ծրագիրը, լինելու էին նաև նկարներ, որոնք օգնելու էին Աստվածաշնչի ընթերցանությունը ավելի պատկերավոր դարձնելու։

Այս նոր հանդիպումը բաղկացած է երեք բաժիններից։

1. Գանձեր Աստծու Խոսքից։ Այս բաժնի առաջին մասում ընդգրկված է տասը րոպե տևողությամբ ելույթ՝ հիմնված Աստվածաշնչի շաբաթական ընթերցանության և հանդիպման ձեռնարկում տեղ գտած նկարների վրա։ Երկրորդ մասը, որը կոչվում է Փնտրենք հոգևոր գանձեր, ութ րոպե տևողությամբ հարց ու պատասխանով քննարկում է՝ հիմնված Աստվածաշնչի շաբաթական ընթերցանության վրա։ Դրան հաջորդում է Աստվածաշնչի ընթերցանություն, որը տևում է չորս րոպե։

2. Հմտանանք քարոզչական ծառայության մեջ։ Սովորաբար այս բաժնում երեք քարոզիչ ցուցադրում է, թե ինչպես է հարկավոր մատուցումներ անել, վերայցելություններ կատարել և Աստվածաշնչի ուսումնասիրություն անցկացնել։

3. Ապրենք որպես քրիստոնյա։ Այս բաժինը ցույց է տալիս, թե ինչպես կարող ենք աստվածաշնչյան սկզբունքները կիրառել մեր ամենօրյա կյանքում։ Բաժնի կարևոր առանձնահատկություններից մեկն այն է, որ Ժողովի՝ Աստվածաշնչի ուսումնասիրություն մասում հարց ու պատասխանով քննարկում է լինում։

Ամբողջ աշխարհում քարոզիչները իրենց գնահատանքն են արտահայտում այն գործնական կրթության համար, որ ստանում են այս նոր հանդիպման ժամանակ։ Ավստրալիայում ապրող մի եղբայր գրեց. «Այնքա՜ն եմ սիրում Մեր կյանքը և ծառայությունը հանդիպումը։ Ներկայացվող նյութը գործնական է մեզ համար, իսկ մատուցումները՝ պարզ։ Չենք էլ զգում, թե ինչպես է հանդիպումն ավարտվում, քանի որ բաժիններն ավելի կարճ են, գործնական, նաև շատ գրավիչ, հատկապես այն պատճառով, որ կան տեսանյութեր, և երեխաները նույնպես ներգրավված են»։

Իտալիայում երեցների մի խորհուրդ գրեց. «Մենք նկատել ենք, որ այս նոր հանդիպումը բոլորիս մղում է ավելի լավ պատրաստվելու, և արդյունքում բարելավվում է մեր ուսուցանելու որակը։ Միջշաբաթյա նոր հանդիպման միջոցով Եհովան նորովի է կրթում իր ժողովրդին։ 15-ամյա մի քարոզիչ ասաց. «Նախկինում դժվար էր կենտրոնացած մնալ ողջ հանդիպման ընթացքում։ Բայց այս նոր հանդիպումն ինձ օգնում է կենտրոնանալու և տանը ավելի լավ պատրաստվելու»»։

Ավստրիայում բնակվող մի ընտանիք գրեց. «Մեր տասնամյա աղջկա հետ դժվար էր Աստվածաշնչի շաբաթական ընթերցանությունն անելը։ Սակայն Գանձեր Աստծու Խոսքից բաժինը մեզ մղեց ավելի ազատ արտահայտվելու։ Այժմ երեքս էլ հաճույքով ենք պատրաստվում Աստվածաշնչի շաբաթական ընթերցանությանը։ Ավելին, նկատել ենք, որ մեր աղջիկը հոգևորապես առաջադիմում է»։

Ինեսը, որն ապրում է Գերմանիայում, ասում է. «Ես մղվում եմ ավելի լավ պատրաստվելու հանդիպմանը և խորությամբ մտածելու նյութերի շուրջ։ Երբեք այսքան շատ փնտրտուք չեմ արել։ Հիմա Եհովայի հետ ավելի լավ փոխհարաբերություններ ունեմ։ Սատանայի աշխարհը հոգնեցնում և ուժասպառ է անում։ Սակայն հանդիպումները կազդուրում և օգնում են ինձ շարունակելու իմ ընթացքը»։

Սողոմոնի կղզիների ժողովների անդամներին անչափ դուր է գալիս միջշաբաթյա նոր հանդիպումը, և նրանք մեծ ջանքեր են թափում, որ լիովին օգուտ քաղեն դրանից։ Շատ ժողովներ գտնվում են հեռավոր վայրերում, որտեղ չկա էլեկտրականություն, ինտերնետ կապ, և եղբայրները շատ պարզ կյանքով են ապրում։ Ինչպե՞ս են նրանք սարքավորումներ ձեռք բերել և դիտում ամեն ամսվա տեսանյութերը։ Մալաիտա կղզում գտնվող ժողովի քարոզիչները որոշեցին միասին կոկոսի չիր վաճառել, որից ստացած գումարով գնեցին արևային էներգիայով լիցքավորվող մի պարզ սարք։ Իսկ ամեն ամսվա տեսանյութերը բեռնելու համար եղբայրները գնում են մոտակա այն վայրը, որտեղ կա ինտերնետ, որպեսզի բեռնեն ֆայլերը։ Այնուհետև դրանք փոխանցում են ժողովի մյուս եղբայրներին։

«Ես դիտելով ավելի լավ եմ սովորում,— գրեց Միացյալ Նահանգներում ապրող մի եղբայր։— 40 տարուց ավելի է՝ դրա հետ կապված դժվարություններ ունեմ։ Ինչ-որ մեկին որևէ բան բացատրելու համար տվյալ նյութը պետք է մի քանի անգամ կարդամ։ Ուստի ցանկանում եմ շնորհակալություն հայտնել Կառավարիչ մարմնին մեր ստացած բոլոր զննական միջոցների համար։ Աստվածաշնչյան գրքերի ներածությունների տեսանյութերը ուղղակի հրաշք են, իսկ հանդիպման ձեռնարկի նկարները հենց այն են, ինչի կարիքը ես ունեմ։ Ակնհայտ է, որ Եհովան օրհնում է իր ժողովրդի համար ձեր ներդրած ջանքերը։ Անչափ շնորհակալություն ձեզ»։