Հինգ միջոց՝ Աստվածաշնչի ուսումնասիրություն ունենալու համար
1. Եթե դժվարանում ենք ուսուցում գտնել, ի՞նչ պետք է անենք և ինչո՞ւ։
1 Դժվարանո՞ւմ ես Աստվածաշնչի ուսուցում գտնել։ Մի՛ հուսահատվիր։ Եհովան օրհնում է նրանց, ովքեր «չեն հոգնում» իր կամքն անելուց (Գաղ. 6։9)։ Ստորև առաջարկում ենք հինգ միջոց՝ Աստվածաշնչի ուսումնասիրություն ունենալու համար։
2. Ո՞րն է ուսուցում առաջարկելու միջոցներից մեկը։
2 Միանգամից առաջարկիր։ Շատերը գիտեն, որ մենք առաջարկում ենք «Դիտարան» և «Արթնացե՛ք» ամսագրերը, բայց նրանք գուցե չգիտեն, որ նաև Աստվածաշնչի ուսումնասիրություն ենք առաջարկում։ Կարող ես տնետան ժամանակ միանգամից առաջարկել ուսումնասիրություն։ Կարող ես առաջարկել նաև «վերայցելություններին», թե կցանկանային Աստվածաշունչ ուսումնասիրել։ Եթե հրաժարվեն, պարզապես շարունակիր գրականություն տալ և զարգացնել հետաքրքրությունը։ Մի եղբայր տարիներ շարունակ կանոնավորաբար ամսագրեր էր տալիս մի ամուսնական զույգի։ Իսկ մի անգամ էլ, երբ ամսագրերը տալուց հետո պատրաստվում էր հեռանալ, մի պահ կանգ առավ ու ասաց. «Չէի՞ք ցանկանա Աստվածաշունչ ուսումնասիրել»։ Ի զարմանս նրա՝ ամուսինները համաձայնվեցին։ Հիմա նրանք մկրտված են։
3. Պե՞տք է արդյոք ենթադրենք, որ հանդիպումներին հաճախող հետաքրքրվողները ինչ-որ մեկի հետ արդեն ուսումնասիրում են։ Բացատրիր։
3 Առաջարկիր հանդիպումներին հաճախող հետաքրքրվողներին։ Մի՛ ենթադրիր, որ հանդիպումներին եկող հետաքրքրվողներն արդեն ուսումնասիրում են։ Մի եղբայր ասում է. «Իմ անցկացրած ուսուցումների կեսից ավելին սկսել եմ նրանց հետ, ովքեր գալիս էին հանդիպումներին»։ Մի քույր որոշեց Աստվածաշնչի ուսումնասիրություն առաջարկել մի ամաչկոտ կնոջ, որի երկու դուստրերը մկրտված էին և ծառայում էին նույն ժողովում։ Այդ կինը շուրջ 15 տարի էր արդեն, ինչ հաճախում էր հանդիպումներին։ Նա միշտ Թագավորության սրահ էր գալիս հենց այն պահին, երբ հանդիպումը սկսվում էր, իսկ ավարտվելուն պես արագ հեռանում էր։ Կինը համաձայնվեց ուսումնասիրել և, ի վերջո, ճշմարտությունը ընդունեց։ Քույրը գրում է. «Այնքան եմ ափսոսում, որ միայն 15 տարի անց առաջարկեցի այդ կնոջը ուսումնասիրել»։
4. Ինչպե՞ս կարող ենք ուսուցում գտնել։
4 Ուրիշներին տեղյակ պահիր։ Մի քույր ջանում է մյուս քարոզիչների հետ գնալ նրանց ուսումնասիրություններին։ Ուսումնասիրությունը անցկացնողի թույլտվությամբ՝ նա ուսումնասիրողին հարցնում է, թե գիտի ինչ-որ մեկին, ով կցանկանար ուսումնասիրել։ Երբ «Աստվածաշունչը սովորեցնում է» գիրքը առաջարկում ես ինչ-որ մեկին, նրան կարող ես հարցնել. «Գիտե՞ք ուրիշ ինչ-որ մեկին, ով նույնպես կցանկանար այս գրքից»։ Երբեմն հանգամանքները թույլ չեն տալիս քարոզիչներին և ռահվիրաներին ուսումնասիրություն անցկացնել նրանց հետ, ում հանդիպում են տարածքում։ Ուստի ուրիշներին տեղյակ պահիր, որ դու կարող ես ուսուցում անցկացնել։
5. Ինչո՞ւ կարող ենք մեր հավատակիցների ոչ Վկա կողակիցներին ուսումնասիրություն առաջարկել։
5 Առաջարկիր ոչ Վկա կողակիցներին։ Ձեր ժողովում կա՞ն այնպիսի քարոզիչներ, որոնք ունեն ոչ Վկա կողակից։ Ոչ Վկա կողակիցներից ոմանք խուսափում են Աստվածաշնչի մասին խոսել իրենց քրիստոնյա կողակցի հետ, բայց դեմ չեն ուսումնասիրել ընտանիքի անդամ չեղող քարոզչի հետ։ Լավ կլինի նախապես խորհրդակցել քրիստոնյա կողակցի հետ՝ որոշելու համար, թե որը կլինի լավագույն մոտեցումը։
6. Ի՞նչ դեր ունի աղոթքը ուսուցում ունենալու հարցում։
6 Աղոթիր։ Շատ կարևոր է նաև աղոթել (Հակ. 5։16)։ Եհովան խոստանում է լսել մեր բոլոր այն աղոթքները, որոնք իր կամքի համաձայն են (1 Հովհ. 5։14)։ Մի եղբայր, որը շատ հագեցած գրաֆիկ ուներ, սկսեց աղոթել ուսուցում ունենալու մասին։ Նրա կինը անհանգստացած էր, թե արդյոք ամուսինը ժամանակ կունենար ուսումնասիրողի համար, հատկապես եթե վերջինս շատ խնդիրներ ունենար։ Ուստի երբ աղոթում էր, որ ամուսինը ուսումնասիրություն ունենա, աղոթում էր նաև իր այս անհանգստության մասին։ Եհովան պատասխանեց նրանց աղոթքներին. երկու շաբաթ անց իրենց ժողովից մի ռահվիրա քույր այդ եղբորը ուսուցում փոխանցեց։ Կինը գրում է. «Նրանք, ովքեր մտածում են, որ իրենց կարող է հանդիպել խնդիրներ ունեցող մարդ, և դրա պատճառով վախենում են ուսուցում ունենալ, ես ասում եմ. «Աղոթեք կոնկրետ և անդադար։ Մեր ուրախությունը շատ ավելի մեծ է, քան կարող էինք պատկերացնել»»։ Դրսևորելով հաստատակամություն՝ դու նույնպես կարող ես ուսուցում սկսել և զգալ այն ուրախությունը, որ լինում է, երբ ինչ-որ մեկին օգնում ես գնալ դեպի «կյանք տանող ճանապարհով» (Մատթ. 7։13, 14)։