Զրույց սկսելու համար օգտվիր «Ի՞նչ կարող ենք իմանալ Աստծու Խոսքից» գրքույկից

1. Ի՞նչ գրքույկ ենք ստացել, որը կարող ենք օգտագործել ծառայության մեջ։

¹ Ինչպե՞ս կարող ենք օգտագործել «Ի՞նչ կարող ենք իմանալ Աստծու Խոսքից» նոր գրքույկը, երբ մատուցումներ ենք պատրաստում։ Այս գրքույկում (ինչպես որ «Տրամաբանել» գրքում) աստվածաշնչյան տարբեր թեմաների վերաբերյալ նշված են սուրբգրային համարներ։ Ուստի գրքույկը կարող է օգտակար լինել զրույց սկսելու համար։

2. Ինչպե՞ս կարող ես օգտագործել «Ի՞նչ կարող ենք իմանալ Աստծու Խոսքից» գրքույկը։

² Օրինակ՝ կարող ես ընտրել 8-րդ հարցն ու ասել. «Մենք այցելում ենք հարևանությամբ ապրող մարդկանց, քանի որ շատերին է հետաքրքրում այս հարցը. «Մի՞թե Աստված է պատասխանատու տառապանքի համար»։ [Որոշ տարածքներում ավելի արդյունավետ է բնակչին ցույց տալ հարցը։] Իսկ դո՞ւք ինչ եք կարծում։ [Թույլ տուր պատասխանել։] Աստվածաշունչը գոհացուցիչ պատասխան է տալիս այս հարցին»։ Գրքույկում նշված մեկ կամ մի քանի համարներ կարդա Աստվածաշնչից ու քննարկիր։ Եթե տանտերը դրական է արձագանքում, ցույց տուր առաջին էջում գրված 20 հարցերը և հարցրու, թե դրանցից որ մեկը կցանկանար քննարկել հաջորդ անգամ։ Կամ կարող ես առաջարկել մեր ուսումնասիրության ձեռնարկներից որևէ մեկը, որում ավելի շատ տեղեկություն է տրվում այն հարցի վերաբերյալ, որը քիչ առաջ քննարկեցիր։

3. Ինչպե՞ս կարող ենք օգտագործել «Ի՞նչ կարող ենք իմանալ Աստծու Խոսքից» գրքույկը, երբ խոսում ենք Աստծու գոյությանը չհավատացող անհատի հետ։

³ Աստծու գոյությանը չհավատացող անհատի համար կարող են հատկապես օգտակար լինել 4-րդ, 13-ից մինչև 17-րդ հարցերը։ Օրինակ՝ օգտվելով 17-րդ հարցից կարող ես ասել. «Մենք այցելում ենք ընտանիքներին և ուզում ենք իմանալ Ձեր կարծիքը. համաձայն չե՞ք, որ ընտանիքներն այսօր բազմաթիվ դժվարությունների են բախվում։ [Թույլ տուր պատասխանել։] Այս իմաստուն խոսքերը օգնել են շատ ամուսնական զույգերի. «Կինը պետք է խոր հարգանք տածի իր ամուսնու հանդեպ»։ [Կարիք չկա նշելու, որ այս խոսքերը գրված են Եփեսացիներ 5։33-ում։ Եթե խոսում ես կնոջ հետ, ապա կարող ես մեջբերել Եփեսացիներ 5։28-ը։] Ձեր կարծիքով՝ այս խորհուրդը կիրառելի՞ է ամուսնության մեջ»։

4. Զրույցն ավարտելիս ի՞նչ կարող ես անել։

⁴ Զրույցն ավարտելիս հիմք նախապատրաստիր, որ հաջորդ անգամ շարունակեք քննարկումը։ Գուցե որոշես խոսել քննարկած հարցին առնչվող մեկ այլ սուրբգրային համարի մասին։ Հարմար պահին կարող ես ասել, որ այդ իմաստուն խորհուրդները Աստվածաշնչից են։ Ելնելով ձեր նախորդ զրույցներից և Աստվածաշնչի հանդեպ նրա վերաբերմունքից՝ առաջարկիր համապատասխան գրականություն (տե՛ս «Մեր թագավորական ծառայությունը» թերթիկի 2013թ. դեկտեմբերի համարի ներդիրը)։