Երիտասարդները հարցնում են...

Ինչպե՞ս կարող եմ հրաժարվել սեքսից դպրոցում

«Երեխաները դպրոցում ամեն օր սեքսի մասին են խոսում։ Աղջիկները նույնիսկ պոկ չեն գալիս տղաներից և սեքսով են զբաղվում հենց դպրոցում» — Այլին, 16 տարեկան։

«Մեր դպրոցում համասեռամոլները անբարո բաներ են անում բոլորի ներկայությամբ և դրա մեջ վատ բան չեն տեսնում»​— Մայքլ, 15 տարեկան։a

ՔՈ ԴԱՍԸՆԿԵՐՆԵՐԸ շարունակ սեքսի մասի՞ն են խոսում։ Արդյո՞ք նրանցից ոմանք նաև զբաղվում են սեքսով։ Եթե այո, ապա գուցե դու զգում ես այն, ինչ զգում էր մի դեռահաս աղջիկ, որը դպրոցում լինելը համեմատեց «նկարահանման վայրում պոռնկագրական ֆիլմ նկարահանելու հետ»։ Փաստն այն է, որ դպրոցում շատ երիտասարդներ անընդհատ ռմբակոծվում են նման խոսակցություններով կամ սեքսով զբաղվելու առաջարկներով։

Հավանաբար լսել ես քո դասընկերներից «կապենք» արտահայտությունը, որը նշանակում է սեքսով զբաղվել առանց որևէ էմոցիոնալ կապվածության։ Որոշ դեպքերում երեխաները սեքսով են զբաղվում գրեթե անծանոթների հետ։ Այլ դեպքերում նրանք սեքսով զբաղվելու նպատակով հանդիպում են բացարձակապես անծանոթ մարդկանց, որոնց հետ ծանոթացել են Ինտերնետով։ Երկու դեպքում էլ նպատակը առանց սիրո սեքսով զբաղվելն է։ «Դա ոչ այլ ինչ է, քան տրվել սեռային ցանկություններին»,— ասում է 19–​ամյա Դանիելան։

Զարմանալի չէ, որ շատ դպրոցներում պատահական սեքսով զբաղվելը դարձել է խոսակցությունների հիմնական թեման։ «Ամեն անգամ հանգստյան օրերից հետո աշակերտները միջանցքներում ոգևորված խոսում են իրենց վերջին սեռական կապերի մասին և ամենայն մանրամասնությամբ միմյանց պատմում տեղի ունեցածը»,— գրել էր 17–​ամյա մի աղջիկ իրենց դպրոցի թերթում։

Եթե դու ձգտում ես ապրել Աստվածաշնչի չափանիշներով, ապա միայն սեքսի մասին զրուցող մարդկանցով շրջապատված լինելը կարող է քո մեջ այնպիսի զգացում առաջացնել, կարծես թե դու մենակ ես։ Եվ եթե չես միանում նրանց, գուցե դառնաս նրանց ծաղրի առարկան։ Նման բան հնարավոր է ակնկալել, քանի որ Աստվածաշունչն ասում է, որ երբ մարդիկ չեն հասկանում, թե ինչու ես նման ընթացք բռնել, նրանք վիրավորական խոսքեր են ասում (Ա Պետրոս 4։3, 4)։ Իհարկե, ոչ ոք չի ցանկանում ծաղրի արժանանալ։ Ուստի ինչպե՞ս կարող ես հրաժարվել սեքսից դպրոցում և արժանապատիվ կեցվածք պահպանել։ Նախ հարկավոր է հասկանալ, թե ինչու է սեքսով զբաղվելու գայթակղությունը այդքան մեծ։

Ճանաչիր ինքդ քեզ

Պատանեկան հասակում քեզ հետ փոփոխություններ են տեղի ունենում թե՛ ֆիզիկական և թե՛ էմոցիոնալ առումով։ Այդ անցումային շրջանում քեզ մոտ ուժգին սեռական ցանկություն է առաջանում։ Սակայն մի մտահոգվիր, դա նորմալ է։ Ուստի եթե հակառակ սեռի ներկայացուցիչները մեծապես գրավում են քեզ, մի եզրակացրու, թե դու վատն ես կամ չես կարող բարոյապես մաքուր մնալ։ Եթե ցանկանաս, դու կարող ես մաքուր մնալ։

Բացի ներքին պայքարից, որը հասունացման շրջանում անխուսափելի է, կա ևս մի բան, որի մասին դու պետք է տեղյակ լինես։ Լինելով անկատար՝ բոլոր մարդիկ հակում ունեն վատ բաներ անելու։ Նույնիսկ Պողոս առաքյալը ընդունեց դա՝ ասելով. «Տեսնում եմ ուրիշ օրէնք իմ անդամներումը՝ որ իմ մտքի օրէնքի դէմ պատերազմում է, եւ ինձ գերի է բռնում այն մեղքի օրէնքովը՝ որ իմ անդամներումն է»։ Պողոսն ասաց, որ իր անկատարության պատճառով նա իրեն «խեղճ» էր համարում (Հռովմայեցիս 7։23, 24)։ Սակայն նա այդ պայքարում հաղթանակ տարավ։ Դու նույնպես կարող ես հաղթել։

Հասկացիր քո դասընկերներին

Ինչպես նշվեց, քո դասընկերները գուցե անդադար զրուցեն սեքսի մասին կամ պարծենան իրենց սիրային հանդիպումներով։ Դու պետք է զգույշ լինես, քանի որ նրանք կարող են վատ ազդեցություն թողնել քեզ վրա (Ա Կորնթացիս 15։33)։ Սակայն պետք չէ նրանց համարել թշնամիներ։ Ինչո՞ւ։

Քո դասընկերները ունեն այն նույն ցանկությունները, որ դու ունես։ Նրանք նույնպես հակում ունեն վատ բաներ անելու։ Սակայն ի տարբերություն քեզ՝ նրանցից ոմանք գուցե «աւելի ցանկասէր [են] քան թէ աստուածասէր»։ Կամ գուցե նրանք այնպիսի ընտանիքներում են մեծանում, որտեղ ընտանիքի անդամների միջև չկա բնական կապվածություն (Բ Տիմոթէոս 3։1, 2, 3 ՆԱ,4)։ Քո դասընկերներից ոմանք ծնողների կողմից գուցե չեն ստանում դաստիարակություն և բարոյական կրթություն (Եփեսացիս 6։4)։

Առանց այն գերբնական իմաստության աղբյուրի, որ դու ունես ձեռքիդ տակ, այսինքն՝ Աստծու Խոսքի՝ Աստվածաշնչի, քո դասընկերները չեն կարող տեղյակ լինել, թե ինչ վնասներ կարող են ստանալ ազատորեն այդ ցանկություններին տրվելուց (Հռովմայեցիս 1։26, 27)։ Պատկերացրու, որ ծնողները հզոր ավտոմեքենա են նվիրել երեխային և ուղարկել մայրուղի, սակայն ավտոմեքենա վարել չեն սովորեցրել։ Ավտոմեքենա վարելը գուցե ակնթարթային հաճույք պատճառի, սակայն մեծ աղետի կհանգեցնի։ Ուստի ի՞նչ կարող ես անել, եթե քո ներկայությամբ դասընկերներդ սկսեն խոսել սեքսի մասին կամ փորձեն ստիպել քեզ, որ իրենց նման անբարոյություն գործես։

Մերժիր անբարո զրույցները

Եթե դասընկերներդ սկսում են խոսել սեքսի մասին, գուցե գայթակղություն առաջանա լսել և նույնիսկ մասնակցել նրանց զրույցին, որպեսզի չտարբերվես ուրիշներից։ Սակայն մտածիր, թե դրանով դու ինչ տպավորություն կթողնես նրանց վրա։ Արդյո՞ք քո հետաքրքրվածությունը ցույց կտա, թե իրականում ով ես դու և ինչպիսին ես ուզում լինել։

Հետևաբար ի՞նչ պետք է անես, երբ նկատես, որ մասնակցում ես մի զրույցի, որը շուտով վերածվելու է անբարո խոսակցության։ Արդյո՞ք պետք է վեր կենաս ու գնաս։ Իհարկե՛ (Եփեսացիս 5։3, 4)։ Աստվածաշունչն ասում է. «Խորագէտը տեսնում է չարիքը եւ իրան պահում» (Առակաց 22։3)։ Ուստի այդ զրույցին չմասնակցելը անքաղաքավարություն չի լինի քո կողմից, ընդհակառակը՝ եթե այդպես վարվես, դու կլինես խորագետ։

Իրականում դու չպետք է անհարմար զգաս, երբ մերժում ես այդ զրույցները։ Փաստն այն է, որ կան ուրիշ խոսակցություններ, որոնցից դու կհեռանայիր առանց ամաչելու, հատկապես եթե քեզ չհետաքրքրեր քննարկվող նյութը կամ չցանկանայիր մասնակցել այդ զրույցին։ Օրինակ՝ ենթադրենք քո դասընկերներից ոմանք սկսում են խոսել զինված կողոպուտ կատարելու մասին։ Կմնայի՞ր այդտեղ ու լսեիր, թե ինչպես են նրանք ծրագրում դա անել։ Եթե այո, ապա նրանք քեզ կհամարեին իրենց գործակիցը։ Ուստի քո կողմից խելամիտ կլիներ հեռանալ։ Վարվիր նույն կերպ, երբ խոսակցությունը վերածվում է անբարո թեմայով զրույցի։ Հաճախ դու կարող ես հեռանալ այնպես, որ չափից արդար լինելու տպավորություն չթողնես և ծաղրի չարժանանաս։

Իհարկե, միշտ չէ, որ հնարավոր է ազատվել այդպիսի իրավիճակից։ Օրինակ՝ այն աշակերտը, որը դասարանում քո կողքին է նստում, գուցե փորձի քեզ հետ զրուցել սեքսի մասին։ Այդ դեպքում դու կարող ես հաստատակամորեն, բայց քաղաքավարի կերպով ասել նրան, որ չշեղի քեզ դասից։ Եթե դրանով հարցը չլուծվի, դու կարող ես վարվել այնպես, ինչպես Բրենդան։ Նա ասում է. «Ես խնդրեցի, որ ուսուցիչն ինձ ուրիշ տեղ նստեցնի»։

Եղիր խոհեմ

Վաղ թե ուշ քո դասընկերներից ոմանք կսկսեն հետաքրքրվել, թե ինչու չես մասնակցում իրենց անմաքուր զրույցներին։ Եթե նրանք հարցնում են քո սկզբունքների մասին, մտածիր, թե ինչպես ես պատասխանելու։ Հնարավոր է՝ ոմանք հարցեր տան ավելի շատ ծաղրելու, քան քո տեսակետը հասկանալու համար։ Բայց եթե դու կարծում ես, որ անհատը քեզ անկեղծորեն է հարցեր տալիս, ապա վստահությամբ խոսիր քո համոզմունքների մասին։ Շատ պատանիներ օգտվում են «Երիտասարդների հարցերը. գործնական խորհուրդներ» գրքից, որպեսզի օգնեն իրենց դասընկերներին հասկանալ աստվածաշնչյան չափանիշներով ապրելու օգուտները։b

Եղիր վճռական

Ի՞նչ պետք է անես, եթե դասընկերներիցդ մեկը այնքան անպատկառ է, որ փորձում է շոյել կամ համբուրել քեզ։ Եթե դու թույլ տաս անհատին դա անել, ապա դրանով կխրախուսես նրան, որ շարունակի այդպես վարվել։ Աստվածաշունչը նկարագրում է մի երիտասարդի, որը թույլ տվեց մի անբարո կնոջ բռնել իրեն ու համբուրել։ Նա թույլ տվեց, որ այդ կինը սեքսի մասին ակնարկներ անի։ Ի՞նչ եղավ հետևանքը։ «Նա էլ իսկոյն գնաց նորա ետեւիցը, ինչպէս որ արջառը կ’գնայ սպանդանոցը» (Առակաց 7։13–23)։

Ի տարբերություն նրա՝ քննարկենք, թե ինչպես վարվեց Հովսեփը նույն իրավիճակում։ Նրա տիրոջ կինը համառորեն փորձում էր հրապուրել նրան, սակայն Հովսեփը հաստատակամորեն մերժեց նրա առաջարկները։ Ի վերջո, երբ նա փորձեց բռնի ձևով տիրանալ Հովսեփին, վերջինս վճռականորեն փախավ (Ծննդոց 39։7–12)։

Հովսեփի նման գուցե հարկ լինի, որ դու էլ վճռական քայլեր ձեռնարկես, եթե դասընկերդ կամ ծանոթներիցդ որևէ մեկը փորձի անբարո ձևով շոյել քեզ։ «Եթե որևէ տղա փորձում է դիպչել ինձ, ես ասում եմ՝ չկպնես ինձ,— ասում է Այլինը։ Եթե նա չի հասկանում, ես բղավում եմ նրա վրա՝ ասելով՝ ձեռքերդ քեզ պահիր»։ Իրենց դպրոցի երիտասարդներին նկատի ունենալով՝ Այլինն ավելացնում է. «Նրանք չեն հարգի քեզ, մինչև որ դու չստիպես նրանց այդպես վարվել»։

Դու նույնպես կարժանանաս քո դասընկերների հարգանքին, եթե մերժես լսել նրանց անբարո խոսակցությունները, հարմար պահին հարգալից ձևով բացատրես քո բարոյական սկզբունքները և հաստատակամորեն մերժես անբարո առաջարկները։ Եթե այդպես վարվես, դու նաև լավ կզգաս քեզ։ Եվ որ ամենակարևորն է, կարժանանաս Եհովայի հավանությանը (Առակաց 27։11)։

[Ծանոթագրություններ]

ՄՏԱԾԻՐ

◼ Ի՞նչ կարող ես ասել անբարո խոսակցությունից խուսափելու համար։

◼ Ի՞նչ կասես կամ կանես, եթե դասընկերներիցդ մեկը անբարո առաջարկություն անի։

[Նկար 27–րդ էջի վրա]

Եթե սկսում են խոսել սեքսի մասին, պարզապես հեռացիր

[Նկար 28–րդ էջի վրա]

Հաստատակամորեն մերժիր անբարո առաջարկները