Նահանգային «արտասովոր» համաժողով մը գովասանքի կ’արժանանայ
ԼԻՄԱՅԻ մէջ, Բերու, ձայնասփիւռի խօսնակ մը Եհովայի Վկաներուն մասին լուրջ վերապահումներ ունէր։ Անոնց նահանգային համաժողովներէն մէկուն ներկայ գտնուելէ ետք, անոր վերաբերմունքը բոլորովին փոխուեցաւ։ Իրականութեան մէջ, ան իր տեսածէն ա՛յնքան տպաւորուած էր որ ձայնասփիւռի իր ունկնդիրներուն կարգ մը նպաստաւոր բաներ յիշեց։ Հետեւեալը անոր խօսքերէն մէջբերումներ են.
«Մէկ խօսքով՝ համաժողովը արտասովոր էր։ Գետնին վրայ թուղթի կտոր չկար, ոչ ալ՝ վաճառորդ մը։ Երթեւեկի խճողում չկար։ Հինգ հազար երկու հարիւր հոգի իրենց հաշւոյն դաշտ գացին, իւրաքանչիւրը իր հետ կը կրէր դոյլ, փոշելաթ, փոշեհան, աւել, վրձին, ձեռնոցներ, նաեւ վայրը լուալու եւ խոզանակելու համար մաքրադեղեր։ Ուր ներկուելու կարիքը կար, հոն ներկեցին։ Իսկ դրամը ո՞ւրկէ եկաւ։ Իրե՛նց իսկ նուիրատուութիւններէն։ Երբ տեղեկանան թէ որոշ կարիք մը կայ, անմիջապէս բոլորն ալ ձեռքերնին իրենց գրպանները կ’երկնցնեն ու կու տան։ Հաւատացէք որ Կաթողիկէ Եկեղեցին այսպիսի բաներու մէջ կը նիրհէ։ Կը փափաքիմ շնորհաւորել Եհովայի Վկաները եւ այս համաժողովի կազմակերպիչները։ Իսկ անոնց սրտանց կ’ուզեմ ըսել՝ Աստուած ձեզի օգնական ըլլայ ու օրհնէ ձեզ»։
Այս տարի աշխարհի զանազան քաղաքներուն մէջ, Եհովայի Վկաները պիտի ունենան «Աստուծոյ Ընդունելի Ապրելակերպը» խորագրով Նահանգային Համաժողովը։ Ներկայ պիտի ըլլա՞ք։
[Մէջբերում՝ էջ 32]
«Գետնին վրայ թուղթի կտոր չկար»