Ձեր աղօթքները ‘խունկի պէս պատրաստուա՞ծ’ են
«Թո՛ղ իմ աղօթքս խունկի պէս [«պատրաստուած», ՆԱ] սեպուի քու առջեւդ»։—ՍԱՂՄՈՍ 141։2
1, 2. Խունկ ծխելը ի՞նչ կը խորհրդանշէր։
ԵՀՈՎԱ Աստուած պատուէր տուաւ Մովսէսի որ Իսրայէլի պաշտամունքի տաղաւարին մէջ գործածուելու համար սուրբ խունկ պատրաստուի։ Աստուծոյ կողմէ տրուած պատրաստութեան ձեւը չորս համեմներու խառնուրդ կը պահանջէր։ (Ելից 30։34-38) Արդարեւ անիկա անոյշ կը բուրէր։
2 Օրէնքի ուխտը, որու մէջ բերուած էր Իսրայէլ ազգը, իր ծրագրին մէջ ունէր որ օրական խունկ ծխուէր։ (Ելից 30։7, 8) Խունկի գործածութիւնը մասնաւոր նշանակութիւն մը ունէ՞ր։ Այո՛, քանի որ սաղմոսերգուն գրեց. «Թո՛ղ իմ աղօթքս խունկի պէս [«պատրաստուած», ՆԱ] սեպուի քու առջեւդ եւ իմ ձեռքերուս վեր վերցուիլը՝ իրիկուան պատարագին պէս»։ (Սաղմոս 141։2) Յայտնութիւն գրքին մէջ, Յովհաննէս առաքեալ կը նկարագրէ որ Աստուծոյ աթոռին շուրջը գտնուողները ոսկիէ խնկամաններ ունէին՝ խունկով լեցուն։ Ներշնչեալ տեղեկութիւնը կ’ըսէ թէ խունկը՝ «սուրբերուն աղօթքներն են»։ (Յայտնութիւն 5։8) Ուստի, անուշահոտ խունկին ծխուիլը Եհովայի ծառաներուն կողմէ ցերեկ ու գիշեր մատուցուած ընդունելի աղօթքները կը խորհրդանշէր։—Ա. Թեսաղոնիկեցիս 3։10. Եբրայեցիս 5։7
3. Ի՞նչ բան պէտք է մեզի օգնէ որ ‘մեր աղօթքները խունկի պէս պատրաստենք Աստուծոյ առջեւ’։
3 Մեր աղօթքները Աստուծոյ ընդունելի ըլլալու համար, պէտք է իրեն աղօթենք Յիսուս Քրիստոսի անունով։ (Յովհաննու 16։23, 24) Բայց մեր աղօթքներուն որակը ի՞նչպէս կրնանք բարելաւել։ Սուրբ գրային կարգ մը օրինակներ նկատի առնելը մեզի պիտի օգնէ որ մեր աղօթքները Եհովայի մատուցանուած խունկի պէս պատրաստենք։—Առակաց 15։8
Հաւատքով Մատուցուած Աղօթքներ
4. Հաւատքը ի՞նչ առնչութիւն ունի ընդունելի աղօթքի հետ։
4 Մեր աղօթքները անուշահոտ խունկի նման Աստուծոյ բարձրանալու համար, հաւատքով պէտք է աղօթենք։ (Եբրայեցիս 11։6) Երբ Քրիստոնեայ երէցներ հոգեւորապէս հիւանդ անհատ մը գտնեն, որ կ’ընդառաջէ իրենց մատակարարած օգնութեան, «հաւատքով եղած [իրենց] աղօթքը պիտի փրկէ հիւանդը»։ (Յակոբու 5։15) Հաւատքով մատուցուած աղօթքները եւ Աստուծոյ Խօսքին ջերմեռանդ ուսումնասիրութիւնը հաճելի են մեր երկնաւոր Հօր։ Սաղմոսերգուն լաւ կեցուածք մը ցոյց տուաւ, երբ երգեց. «Ձեռքերս դէպի քու պատուիրանքներդ պիտի վերցնեմ՝ որոնք սիրեցի ու քու կանոններուդ վրայով պիտի մտածեմ։ Բարի իմաստութիւն ու գիտութիւն սորվեցուցիր ինծի, վասն զի քու պատուիրանքներուդ հաւատացի»։ (Սաղմոս 119։48, 66) Թող որ խոնարհ աղօթքներով ‘մեր ձեռքերը վերցնենք’ եւ հաւատք ի գործ դնենք, Աստուծոյ պատուիրաններուն ենթարկուելով։
5. Եթէ իմաստութեան պակաս ունինք, ի՞նչ պէտք է ընենք։
5 Ենթադրենք որ փորձութիւն մը եկաւ եւ մենք զայն ձեռք առնելու համար հարկ եղած իմաստութիւնը չունինք։ Թերեւս վստահ չենք որ Աստուածաշունչի որոշ մէկ մարգարէութիւն մը հիմա կատարուելու վրայ է։ Փոխանակ թոյլ տալու որ այսպիսի բաներ մեր հոգեւոր հաւասարակշռութիւնը խախտեն՝ Աստուծմէ իմաստութիւն խնդրենք։ (Գաղատացիս 5։7, 8. Յակոբու 1։5-8) Անշուշտ, չենք կրնար ակնկալել որ Աստուած ուշագրաւ կերպով մը պատասխանէ մեզի։ Պէտք է մեր աղօթքին անկեղծ ըլլալը ցոյց տանք, ընելով այն ինչ որ Ան կը պահանջէ իր ծառաներէն։ Անհրաժեշտ է որ «հաւատարիմ ու իմաստուն ծառայ»ին կողմէ հայթայթուած գրականութիւններուն օգնութեամբ Սուրբ Գրքի հաւատք կերտող ուսումնասիրութեան ձեռնարկենք։ (Մատթէոս 24։45-47. Յեսուայ 1։7, 8) Նաեւ, պէտք է գիտութեան մէջ յառաջանանք, կանոնաւորաբար մասնակցելով Աստուծոյ ժողովուրդին ժողովներուն։—Եբրայեցիս 10։24, 25
6. (ա) Բոլորս ալ մեր օրերուն եւ Աստուածաշունչի մարգարէութեանց կատարման մասին ի՞նչ բանի պէտք է գիտակցինք։ (բ) Եհովայի անուան սրբացման համար աղօթելէ զատ, ի՞նչ պէտք է ընենք։
6 Ներկայիս, կարգ մը Քրիստոնեաներ անձնական շահ եւ գործի ասպարէզներ կը հետապնդեն, այն տպաւորութիւնը տալով որ «վերջին ժամանակ»ին մէջ շատ յառաջացած ըլլալու գիտակցութիւնը կորսնցուցած են։ (Դանիէլ 12։4) Յարմար է որ հաւատակիցներ աղօթեն այսպիսիներու համար, որպէսզի անոնց հաւատքը վերարծարծուի այն իրողութեան ի տես, թէ Քրիստոսի ներկայութիւնը սկսաւ 1914–ին, երբ Եհովա գահակալեց զինք որպէս երկնային Թագաւոր եւ թէ, ան իր թշնամիներուն մէջտեղ կը տիրէ։ (Սաղմոս 110։1, 2. Մատթէոս 24։3) Բոլորս ալ պէտք է գիտակցինք որ կարգ մը դէպքեր, ինչպէս սուտ կրօնքի՝ «մեծ Բաբելոն»ի կործանումը, Եհովայի ժողովուրդին վրայ Մագոգի Գոգին սատանայական յարձակումը եւ Արմագեդոնի պատերազմէն Ամենակալ Աստուծոյ կողմէ փրկուիլը, կրնան ապշեցուցիչ արագութեամբ հարուածել, յարաբերաբար շատ կարճ ժամանակամիջոցի մը մէջ։ (Յայտնութիւն 16։14, 16. 18։1-5. Եզեկիէլ 38։18-23) Ուստի, հոգեւորապէս արթուն մնալու համար Աստուծմէ օգնութիւն խնդրենք։ Թող որ բոլորս ջերմեռանդօրէն աղօթենք Եհովայի անուան սրբացման, Թագաւորութեան գալուն եւ ինչպէս երկինքը, նոյնպէս երկրի վրայ իր կամքը կատարուելուն համար։ Այո, շարունակենք հաւատք ընծայել, եւ ապացուցանել որ մեր աղօթքները անկեղծ են։ (Մատթէոս 6։9, 10) Արդարեւ, անոնք որոնք Եհովան կը սիրեն, թող նախ փնտռեն Թագաւորութիւնը եւ անոր արդարութիւնը, եւ վախճանը գալէն առաջ, կարելի եղածին չափ շատ բաժին բերեն բարի լուրի քարոզչութեան մէջ։—Մատթէոս 6։33. 24։14
Եհովան Փառաբանել եւ Անոր Շնորհակալ Ըլլալ
7. Ա. Մնացորդաց 29։10-13–ի մէջ արձանագրուած Դաւիթի աղօթքին մէջ ի՞նչ բան կը տպաւորէ ձեզ։
7 ‘Որպէս խունկ մեր աղօթքները պատրաստելու’ կարեւոր կերպերէն մէկն է սրտագին փառաբանութիւն եւ երախտագիտութիւն յայտնել Աստուծոյ։ Դաւիթ Թագաւոր այսպիսի աղօթք մը մատուցանեց, երբ ինք եւ Իսրայէլ ժողովուրդը Եհովայի տաճարին շինարարութեան համար նուէրներ մատուցանեցին։ Դաւիթ աղօթեց. «Ո՛վ Տէր, մեր հօրը Իսրայէլին Աստուածը, յաւիտեանս յաւիտենից օրհնեալ ես։ Ո՛վ Տէր, մեծութիւնը, զօրութիւնը, փառքը, պայծառութիւնն ու վայելչութիւնը քուկդ են. քանզի բոլոր երկնքի ու երկրի վրայ եղածը քուկդ է։ Ո՛վ Տէր, թագաւորութիւնը քուկդ է ու դուն իբրեւ գլուխ ամենէն բարձրացեալն ես։ Եւ հարստութիւնն ու փառքը քեզմէ են ու ամենուն իշխանը դուն ես եւ զօրութիւնն ու կարողութիւնը քու ձեռքիդ մէջ են եւ մէկը մեծցնելն ու ուժովցնելը քու ձեռքդ է։ Եւ հիմա, ո՛վ մեր Աստուածը, քեզի գոհութիւն կու տանք ու քու փառաւորեալ անունդ կ’օրհնենք»։—Ա. Մնացորդաց 29։10-13
8. (ա) 148–էն 150–րդ Սաղմոսներուն ո՞ր խօսքերը մասնաւորաբար ձեր սրտին կը դպչին։ (բ) Եթէ Սաղմոս 27։4–ի զգացումները կը բաժնենք, ի՞նչ պիտի ընենք։
8 Փառաբանութեան ու երախտագիտութեան ի՛նչ գեղեցիկ արտայայտութիւններ։ Թերեւս մեր աղօթքները այսքան պերճախօս չըլլան, բայց կրնան նոյնքան սրտանց ըլլալ։ Սաղմոսաց գիրքը շնորհակալութեան ու փառաբանութեան աղօթքներով լեցուն է։ Գովաբանութեան ընտրուած բառեր կը գտնուին 148–էն 150–րդ Սաղմոսներուն մէջ։ Աստուծոյ մատուցուած երախտագիտական արտայայտութիւններ կը գտնուին շատ մը սաղմոսներու մէջ։ Դաւիթ երգեց. «Բան մը կը խնդրեմ Տէրոջմէն ու ասիկա կ’աղաչեմ, որ կեանքիս բոլոր օրերը Տէրոջը տանը մէջ բնակիմ՝ Տէրոջը վայելչութիւնը տեսնելու ու անոր տաճարին մէջ զինք խնդրելու համար»։ (Սաղմոս 27։4) Թող որ այսպիսի աղօթքներու համաձայն վարուինք, Եհովայի ժողովուրդին ժողովքներուն բոլոր գործունէութիւններուն եռանդով մասնակցելով։ (Սաղմոս 26։12) Այսպէս վարուիլը եւ ամէն օր Աստուծոյ Խօսքին վրայ խոկալը շատ մը պատճառներ պիտի տան մեզի որ Եհովայի մօտենանք սրտագին փառաբանութիւններով ու երախտագիտութեամբ։
Խոնարհութեամբ Եհովայէ Օգնութիւն Հայցեցէք
9. Ասա Թագաւորը ի՞նչպէս աղօթեց եւ ի՛նչ արդիւնքով։
9 Եթէ մենք որպէս իր Վկաները սրտանց կը ծառայենք Եհովայի, կրնանք վստահ ըլլալ որ ան օգնութիւն հայցող մեր աղօթքները պիտի լսէ։ (Եսայեայ 43։10-12) Յուդայի Ասա Թագաւորը նկատի առէք։ Անոր 41 տարուան իշխանութեան (Հ.Դ.Ա. 977-937) առաջին 10 տարիները խաղաղութեամբ դրոշմուած էին։ Ապա Եթովպիացի Զարան մէկ միլիոն բանակով Յուդայի վրայ յարձակեցաւ։ Թէեւ թիւով շատ աւելի նուազ էին, բայց Ասա եւ իր մարդիկը ներխուժողներուն դէմ գացին։ Բայց պատերազմէն առաջ, Ասա ջերմեռանդ աղօթք մը մատուցանեց։ Ան յայտնեց որ զիրենք ազատելու Եհովայի զօրութեան կը գիտակցէր։ Անկէ օգնութիւն պաղատելով, թագաւորը ըսաւ. «Քեզի ապաւինեցանք ու այս բազմութեան վրայ քու անունովդ եկանք։ Ո՛վ Տէր, մեր Աստուածը դուն ես. մի՛ թողուր, որ մարդը քեզի դէմ զօրանայ»։ Եհովա իր անուան սիրոյն Յուդան փրկելով, ամբողջական յաղթանակ տարաւ։ (Բ. Մնացորդաց 14։1-15) Աստուած՝ մեզ փորձութենէ ազատէ, թէ մեզ զօրացնէ որ անոր տոկանք, կասկած չունինք որ իրմէ օգնութիւն հայցող մեր աղաչանքները կը լսէ ան։
10. Երբ որոշ տագնապ մը ձեռք առնելու կերպը չենք գիտեր, Յովսափատ Թագաւորին աղօթքը ի՞նչպէս կրնայ օգտակար ըլլալ մեզի։
10 Եթէ դժուարութեան մը մէջ կը գտնուինք եւ չենք գիտեր ի՛նչպէս վարուիլ, կրնանք վստահ ըլլալ որ Եհովա օգնութեան համար իրեն մատուցած մեր խնդրանքը կը լսէ։ Ասիկա ցոյց տրուեցաւ Յուդայի Յովսափատ Թագաւորի պարագային, որու 25 տարուան իշխանութիւնը սկսաւ Հ.Դ.Ա. 936–ին։ Երբ Մովաբի, Ամմոնի, եւ Սէիր լերան բնակիչները միասնաբար սպառնացին Յուդայի, Յովսափատ պաղատեցաւ. «Ո՛վ մեր Աստուածը, անոնց դատաստան չե՞ս ըներ. քանզի մեր վրայ եկող այս մեծ բազմութեանը դէմ դնելու զօրութիւն չունինք ու չենք գիտեր ի՛նչ ընելու ենք. ուստի մեր աչքերը քեզի կ’ուղղենք»։ Եհովա պատասխանեց այդ խոնարհ աղօթքին, Յուդայի համար կռուելով եւ թշնամիին բանակին մէջ շփոթութիւն յառաջացնելով, այնպէս որ անոնք իրար սպաննեցին։ Որպէս հետեւանք, շրջակայ ազգերը շատ վախցան եւ Յուդայի մէջ խաղաղութիւն հաստատուեցաւ։ (Բ. Մնացորդաց 20։1-30) Երբ տագնապի մը դիմաց հարկ եղած իմաստութեան պակասը ունենանք, Յովսափատի նման կրնանք աղօթել. ‘Ո՛վ Եհովա, չենք գիտեր ի՛նչ պէտք է ընենք, բայց մեր աչքերը քեզի կ’ուղղենք’։ Սուրբ հոգին կրնայ խնդիրը լուծելու համար հարկ եղած սուրբ գրային կէտեր վերյիշեցնել, կամ Աստուած կրնայ օգնել մեզի մարդկային խելքէն վեր եղող կերպով մը։—Հռովմայեցիս 8։26, 27
11. Երուսաղէմի պարիսպներուն առնչութեամբ Նէեմիայի առած քայլերէն ի՞նչ կը սորվինք աղօթքի մասին։
11 Աստուծոյ օգնութիւնը ստանալու համար, թերեւս պէտք է աղօթքի մէջ յարատեւենք։ Նէեմիա Երուսաղէմի աւերուած պարիսպներուն եւ Յուդայի բնակիչներուն թշուառութեան համար օրերով ողբաց, լացաւ, ծոմ պահեց եւ աղօթեց։ (Նէեմեայ 1։1-11) Անոր աղօթքները բացայայտօրէն Աստուծոյ բարձրացան, անուշահոտ խունկի նման։ Օր մը Պարսիկ Արտաշէս Թագաւորը անտրամադիր Նէեմիայի հարցուց. «Դուն ինծմէ ի՞նչ կը խնդրես»։ Նէեմիա կը տեղեկագրէ՝ «Այն ատեն երկնքի Աստուծոյն աղօթք ըրի»։ Այդ հակիրճ ու լռելեայն աղօթքը պատասխանուեցաւ, քանի որ Նէեմիայի առիթ տրուեցաւ որ իր սրտին փափաքը կատարէ. երթայ Երուսաղէմ եւ անոր քանդուած պարիսպները վերաշինէ։—Նէեմեայ 2։1-8
Յիսուսէն Սորվեցէք Աղօթելու Կերպը
12. Ձեր բառերով ի՞նչպէս կրնաք ամփոփել Յիսուսի տիպար աղօթքին գլխաւոր կէտերը։
12 Աստուածաշունչին մէջ արձանագրուած բոլոր աղօթքներուն մէջէն, մասնաւորաբար դաստիարակիչ է տիպար աղօթքը, զոր Յիսուս Քրիստոս մատուցանեց որպէս անուշահոտ խունկ մը։ Ղուկասու Աւետարանը կ’ըսէ. «[Յիսուսի] աշակերտներէն մէկը ըսաւ իրեն. ‘Տէ՛ր, մեզի աղօթք ընել սորվեցուր, ինչպէս Յովհաննէս իր աշակերտներուն սորվեցուց’։ Յիսուս ըսաւ անոնց. ‘Երբ աղօթք կ’ընէք՝ ըսէք. «Ով Հայր մեր, որ երկինքն ես, քու անունդ սուրբ ըլլայ. քու թագաւորութիւնդ գայ. քու կամքդ ըլլայ, ինչպէս երկինքը՝ նոյնպէս երկրի վրայ. Մեր ամէն օրուան հացը օրէ օր մեզի տուր եւ մեզի ներէ մեր մեղքերը, քանզի մենք ալ կը ներենք այն ամենուն՝ որ մեզի պարտական են ու մեզ փորձութեան մի տանիր»’»։ (Ղուկաս 11։1-4. Մատթէոս 6։9-13) Հիմա այս աղօթքը նկատի առնենք, որու նպատակն էր որպէս ուղեցոյց ծառայել եւ ոչ թէ անգիր արտասանել։
13. Ի՞նչպէս կրնաք բացատրել՝ «Ով Հայր մեր . . . քու անունդ սուրբ ըլլայ» խօսքին իմաստը։
13 «Ով Հայր մեր . . . քու անունդ սուրբ ըլլայ»։ Իր ծառաներուն համար շատ մեծ առանձնաշնորհում մըն է Եհովան Հայր կոչել։ Որեւէ նիւթով իրենց գթած հօրը անվարան մօտեցող զաւակներու նման, Աստուծոյ կանոնաւորաբար պատուարժան ու յարգարժան աղօթքներ մատուցանելու համար ժամանակ պէտք է տրամադրենք։ (Սաղմոս 103։13, 14) Մեր աղօթքները, Եհովայի անուան սրբացման մասին մեր մտահոգութիւնը պէտք է արտացոլացնեն, քանի որ կ’ուզենք տեսնել այդ անուան մաքրուիլը, իր վրայ եկած բոլոր նախատինքներէն։ Այո, կ’ուզենք որ Եհովայի անունը առանձնացուի եւ սուրբ նկատուի։—Սաղմոս 5։11. 63։3, 4. 148։12, 13. Եզեկիէլ 38։23
14. Ի՞նչ է «քու թագաւորութիւնդ գայ» աղօթքին իմաստը։
14 «Քու թագաւորութիւնդ գայ»։ Թագաւորութիւնը Եհովայի իշխանութիւնն է, որ իր Որդւոյն եւ Յիսուսի ընկերակցող «սուրբերուն» յանձնուած երկնային մեսիական կառավարութեամբ արտայայտուած է։ (Դանիէլ 7։13, 14, 18, 27. Յայտնութիւն 20։6) Անիկա շուտով պիտի «գայ», երկրի վրայ Աստուծոյ գերիշխանութեան հակառակողներուն վրայ եւ զանոնք երկրի երեսէն պիտի սրբէ։ (Դանիէլ 2։44) Ապա Եհովայի կամքը պիտի ըլլայ երկրի վրայ, ինչպէս որ է երկնքի մէջ։ (Մատթէոս 6։10) Անիկա ի՜նչ ուրախութիւն պիտի պատճառէ Տիեզերքի Գերիշխանին ծառայող բոլոր հաւատարիմ արարածներուն։
15. Եհովայէ «մեր ամէն օրուան հացը» խնդրելը ի՞նչ կը նշէ։
15 «Մեր ամէն օրուան հացը օրէ օր մեզի տուր»։ Եհովայէ «օրուան» ուտելիքը խնդրելը կը նշէ որ մենք ճոխ պաշար չենք խնդրեր, այլ՝ միայն օրուան կարիքները։ Թէեւ այս բաներուն հայթայթման համար Աստուծոյ կ’ապաւինինք, բայց ձեռնտու եղած պատշաճ միջոցներով կ’աշխատինք ալ, ուտելիք եւ ուրիշ անհրաժեշտութիւններ ձեռք ձգելու համար։ (Բ. Թեսաղոնիկեցիս 3։7-10) Անշուշտ, մեր երկնաւոր Հայթայթիչին շնորհակալութիւն կը յայտնենք այս հայթայթումներուն ետին գտնուող իր սիրոյն, իմաստութեան եւ զօրութեան համար։—Գործք 14։15-17
16. Աստուծմէ ի՞նչպէս թողութիւն կրնանք ստանալ։
16 «Մեզի ներէ մեր մեղքերը, քանզի մենք ալ կը ներենք այն ամենուն՝ որ մեզի պարտական են»։ Քանի որ անկատար ու մեղաւոր ենք, որեւէ ատեն չենք կրնար Եհովայի կատարեալ չափանիշներուն գոհացում տալ։ Հետեւաբար, Յիսուսի փրկանքի զոհին հիման վրայ իրմէ թողութիւն հայցելու կարիքը ունինք։ Բայց եթէ կ’ուզենք որ «աղօթքի լսող»ը այդ զոհին օգուտները կիրարկէ մեր մեղքերուն համար, պէտք է զղջանք եւ յօժար ըլլանք ընդունելու իր կողմէ տրուած որեւէ կրթութիւն։ (Սաղմոս 65։2. Հռովմայեցիս 5։8. 6։23. Եբրայեցիս 12։4-11) Ասկէ զատ, Աստուծմէ թողութիւն կրնանք ակնկալել միմիայն երբ «ներենք այն ամենուն՝ որ մեզի պարտական են», այսինքն անոնց՝ որոնք մեզի դէմ կը մեղանչեն։—Մատթէոս 6։12, 14, 15
17. «Մեզ փորձութեան մի տանիր» խօսքերը ի՞նչ կը նշանակեն։
17 «Մեզ փորձութեան մի տանիր»։ Աստուածաշունչը երբեմն բաներ կ’ըսէ որպէս թէ Եհովան կ’ընէ, բայց իրականութեան մէջ ան պարզապէս զանոնք կը թոյլատրէ։ (Հռութայ 1։20, 21) Աստուած մեզ մեղք գործելու փորձութեան մէջ չի ձգեր։ (Յակոբու 1։13) Չարութիւն ընելու փորձութիւնը կու գայ Սատանայէն, մեր մեղաւոր մարմնէն եւ այս աշխարհէն։ Սատանան է Փորձիչը, որ մեզ կը մղէ որ Աստուծոյ դէմ մեղանչենք։ (Մատթէոս 4։3. Ա. Թեսաղոնիկեցիս 3։5) Երբ իրմէ կը խնդրենք՝ «մեզ փորձութեան մի տանիր», Աստուծմէ խնդրած կ’ըլլանք, որ երբ իրեն անհնազանդ գտնուելու փորձութեան դիմաց գտնուինք, թոյլ չտայ որ տեղի տանք։ Ան կրնայ մեզ առաջնորդել որ «չար»ին՝ Սատանային՝ կողմէ չնուաճուինք։—Մատթէոս 6։13. Ա. Կորնթացիս 10։13
Ձեր Աղօթքներուն Համաձայն Գործեցէք
18. Ուրախ ամուսնութեան եւ ընտանեկան կեանքի մասին մեր մատուցած աղօթքներուն համաձայն ի՞նչպէս կրնանք գործել։
18 Յիսուսի տիպար աղօթքը գլխաւոր կէտեր կը շօշափէ, բայց մենք կրնանք որեւէ նիւթի մասին աղօթել։ Օրինակ, կրնանք ուրախ ամուսնութիւն մը կնքելու մեր փափաքին մասին աղօթել։ Մինչեւ ամուսնութիւն մաքուր մնալու համար, ժուժկալութեան համար կրնանք աղօթել։ Բայց մեր աղօթքներուն համաձայն պէտք է գործենք, անբարոյ գրականութիւններէն եւ զբօսանքներէն խուսափելով։ Նաեւ հաստատ կերպով որոշենք ‘միայն Տէրոջմով ամուսնանալ’։ (Ա. Կորնթացիս 7։39. Բ. Օրինաց 7։3, 4) Ամուսնանալէ ետք, Աստուծոյ խրատները կիրառելով, պէտք է ուրախութեան համար մեր աղօթքներուն համաձայն գործենք։ Իսկ եթէ զաւակներ ունինք, չի բաւեր աղօթել որ անոնք Եհովայի հաւատարիմ ծառաներ ըլլան։ Աստուածաշունչի ուսումնասիրութեամբ եւ անոնց հետ կանոնաւորաբար քրիստոնէական ժողովներու ներկայ գտնուելով, մեր կարելին պէտք է ընենք, Աստուծոյ ճշմարտութիւնները անոնց մտքին վրայ դրոշմելու համար։—Բ. Օրինաց 6։5-9. 31։12. Առակաց 22։6
19. Եթէ մեր ծառայութեան մասին կ’աղօթենք, ի՞նչ պէտք է ընենք։
19 Ծառայութեան մէջ օրհնուելու համար կ’աղօթե՞նք։ Ուրեմն մեր աղօթքներուն համաձայն գործենք, Թագաւորութեան քարոզչութեան մէջ իմաստալից մասնակցութիւն մը բերելով։ Եթէ կ’աղօթենք որ պատեհութիւններ ունենանք ուրիշներուն օգնելու որ յաւիտենական կեանքի ճամբուն վրայ քալեն, հետաքրքրուած անհատներու մասին լաւ արձանագրութիւն մը պէտք է պահենք եւ մեր յայտագրին մէջ տան սուրբ գրային ուսումնասիրութիւններու տեղ տալու յօժար ըլլանք։ Իսկ եթէ կը փափաքինք որպէս ռահվիրայ լիաժամ կերպով մասնակցիլ քարոզչութեան. . .։ Այդ պարագային մեր աղօթքներուն համաձայն գործենք, մեր քարոզչութիւնը աւելցնելով եւ ուրիշ ռահվիրաներու հետ ծառայութեան մասնակցելով։ Այսպիսի քայլեր առնելով կ’ապացուցանենք որ մեր աղօթքներուն համաձայն կը գործենք։
20. Յաջորդ յօդուածը ի՞նչ բան նկատի պիտի առնէ։
20 Եթէ հաւատարմօրէն կը ծառայենք Եհովայի, կրնանք վստահ ըլլալ որ ան պիտի պատասխանէ մեր աղօթքներուն, որոնք իր կամքին հետ ներդաշնակ են։ (Ա. Յովհաննու 5։14, 15) Աստուածաշունչին մէջ արձանագրուած աղօթքներէն ոմանք քննելով, վստահաբար օգտակար կէտեր քաղեցինք։ Բայց մեր յաջորդ յօդուածը սուրբ գրային ուրիշ ուղղութիւններ պիտի տայ անոնց համար, որոնք կը փափաքին ‘իրենց աղօթքները Եհովայի առջեւ խունկի պէս պատրաստել’։
Ի՞նչպէս պիտի պատասխանէիք
◻ Ինչո՞ւ հաւատքով պէտք է մատուցանենք մեր աղօթքները։
◻ Մեր աղօթքներուն մէջ փառաբանութիւնը եւ երախտագիտութիւնը ի՞նչ դեր պէտք է խաղան։
◻ Ինչո՞ւ վստահութեամբ Եհովայէ օգնութիւն կրնանք հայցել աղօթքով։
◻ Տիպար աղօթքին գլխաւոր կէտերէն ոմանք ի՞նչ են։
◻ Ի՞նչպէս կրնանք մեր աղօթքներուն համաձայն գործել։
[Նկար՝ էջ 10]
Յովսափատ Թագաւորին նման երբեմն պէտքը կը զգանք աղօթելու. ‘Ո՛վ Եհովա, չենք գիտեր ի՛նչ պէտք է ընենք, բայց մեր աչքերը քեզի կ’ուղղենք’
[Նկար՝ էջ 11]
Յիսուսի տիպար աղօթքին համաձայն կ’աղօթէ՞ք