Քարոզչութեան Մէջ Ձեր Ուրախութիւնը Աւելցուցէք

¹ Ձեր ծառայութեան մէջ բարի լուրը բաժնելու ուրախութիւնը կը վայելէ՞ք։ Եթէ ուշադիր չըլլանք, ամբարիշտ աշխարհը կրնայ մեզ քարոզչութեան նկատմամբ երկչոտ դարձնել, պատճառ դառնալով որ մեր ուրախութիւնը կորսնցնենք։ Չընդառաջող թաղամասի մը մէջ աշխատիլը նաեւ կրնայ մեզ վհատեցնել։ Ի՞նչ գործնական քայլեր կրնանք առնել քարոզչութեան մէջ մեր ուրախութիւնը աւելցնելու համար։

² Դրական Եղէք. Դրական կեցուածք մը պահպանելը իրապէս կ’օգնէ։ Ասիկա ընելու կերպերէն մէկն է՝ «Աստուծոյ գործակից»ները ըլլալու մեր հոյակապ առանձնաշնորհումին վրայ խոկալ։ (Ա. Կորն. 3։9) Այս գործը կատարելու համար Յիսուս ալ մեր հետն է։ (Մատթ. 28։20) Եւ ան մեզի թիկունք կը կանգնի հրեշտակային բանակով մը։ (Մատթ. 13։41, 49) Ուստի, կրնանք վստահ ըլլալ թէ Աստուած է մեր ջանքերը ուղղողը։ (Յայտ. 14։6, 7) Ուրեմն, ոմանք մեր գործին ինչպէս որ ալ հակազդեն, երկինքը մեծ ուրախութեամբ կ’ընդառաջէ։

³ Լաւ Պատրաստեցէք. Լաւ պատրաստութիւնն ալ մեր ուրախութեան կը նպաստէ։ Ծառայութեան պատրաստուիլը շատ աշխատանք պէտք չէ պահանջէ։ Մի քանի վայրկեան կ’ուզէ նկատի առնելու համար խօսակցական կէտ մը՝ ընթացիկ պարբերաթերթերէն կամ այդ ամսուան ընթացքին ներկայացուելիք գրականութենէն։ Մեր Թագաւորութեան Ծառայութիւնը թերթիկին «Պարբերաթերթերուն Մասին Ի՛նչ Ըսենք» շրջագծէն ներկայացում մը ընտրեցէք։ Դիմեցէք «Դաշտի Ծառայութեան Համար Թելադրուած Ներկայացումներ» խորագրով Յունուար 2002–ի յաւելուածականին, կամ ակնարկ մը նետեցէք Պատճառաբանել գրքին վրայ, ազդու ներկայացման մը համար։ Եթէ տանտէրներուն կողմէ սովորաբար յարուցուած առարկութիւն մը կայ որ արգելք կը հանդիսանայ ձեզի, պատասխան մը պատրաստեցէք որ իրենց առարկութիւնը նկատի կ’առնէ եւ ուշադրութիւնը կ’ուղղէ հետաքրքրութիւն արթնցնող նիւթի մը։ Պատճառաբանել գիրքը ասիկա ընելու համար շատ օգտակար է։ Այս օժանդակները գործածելը մեզի պիտի տայ պէտք եղած վստահութիւնը ուրախութեամբ քարոզելու համար։

⁴ Ջերմեռանդօրէն Աղօթեցէք. Աղօթքը կենսական է մնայուն ուրախութեան համար։ Քանի որ Եհովայի գործը կ’ընենք, իրմէ պէտք է խնդրենք իր հոգին, որուն պտուղներէն մէկը ուրախութիւնն է։ (Գաղ. 5։22) Եհովա մեզի զօրութիւն պիտի տայ քարոզչութիւնը շարունակելու համար։ (Փիլ. 4։13) Մեր ծառայութեան համար աղօթելը կրնայ մեզի օգնել որ շարունակենք հարցերը շիտակ կերպով տեսնել, երբ ժխտական փորձառութիւններ ունենանք։ (Գործք 13։52. Ա. Պետ. 4։13, 14) Եթէ վախնանք, աղօթքը մեզի կրնայ օգնել որ խիզախութեամբ եւ ուրախութեամբ յարատեւենք։—Գործք 4։31

⁵ Պատեհութիւններ Ստեղծեցէք. Անշուշտ, մեր ծառայութիւնը աւելի ուրախ կ’ըլլայ, երբ կարենանք մարդիկ գտնել ու անոնց վկայել։ Օրուան տարբեր ժամուն տունէ տուն երթալու համար ձեր յայտագիրը փոխելը, թերեւս ուշ յետմիջօրէին կամ երեկոյեան, կրնայ աւելի արդիւնաբեր ըլլալ։ Մարդոց կը հանդիպիք ամէն անգամ որ փողոցը կը քալէք, շուկայ կ’երթաք, օթոպիւսը կ’ելլէք, կամ զբօսայգիին մէջ կը պտըտիք։ Ինչո՞ւ խօսակցութիւն մը սկսելու համար հակիրճ ներկայացում մը չպատրաստէք եւ նախաձեռնութիւնը առնելով մօտենաք անոնց, որոնք բարեկամական կը թուին ըլլալ։ Կամ թերեւս աշխարհային գործ մը կ’աշխատիք կամ պետական դպրոց կ’երթաք, ուր ամէն օր ուրիշներու հետ խօսակցութիւններ կ’ունենաք։ Կրնաք առիթը ունենալ վկայութիւն մը տալու, պարզապէս յարուցելով հետաքրքրութիւն արթնցնող սուրբ գրային նիւթ մը։ Ազդու թելադրութիւններ կը գտնուին Յունուար 2002–ի Մեր Թագաւորութեան Ծառայութիւնը թերթիկին յաւելուածականին առաջին էջին վրայ։ Այս ջանքերէն որեւէ մէկը կրնայ քարոզչութեան մէջ անհատին ուրախութիւնը մեծապէս աւելցնել։

⁶ Քանի որ ուրախութիւնը մեզի կ’օգնէ համբերութեամբ տոկալու, որքա՜ն կենսական է որ զայն պահպանենք։ Ասիկա ընելով մեծ վարձատրութիւն մը ձեռք պիտի ձգենք, երբ այս անկրկնելի գործը իր վախճանին հասնի։ Այս հեռանկարը ինքնին կրնայ քարոզչութեան մէջ մեր ուրախութիւնը աւելցնել։—Մատթ. 25։21