Մաս 3. Աստուածաշունչի Յառաջդիմական Ուսումնասիրութիւններ Վարենք

Համարները Ազդուօրէն Գործածել

1. Աստուածաշունչի ուսումնասիրութիւններ վարելու ատեն, ինչո՞ւ Սուրբ Գրութիւններուն վրայ շեշտ պէտք է դնենք։

¹ Աստուածաշունչի ուսումնասիրութիւններ վարելու մեր նպատակն է «աշակերտել», անհատներու օգնելով որ Աստուծոյ Խօսքին ուսուցումները հասկնան եւ ընդունին ու կիրարկեն իրենց կեանքին մէջ։ (Մատթ. 28։19, 20. Ա. Թես. 2։13) Հետեւաբար ուսումնասիրութիւնը Սուրբ Գրութիւններուն վրայ պէտք է կեդրոնանայ։ Սկիզբը, օգտակար է աշակերտներուն ցոյց տալ թէ ի՛նչպէս կրնան իրենց Աստուածաշունչին մէջ որոշ համարներ գտնել։ Սակայն ի՞նչպէս կրնանք Սուրբ Գրութիւնները գործածել անոնց օգնելու որ հոգեւորապէս յառաջդիմեն։

2. Ի՞նչպէս կ’որոշենք թէ ո՛ր համարները պիտի կարդանք ու քննարկենք։

² Որոշէ Ո՛ր Համարները Կարդալ. Երբ դասը կը նախապատրաստես, տես իւրաքանչիւր նշուած համարի կապակցութիւնը նկատի առնուած կէտին հետ, եւ որոշէ թէ ո՛ր համարները պիտի բանաս ու քննարկես ուսումնասիրութեան ընթացքին։ Ընդհանրապէս լաւ է որ կարդաս այն համարները, որ մեր հաւատալիքներուն աստուածաշնչական հիմը ցոյց կու տան։ Հարկ չկայ երկրորդական տեղեկութիւններ հայթայթող համարները կարդալու։ Իւրաքանչիւր աշակերտին կարիքներն ու պարագաները նկատի առ։

3. Հարցումներ գործածելուն օգուտը ի՞նչ է, եւ ասիկա ի՞նչպէս կրնանք ընել։

³ Հարցումներ Գործածէ. Փոխանակ համարները աշակերտին բացատրես, թող ինք բացատրէ զանոնք քեզի։ Կրնաս զինք մղել ասիկա ընելու, հմտօրէն հարցումներ ուղղելով։ Եթէ համարի մը կիրարկումը բացայայտ է, կրնաս պարզապէս հարցնել թէ համարը ի՛նչպէս թիկունք կը կանգնի պարբերութեան ըսուածին։ Կարգ մը պարագաներուն, աւելի մասնայատուկ հարցում կամ հարցումներու շարք մը պէտք է ուղղես, որպէսզի աշակերտը շիտակ եզրակացութեան յանգի։ Եթէ յաւելեալ բացատրութիւններու կարիք ըլլայ, հայթայթէ զանոնք՝ աշակերտը պատասխանելէ ետք։

4. Ի՞նչ տարողութեամբ բացատրելու ենք մեր կարդացած համարները։

⁴ Զայն Պարզ Պահէ. Ճարտար աղեղնաւորը յաճախ մէկ նետով իր թիրախը կը հարուածէ։ Նմանապէս, ճարտար ուսուցիչը կէտ մը շեշտելու համար շա՜տ խօսելու պէտք չունի։ Ան կրնայ պարզօրէն, յստակօրէն եւ ճշգրտօրէն տեղեկութիւններ հաղորդել։ Երբեմն հարկ կ’ըլլայ որ քրիստոնէական գրականութիւնները պրպտես, որպէսզի համար մը հասկնաս ու ճշգրտօրէն բացատրես։ (Բ. Տիմ. 2։15) Բայց մի՛ փորձեր դասին իւրաքանչիւր համարին բոլոր երեսակները բացատրել։ Պարփակէ միայն ի՛նչ որ անհրաժեշտ է նկատի առնուած կէտը շեշտելու համար։

5, 6. Ի՞նչպէս կրնանք աշակերտներուն օգնել որ Աստուծոյ Խօսքը իրենց կեանքին մէջ կիրարկեն, բայց ի՞նչ բանէ պէտք է խուսափինք։

⁵ Գործնական Կիրարկում Ըրէ. Երբ յարմար է, աշակերտին ցոյց տուր թէ ի՛նչպէս համարները կը կիրարկուին իրեն։ Օրինակ, երբ Եբրայեցիս 10։24, 25–ը նկատի առնես աշակերտի մը հետ, որ տակաւին քրիստոնէական ժողովներուն չի յաճախեր, կրնաս ժողովներէն մէկուն մասին խօսիլ եւ զինք հրաւիրել որ ներկայ գտնուի։ Բայց անոր վրայ ճնշում մի՛ բանեցներ։ Աստուծոյ Խօսքին թոյլ տուր որ զինք մղէ հարկ եղած քայլը առնելու՝ Եհովան հաճեցնելու համար։—Եբր. 4։12

⁶ Մինչ աշակերտելու յանձնարարութիւնը կը կատարենք, թող ‘հաւատքով հնազանդիլը’ քաջալերենք, համարները ազդուօրէն գործածելով։—Հռովմ. 16։26