Հարցումի տուփ
◼ Մկրտուելու հաւանութիւն ստանալէն առաջ, չմկրտուած հրատարակիչ մը ո՞ր տարողութեամբ պէտք է ժողովներուն ներկայ գտնուի եւ ծառայութեան մասնակցի։
Մկրտուիլը անհատի մը կայացնելիք ամէնէն կարեւոր որոշումն է։ Ուստի առաջ որ անհատ մը մկրտուելու հաւանութիւն ստանայ, ան պէտք է բաւարար հասկացողութիւն ունենայ, թէ Աստուած ի՛նչ կը պահանջէ իրմէ։ Ասկէ զատ, ան արդէն իսկ պէտք է ցոյց տուած ըլլայ, թէ վճռած է Աստուծոյ պահանջներուն համաձայն ապրիլ։
Քրիստոնեաներուն պատուէր կը տրուի որ մէկտեղ հաւաքուիլը չթողուն, ուստի չմկրտուած հրատարակիչ մը արդէն իսկ պէտք է ջանասիրութեամբ ժողովներուն ներկայ գտնուի (Եբ. 10։24, 25)։ Ան նաեւ, ընդհանուր առմամբ, պէտք է մասնակցութիւն բերէ մեկնաբանութիւններ ընելով։ Հաւանաբար, ան Թագաւորութեան ծառայութեան դպրոցին մէջ արձանագրուի, թէեւ ասիկա պահանջ մը չէ։
Ասկէ զատ, քանի որ քրիստոնեաներուն յանձնարարուած է բարի լուրը քարոզել եւ աշակերտել, չմկրտուած հրատարակիչ մը, նախքան մկրտուիլը, պէտք է կանոնաւորաբար ծառայութեան մասնակցի (Մատ. 24։14. 28։19, 20)։ Մկրտուելու համար, ան քանի՞ ամիս պէտք է հրատարակիչ ըլլայ։ Տրամաբանօրէն, անոր բաւարար ժամանակ պէտք է տրուի, որպէսզի ցոյց տայ թէ հաստատօրէն վճռած է ամէն ամիս կանոնաւորաբար եւ նախանձախնդրութեամբ ծառայութեան մասնակցիլ (Սաղ. 78։37)։ Սակայն, հրատարակիչ դառնալէն մինչեւ մկրտուելու որակեալ ըլլալու միջեւ եղած ժամանակը պէտք չէ երկար տեւէ. թերեւս՝ միայն քանի մը ամիս։ Դաշտի ծառայութեան ժամերը որքա՞ն պէտք է ըլլան։ Ասոր նկատմամբ մասնաւոր օրէնք մը չկայ։ Երէցները պէտք է իւրաքանչիւր հրատարակիչի յատուկ պարագաները նկատի առնեն եւ բանաւոր ու հաւասարակշռուած ըլլան (Ղուկ. 21։1-4)։
Երէցները (կամ շատ քիչ երէց ունեցող ժողովքներու մէջ՝ օգնական ծառաները), որոնք կը տեսակցին մկրտութեան թեկնածուի մը հետ, պէտք է յիշեն թէ իւրաքանչիւր անհատ կը տարբերի միւսէն, եւ պէտք է լաւ դատողութիւն գործածեն՝ որոշելու համար թէ անձը մկրտուելու որակեալ է կամ ոչ։ Անոնք վստահ պիտի ըլլան թէ ան իսկական փափաք ունի՞ Եհովայի վկայ մը ըլլալու եւ կը գնահատէ՞ Եհովայի կազմակերպութեան հետ ընկերակցելու եւ ծառայութեան մասնակցելու իր առանձնաշնորհումը։ Երէցները ի մտի կ’ունենան, թէ ան տակաւին հոգեւոր հասունութեան չէ հասած կամ մկրտուած փորձառու քարոզիչներուն ատակութիւնը չունի։ Իսկ եթէ անոնք խորհին թէ թեկնածուն մկրտութեան որակեալ չէ, պէտք է իրենց որոշումին աստուածաշնչական պատճառները ազնուութեամբ բացատրեն, եւ հոգեւոր գետնի վրայ իրեն օգնեն։